上下九步行街

地圖

上下九步行街（粵拼：soeng6 haa6 gau2 bou6 hang4 gaai1）係廣州嘅一條步行街，簡稱上下九（soeng6 haa6 gau2），位於廣州市荔灣區（西關），係由上九路、下九路、第十甫路三條路合成，東通人民南路，西接恩寧路，全長1218米，喺1995年9月30號正式成為商業步行街。實質上除咗佢所組成嘅三條路外，實際範圍重包埋寶華路、康王路。佢係有名嘅「西關商廊」，亦係廣州老城區至繁華嘅地方，係廣州三大傳統商業中心之一，共有商鋪238間同上千商戶。佢亦係廣州有名嘅旅遊點。

個名點嚟

原本上下九兩條路係舊時廣州第九舖，係同一條路，後尾喺清兵屠城時為咗減少生靈塗炭，以六脈渠為界，將第九舖劃為上九舖同下九舖，後來啲人驚畀清兵知路牌做手腳，去咗偏旁，「舖」改成「甫」（亦即係古仔「殺人十八甫，填屍六脈渠」）。上下九個名就係噉嚟。

歷史

喺6世紀呢道就係一個商業區，而家上下九有笪地叫做「西來初地」，嗰道就係當年印度高僧達摩來華傳教嘅上陸地。

明清之際，因為有間專門招待番客嘅懷遠驛（喺今日下九路南邊）同埋開通大觀河，兼且十三行做咗中國對外貿易中心，帶喐咗呢度嘅商業。後尾十三行火燭燒毀，商業轉晒嚟呢度。而後週邊批發市興起，促使上下九成為商業旺地。

喺武漢肺炎大爆發前後，上下九步行街人氣急跌，唔少舖頭就關門大吉。喺2020年7月，荔灣區區長銳明出席由中共廣州市紀委主辦嘅宣傳節目，話中共荔灣區委同區政府喺2019年，就開始研究點樣振興上下九步行街，仲搵咗策劃公司去到設計上下九步行街嘅發展，計劃喺2020年下半年開始改造上下九。

景觀

主幹道多係騎樓，清代建成，融合西洋、滿洲同當地建築元素。同一般騎樓一樣，下商上住，喺二樓有陽棚為路人遮風擋雨。

當中名店：第十甫商店（拆咗）、陶陶居、蓮香樓、脆香餅家、新華書店、廣州酒家、廣州婦兒商店、永安公司（拆咗）。

現時上下九多衫舖首飾舖，重有啲電影院同電子舖。相對北京路嘅高檔路線，上下九主要係中低端嘅，比較平，所以好多廣州人都嚟呢度行街。

公共交通

• 地鐵
  • 1號綫 黃沙站、長壽路站
  • 6號綫 黃沙站、文化公園站
  • 8號綫 華林寺站、文化公園站
• 巴士：帶河路站、上九路站、華林寺站、大新路口站、恆寶廣場站、上下九步行街站