丹尼士三叉戟2型

出自維基百科,自由嘅百科全書
跳去: 定向搵嘢
丹尼士三叉戟2型
Dennis Trident 2
East London TA1.JPG
丹尼士三叉戟2型
First London DN33518.JPG
Enviro 400一體化巴士,配新版三叉戟2型(Enviro 400)底盤
製造廠 丹尼士車廠
/TransBus International
/亞歷山大丹尼士
邊道出 英格蘭Guildford
取代咗 丹尼士飛箭
製造年份 1997年—
主要對手 兩軸版三叉戟:
Scania N94UD
Scania OmniCity
DAF/VDL DB250
富豪B7TL
Enviro 400底盤:
Optare Olympus
Scania N230UD/N270UD
Scania OmniCity
Wright Gemini 2 DL
Wright Gemini 2 HEV(混能車)
富豪B5LH(混能車)
富豪B9TL
規格
兩軸版三叉戟:
9.95米、10.5米、10.65米、11.4米
Enviro 400底盤:
10.1米/10.2米/10.3米/10.5米、10.8米/10.9米/11米、11.4米、12米
2.55米
4.2米、4.4米
引擎 兩軸版三叉戟:
康明斯C系
康明斯ISCe
Enviro 400底盤:
康明斯ISCe
康明斯ISBe
康明斯ISLe
康明斯ISL
猛獅D0836LOH65
波箱 兩軸版三叉戟:
Voith DIWA
ZF Ecomat
Enviro 400底盤:
Voith DIWA
ZF Ecomat
BAE Systems HybriDrive(混能車驅動系統)
ZF EcoLife

丹尼士三叉戟2型Dennis Trident 2,曾經叫過做TransBus Trident 2)係一款由英國丹尼士車廠出嘅兩軸低地台雙層巴士,喺1997年推出。佢取代咗丹尼士飛箭雙層巴士。丹尼士車廠喺2001年正式併入TransBus International之後,三叉戟2型就改由TransBus出(期間丹尼士呢個牌子一度被放棄),由2004年起,三叉戟2型改由亞歷山大丹尼士出。

兩軸版三叉戟[編輯]

三叉戟2型底盤喺推出初期係以丹尼士三叉戟(Dennis Trident)或者TransBus Trident名義賣。

三叉戟2型底盤有打橫擺嘅後置式引擎,引擎擺喺引擎室右邊,散熱水箱就擺喺引擎室左邊。佢可以配康明斯C系歐盟二型引擎,後來改配康明斯ISCe歐盟三型引擎,波箱配搭係Voith DIWA或者ZF Ecomat。三叉戟2型可以配亞歷山大ALX400、Plaxton President或者東蘭開夏Lolyne/Myllennium Lolyne車身。

三叉戟2型喺推出之後頭幾年,喺英國有多間巴士公司買,其中Stagecoach第一集團、Travel West Midlands(而家叫National Express West Midlands)同埋Lothian Buses都買咗過百架。有啲三叉戟2型被出口去愛爾蘭(賣畀Dublin Bus)同埋西班牙(喺巴塞隆拿同埋馬德里做觀光車)。但後來Scania N94UD "OmniDekka"喺英國推出令競爭更激烈,再加上TransBus International喺2004年被接管,三叉戟2型嘅需求明顯減少,得返Stagecoach繼續做佢嘅主要顧客。

最後一批以三叉戟名義賣嘅三叉戟2型喺2006年付運Isle of Man Transport。

Enviro 400底盤[編輯]

2005年,亞歷山大丹尼士為咗整新嘅Enviro 400雙層巴士而研製出新版三叉戟2型底盤,底盤改以Enviro 400名義賣,不過喺前門附近嘅亞歷山大丹尼士金屬牌上面嘅車輛型號仍然係「Trident 2」。新版三叉戟2型底盤保留原有嘅康明斯ISCe歐盟三型引擎,但好快俾康明斯ISBe六汽缸歐盟四型引擎取代,波箱配搭仍然係Voith DIWA或者ZF Ecomat。底盤經過多個改動,包括前輪跨被加長,令架車嘅前軸車轆上面可以裝最多3個位,另外亦可以用新設計嘅油缸去配合直樓梯車身設計。新版三叉戟2型底盤除咗可以用原廠Enviro 400車身以達致底盤車身一體化外,亦可以配Darwen/Optare Olympus車身。呢款Enviro 400底盤一路出到2009年。

喺2008年底嘅Euro Bus Expo 2008展覽會上,亞歷山大丹尼士展出咗一架新版Enviro 400。底盤(別名繼續叫「Trident 2」)再經過改良,一路用開嘅ZF驅動軸嘅動力輸入位置由左邊改咗去右邊,引擎改為擺喺引擎室左邊,而散熱水箱就擺喺引擎室右邊,尾輪跨亦長咗少少。佢可以配康明斯ISBe六汽缸歐盟五型/EEV或者猛獅D0836LOH65引擎(後者個水箱大少少),波箱配搭係Voith DIWA或者ZF EcoLife。到咗2009年,亞歷山大丹尼士研製出香港版Enviro 400,佢嘅尾輪跨進一步加長,一副康明斯ISLe歐盟五型引擎擺喺引擎室左邊,而喺引擎室右邊嘅散熱水箱就升高咗,引擎室上面擺咗一副冷氣機。2011年,喺歐洲賣嘅Enviro 400底盤改到符合歐洲委員會嘅Whole Vehicle Type Approval標準(簡稱ECWVTA),同年亞歷山大丹尼士公佈北美洲開頂版Enviro 400,底盤規格較接近香港版,但前輪跨改番短同埋改用符合美國環保局EPA 2010廢氣排放標準嘅康明斯ISL引擎。

喺2012至2013年,亞歷山大丹尼士試出咗三架配康明斯ISBe六汽缸歐盟六型引擎嘅Enviro 400,一架配Voith DIWA波箱,兩架配ZF EcoLife波箱,尾輪跨比起2008年推出嘅英國本土版再長少少。

亞歷山大丹尼士喺2005年整咗兩架Enviro 400樣辦車,其中一架係畀Stagecoach London取代喺2005年7月7號倫敦連串炸彈襲擊中損毀報廢嘅一架三叉戟2型巴士,而另一架係畀Travel West Midlands,兩架車一齊喺同年底嘅Coach & Bus Live 2005展出。第一份Enviro 400訂單係嚟自倫敦Metroline,呢批共28架車連同Stagecoach London同埋Travel West Midlands嘅樣辦車喺2006年初投入服務。

喺2009年之前嘅倫敦,Enviro 400因為VDL冇啱嘅雙層巴士,同埋富豪B9TL因散熱水箱噪音等問題而俾管理倫敦交通嘅Transport for London禁止用嚟行倫敦合約巴士線而得益,有多間倫敦嘅巴士公司買咗Enviro 400。而喺倫敦以外地區,Stagecoach係Enviro 400嘅主要顧客,佢喺2006至2007年先引入130架配歐盟三型引擎嘅Enviro 400,其後再引入幾百架歐盟四型/歐盟五型/EEV引擎嘅Enviro 400,包括僅有嘅20架猛獅引擎Enviro 400。Arriva集團亦同樣買咗多架Enviro 400。

配Darwen/Optare Olympus車身嘅Enviro 400總共有56架,全部都係較早期嘅右邊引擎版本。第一架配Darwen Olympus車身嘅Enviro 400喺2008年付運倫敦CT Plus公司,同年底Courtney Coaches(而家叫Courtney Buses)接收咗一架Optare Olympus車身嘅Enviro 400,2008至2009年London General接收咗54架Optare Olympus車身嘅Enviro 400。

香港嘅九龍巴士同埋城巴喺2009年底各自接收咗一架10.5米長嘅Enviro 400,佢哋喺2010年2月開始出街載客。城巴喺2010年7月再出多一架,又喺2011年出多38架,2012至2013年出多20架。港鐵公司喺2011年訂咗9架。九龍巴士亦喺2012至2013年出多50架。

喺北美洲,首先接收開頂版Enviro 400嘅係美國夏威夷檀香山嘅E Noa Tours,後來開頂版Enviro 400再喺美國同埋加拿大幾個城市投入服務。

除此之外,亞歷山大丹尼士亦特別整咗一架Enviro 400,喺2008年夏季奧林匹克運動會閉幕禮同埋2008年北京夏季殘疾人奧運會閉幕禮作宣傳表演用。

Enviro 400H[編輯]

早喺2007年,亞歷山大丹尼士已經開始設計柴油/電力混合驅動版Enviro 400(對外稱為Enviro 400H)。佢用BAE Systems嘅HybriDrive驅動系統,用嚟發電嘅康明斯ISBe四氣缸引擎擺喺引擎室右邊,而散熱水箱就擺喺引擎右邊。

去到2011年,亞歷山大丹尼士開始出另一版本嘅Enviro 400H。佢改以2008年亮相嘅新版Enviro 400底盤為藍本,引擎室佈局左右倒轉,用嚟發電嘅康明斯ISBe四氣缸引擎擺喺引擎室左邊,而散熱水箱就擺喺引擎左邊。

由2012年出廠嘅Enviro 400H開始,架車嘅引擎可以喺車速跌到落時速4哩(大概時速6.4公里)以下就停低,去到車速升返上時速7哩(大概時速11.3公里)以上先至着返,而唔再係係噉行。

喺2013年,亞歷山大丹尼士試出咗一架配康明斯ISBe四汽缸歐盟六型引擎嘅Enviro 400H,引擎散熱水箱去返引擎右邊。

Enviro 400H初頭淨係得原廠車身,儲電用嘅鋰電池擺喺上層車尾。其後亞歷山大丹尼士同西班牙嘅UNVI合作,出咗用Enviro 400H底盤嘅雙層開篷巴士。

2008年開始,有12架Enviro 400H喺倫敦投入服務作試驗,其中一架喺Euro Bus Expo 2008展覽會展出。後來英格蘭同蘇格蘭政府各自成立Green Bus Fund去資助巴士公司去買比較環保嘅巴士,兩隻基金喺2009同埋2010年夾埋資助購買586架巴士(2010至2012年交貨),其中300架係Enviro 400H[1]。其中Stagecoach買得最多,買咗123架;倫敦方面就訂多84架;而Reading Transport買嗰31架同埋Lothian Buses買嗰15架係11.4米長版本。

第一架配UNVI開篷車身嘅Enviro 400H喺2011年喺比利時Kortrijk搞嘅Busworld巴士展亮相。

參考[編輯]

出面網頁[編輯]