中華人民共和國主席/中華人民共和國主席

出自維基百科,自由嘅百科全書
  呢篇文講嘅唔係中華人民共和國最高領導人

中華人民共和國主席,喺中國大陸入面同地區一般就咁叫國家主席,係中華人民共和國掛名嘅國家元首,由全國人民代表大會選出,職責係代表中國從事外交活動。[1]不過,國家主席基本上冇出現多過一個候選人,而該候選人實際上由中共中央政治局提名。任期5年,最多連任一屆。

中國國家主席喺1954年設立,前身係中央人民政府委員會。1968年劉少奇被打倒後國家主席職務懸空,由國家副主席董必武同埋宋慶齡兩個人代理。到咗1975年第四屆全國人大修憲廢除國家主席同副主席,1982年第四部憲法又有返。而家國家主席係習近平,喺2013年3月嘅第十二屆全國人大上面當選。

權力變化

1954年第一屆全國人大通過嘅《中華人民共和國憲法》規定國家主席主持最高國務會議兼任國防委員會主席,有行政權同名義上嘅軍權,屬於有實權嘅職務。1982年訂嘅第四部憲法雖然重新設立國家主席職位,不過大幅削減主席嘅職權。憲法第三章第二節規定:「根據全國人大同佢嘅常委會決定」公布法律、任免國務院總理同埋國務院人員、特赦、宣布緊急狀態、動員、授國家勳章;代表中國做國事,「根據全國人大常委會決定」派遣同叫返駐外國全權代表,批准同埋廢除國際條約同埋重要協定。冇咗獨立嘅權力,而名義上嘅兵權就畀咗國家中央軍事委員會

而家國家主席冇實權,係「虛位元首」,只係國家最高代表,同埋全國人大同常委會嘅發布機。不過自從江澤民開始,由中共中央總書記中央軍委主席兼任,通過黨軍最高領導人兼任又成為咗實權元首。中華人民共和國主席係中國嘅代表,對外交往上面領導人一般會用國家主席嘅身份,對內多數用總書記身份,對軍隊就用軍委主席身份。

排名變化

因為做緊中國共產黨中央委員會主席(黨主席),所以毛澤東做國家主席嗰陣喺黨內嘅排名係首位。到1959年劉少奇接國家主席嗰時,佢係排名第一嘅中共中央副主席,黨內地位僅次於黨主席毛澤東名列第二。文化大革命爆發之後,劉少奇嘅排名跌到落第八,跟住被開除出黨。李先念做國家主席嗰陣,喺中央政治局常委入面排名第五,甚至排喺國務院總理後面。到咗楊尚昆做國家主席嗰時,佢冇入到政治局常委會,但係同其他領導人同時列席就排名第三,僅次於總書記趙紫陽同領導人鄧小平。從1993年江澤民中共中央總書記身份兼任國家主席開始,國家主席喺事隔34年之後再次排名黨內首位。

歷任主席

中央人民政府主席

中華人民共和國主席

  1. 毛澤東(1954年-1959年)
  2. 劉少奇(1959年-1968年)
  3. 李先念(1983年-1988年)
  4. 楊尚昆(1988年-1993年)
  5. 江澤民(1993年-2003年)
  6. 胡錦濤(2003年-2013年)
  7. 習近平(2013年-)