上下九

出自維基百科,自由嘅百科全書
跳去: 定向搵嘢
地圖

上下九粵讀soeng6 haa6 gau2)係廣州嘅一條步行街,正式名嗌上下九步行街,位於廣州市荔灣區(西關),係由上九路、下九路、第十甫路三條路合成,東通人民南路,西接恩寧路,全長1218米,喺1995年9月30號正式成為商業步行街。實質上除咗佢所組成嘅三條路外,實際範圍重包埋寶華路康王路。佢係有名嘅「西關商廊」,亦係廣州老城區至繁華嘅地方,係廣州三大傳統商業中心之一,共有商鋪238間同上千商戶。佢亦係廣州有名嘅旅遊點[1]

個名點嚟[編輯]

原本上下九兩條路係舊時廣州第九舖,係同一條路,後尾喺清兵屠城時為咗減少生靈塗炭,以六脈渠為界,將第九舖劃為上九舖同下九舖,後來啲人驚畀清兵知路牌做手腳,去咗偏旁,「舖」改成「甫」(亦即係古仔「殺人十八甫,填屍六脈渠」)[2]。上下九個名就係噉嚟。

歷史[編輯]

喺6世紀呢道就係一個商業區,而家上下九有笪地叫做「西來初地」,嗰道就係當年印度高僧達摩來華傳教嘅上陸地。

明清之際,因為有間專門招待番客嘅懷遠驛(喺今日下九路南邊)同埋開通大觀河,兼且十三行做咗中國對外貿易中心,帶喐咗呢度嘅商業。後尾十三行火燭燒毀,商業轉晒嚟呢度。而後週邊批發市興起,促使上下九成為商業旺地[3]

景觀[編輯]

主幹道多係騎樓,清代建成,融合西洋、滿洲同當地建築元素。同一般騎樓一樣,下商上住,喺二樓有陽棚為路人遮風擋雨。

當中名店:第十甫商店(拆咗)、陶陶居蓮香樓、脆香餅家、新華書店廣州酒家、廣州婦兒商店、永安公司(拆咗)。

現時上下九多衫舖首飾舖,重有啲電影院同電子舖。相對北京路嘅高檔路線,上下九主要係中低端嘅,比較平,所以好多廣州人都嚟呢度行街[4]

參考[編輯]