九廣鐵路公司

出自維基百科,自由嘅百科全書
(由九鐵公司跳轉過嚟)
  本文係關於1910年至2007年間九廣鐵路嘅營運者。現時九廣鐵路係港鐵一部分,由香港鐵路有限公司營運。
九廣鐵路公司
Kowloon-Canton Railway Corporation
類型空殼公司
開檔1982年12月24號[1]
總部地址新界火炭樂景街9號
火炭鐵路大樓8樓
緊要人物管理局主席:劉怡翔
總裁:梁廣灝
產業乜業務都冇
年營業額9.21億港元(2009年)[2]
稅後盈餘2.78億港元
員工人數2個(2008年5月)[3]

九廣鐵路公司(簡稱九鐵公司,英文:Kowloon-Canton Railway CorporationKCRC),係香港特別行政區政府全資擁有嘅空殼公司。九鐵公司喺1982年12月24號去到2007年12月2號(約25年)負責經營香港其中一個鐵路網—「九廣鐵路」,之後做埋貨運業務同埋管理佢嘅物業。兩鐵合併之後,公司業務畀晒香港鐵路有限公司做,所以而家已經冇晒所有業務。九廣鐵路公司只係繼續出租合併後剩低嘅物業資產[4],於2008年,出租只錄得1,200萬港元收入,而在連城廣場保留嘅四層物業,九廣鐵路公司亦至2008年12月初租出其中兩層。

[編輯]

火炭鐵路大樓,之前叫九廣鐵路公司大樓
九廣鐵路公司標誌

九廣鐵路公司成立前,喺1910年啟用嘅九廣鐵路-英段係由政府部門九廣鐵路局管理同營運。1981年,香港政府計劃將九廣鐵路局由政府部門改為公共法團,畀新公司以商業原則運作。

1982年12月24號,《九廣鐵路公司條例》通過,包括成立九廣鐵路公司,令九廣鐵路正式脫離政府。呢個計劃源自新公司成立後,公司雖然繼續由政府全資擁有,但運作就由公司自行處理,再由管理局監察,管理局成員由香港總督(香港主權移交後改為香港特別行政區行政長官)委任。

1983年2月1號,九廣鐵路正式改由九廣鐵路公司經營同管理。

1990年代,為配合政府優先發展鐵路嘅政策,九廣鐵路公司改組成為規劃、設計同埋建造大型新網絡嘅機構。公司應政府邀請,就多條新鐵路嘅興建進行詳細研究同埋提交建議書。

2007年12月2號九廣鐵路公司同埋地鐵有限公司(而家叫香港鐵路有限公司)正式租賃式合併,所有路線、相關設施同埋車輛,租畀港鐵公司營運。九廣鐵路公司由成立開始計,過咗25年後唔再營運鐵路。

合併前運輸業務[編輯]

本地客運服務[編輯]

截至2007年12月2號前,九廣鐵路公司共營運4條本地鐵路系統:

東鐵[編輯]

内文:東鐵綫

東鐵來回尖東羅湖落馬洲,連接九龍南部同埋新界東各區。嗰段係九廣鐵路嘅一部分(由羅湖尖沙咀),原本叫做九廣鐵路(英段)1949年後,嗰段發展本地客運業務,發展成而家嘅規模。南邊總站曾經改去紅磡(1998年之前叫九龍車站),之後再延長去尖沙咀地底嘅尖東站。乘客可以喺九龍塘尖沙咀分別轉地鐵(即而家港鐵觀塘綫荃灣綫2009年西鐵九龍南綫通車之後,東鐵縮咗去紅磡,而尖東站就畀咗西鐵

現時,東鐵已成為港鐵系統路綫之一,並改叫東鐵綫

輕鐵[編輯]

1988年啟用嘅輕鐵,全名九廣輕鐵 或者輕便鐵路,來回屯門同埋元朗之間,貫通成個新界西北區,係區內主要交通工具。其中屯門區內嘅路段最多,可以去到新市鎮入面大部分地方;元朗方面就有一條沿青山公路、一條伸延天水圍同埋圍住天水圍嘅路段。

西鐵啟用之後,輕鐵嘅主要任務由區內運輸改做接駁西鐵,但係喺區內運輸嘅地位並冇減退。

而家,輕鐵已成為港鐵系統之一。

西鐵[編輯]

内文:西鐵綫

西鐵係九廣鐵路公司第一條自己起嘅重鐵線,喺2003年12月20號啟用,由深水埗區南昌站開始,經過葵青區(但冇站)同埋荃灣區海邊(荃灣西站),連接新界西北嘅元朗區屯門區,長30.5公里。第一期有9個車站,當中有6個轉車站畀人轉地鐵輕鐵。除咗荃灣西站係完全起喺地底之外,所有車站都起喺地面或者高架橋之上。第二期嘅九龍南綫2009年通車之後,西鐵向南延至尖東站,重駁到紅磡站

而家,西鐵已成為港鐵系統路綫之一,並改叫西鐵綫

馬鐵[編輯]

内文:馬鞍山綫

全名馬鞍山鐵路嘅馬鐵,係東鐵系統嘅支線。既係沙田區內新嘅運輸系統,亦大大方便沿線乘客經東鐵九龍羅湖馬鐵2001年2月12號開始起,2004年12月21號正式啟用,由沙田區嘅大圍開始,經過喺城門河東面嘅乙明邨同埋博康邨等公共屋邨、威爾斯親王醫院沙田第一城、石門工業區,最後入馬鞍山新市鎮,以烏溪沙做終點站,貫通沙田城門河東岸同埋馬鞍山新市鎮。全長11.4公里,全程行車時間16分鐘。沿線總共有9個車站,當中喺大圍站可以轉東鐵,係唯一嘅轉綫站。馬鐵大部分路段都係以高架橋起,只係得中間一小部分係起喺大老山公路中央分隔帶嘅地面上面。

兩鐵合併之後,馬鞍山鐵路成為港鐵系統路綫之一,並改叫馬鞍山綫

2020年2月14號,隨住沙田至中環綫(第一期)大圍至啟德段啟用,馬鞍山綫延伸至顯徑鑽石山及啟德站,並改名做「屯馬綫一期」。馬鞍山綫嘅乘客終於可以唔使轉車直出九龍,而且可以喺鑽石山站轉乘觀塘綫

城際客運服務[編輯]

城際客運服務曾經係九廣鐵路公司最重要嘅服務之一,而且係當年起九廣鐵路嘅主要原因。但係東鐵嘅本地客運大幅擴張,令直通車無論喺增加班次或縮短行車時間上都遇到困難,可能要等廣深港高速鐵路通車先至有改善。目前總共有三條直通車路線,喺香港境內都沿東鐵嘅路線行走,分別係每日12班嘅粵港直通車(廣東線)、每兩日一班嘅京九直通車(北京線)同埋滬九直通車(上海線),並由港鐵負責營運。城際客運服務

貨運[編輯]

九廣鐵路喺紅磡站貨櫃

鐵路貨運曾經係九廣鐵路公司另一重要服務。九廣鐵路公司曾經係唯一同中國大陸有鐵路貨運聯繫嘅香港公司,主要業務有貨櫃運輸、一般貨運(平板拖卡)同埋牲口運輸,來往遠至烏魯木齊嘅大陸城市。喺上水屠房啟用之前,載住生嘅列車(俗稱“豬車”)經過車站嗰時留低嘅氣味係唔少人嘅童年回憶。現時,貨運服務已改由港鐵負責經營。貨運服務

來往中國大陸嘅平郵郵件亦係由位於紅磡貨場嘅國際郵件中心處理。

接駁巴士[編輯]

内文:港鐵巴士

九廣鐵路公司嚮1985年開始提供巴士服務,叫做接駁巴士。本來九鐵係為咗方便離東鐵車站比較遠嘅乘客去鐵路車站轉車,而設立免費接駁巴士往返各主要屋苑同埋東鐵車站。之後起輕鐵嗰時,政府喺新界西北劃定輕鐵專區,唔畀其他公司經營區內巴士路線,九鐵就開始喺嗰區經營接駁輕鐵(而家亦包括西鐵)嘅接駁巴士路線。

接駁巴士用綜合收費系統,鐵路乘客用八達通轉接駁巴士或者搭接駁巴士轉鐵路,車費平啲嗰一程可獲免費優惠。若果乘客只係搭接駁巴士而唔搭東鐵西鐵輕鐵,就要畀巴士車費。

目前,九鐵接駁巴士已交畀港鐵負責營運,並改名做港鐵巴士同埋港鐵接駁巴士

非運輸業務[編輯]

九廣鐵路公司亦有經營一啲非運輸業務,但呢啲都同運輸有一定關係。

物業發展[編輯]

九廣鐵路公司發展幾個住宅、商場同埋辦公室物業,全部都係鐵路沿線地點,好似車站同埋維修中心嘅上蓋或附近。呢啲包括:

除咗發展物業之外,車站內亦經營商店,帶嚟租金收益。

其他業務[編輯]

廣告業務包括喺車站同車廂內各式各樣嘅廣告,喺燈箱同車窗等位置。

商務展覽係一項規模較細嘅業務。商品或服務喺車站入面展示或者推廣。

新聞直線係喺2005年8月推出嘅新服務,喺所有重鐵(東鐵、西鐵同馬鐵)車廂內播放包括新聞資訊、鐵路安全訊息同廣告嘅連續片段,等乘客喺旅程中得到最新資訊,同時帶嚟廣告收益。

未來鐵路發展[編輯]

沙田至中環線(沙中線)[編輯]

沙田至中環線,係香港九廣鐵路公司計劃緊嘅路線之一。計劃緊嘅路線分為三大部份:大圍至鑽石山鐵路線、東九龍線同埋第四條過海鐵路。成個計劃由沙田區嘅大圍開始,穿過大老山去到鑽石山,再沿東九龍線前往啟德新發展區、土瓜灣並去到紅磡。同東鐵交匯之後,再經由第四條過海鐵路去到香港島嘅銅鑼灣,最後以中環為終點站。全長17.1公里,將會起10個車站。起好之後,將會係九鐵第一次有載客列車駛去香港島,同地鐵作正面競爭。不過,由於兩鐵合併,本線將於不久將來作出重大變化,並磨合兩鐵嘅現有系統再作規劃。

九鐵未投得沙中線經營權之前,其實早喺20世紀中提出類似嘅地鐵路線,東九龍綫(沙田綫),一條已經拖延咗半世紀嘅路線。東九龍綫同沙中線相似嘅係,喺沙中線三大部份之一,早已經包括舊有東九龍綫嘅部份。

其他鐵路項目[編輯]

港口鐵路線係一條貨運鐵路,計劃喺葵涌貨櫃碼頭嘅港口鐵路貨運站出發,經東鐵直達內地。呢條鐵路屬九鐵旗下鐵路貨運發展策略嘅一部份,九鐵現正進行相關嘅工程同埋市務研究工作,並同內地合作單位積極商討,就可能喺深圳以北嘅平湖發展貨運物流中心進行可行性研究。

北環線係喺新界北面,將東鐵同埋西鐵嘅北段加以連接,解決新界東北同西北地區對鐵路服務嘅需求,同時亦將西鐵同埋落馬洲連接,方便過境旅客。

廣深港高速鐵路香港段將來會由西九龍站,經「專用通道」連接位於深圳嘅福田站。總站香港西九龍站將會起喺現時港鐵機場快綫九龍站嘅東面,設有8條路軌同埋4個月台。到時由西九龍福田,只需13分鐘;由香港西九龍廣州南,需要大概48分鐘。[5]

企業管治[編輯]

外界對九鐵管理局同佢高層嘅非議[編輯]

雖然九鐵管理局成員由香港特別行政區行政長官委任,但歷來部份九鐵管理局成員嘅處事手法,受到外界非議。

「退休高官俱樂部」[編輯]

自從香港政府喺1996年委任楊啟彥擔任九鐵管理局主席兼行政總裁以嚟,九鐵就開始俾外界冠上「退休高官俱樂部」嘅惡名,噉係因為嗰時九鐵主席同埋行政總裁係由同一人出任,搞到管理局主席有絕對控制權。嗰時嘅九鐵管理局主席楊啟彥,一上任就安排詹伯樂梁國新丘李賜恩呢啲前香港政府官員加入九鐵公司,而管理局主席更可以自行釐訂薪酬。另外,當九鐵公司要求加價嗰時,有傳媒揭發九鐵管理局用公司名,獨享3艘遊艇、8架名貴私家車、40幾個公司俱樂部會籍等奢侈但係非必要嘅福利,受到外界非議。另外,九鐵亦喺亞洲電視手上羅致資深新聞人潘錦全出任東鐵社區及公眾事務總監。

政府有感嗰啲問題日漸嚴重,特別喺落馬洲支線事件中,環境保護署環境評估報告否決九鐵起鐵路貫穿塱原濕地,楊啟彥公開表示「失望」,並表示可能要重新考慮其他東鐵支線(馬鐵同埋尖東站)嘅落成日期,令人感到楊啟彥視自己為「老闆」,九鐵公司運作如同「獨立王國」。因此,政府喺2001年修訂《九廣鐵路公司條例》,將管理局主席同埋行政總裁職位分拆,以加強政府對九鐵公司嘅管治,並喺同年12月委任田北辰做九鐵主席,而楊啟彥淨係留任行政總裁。

西門子事件[編輯]

九廣西鐵一份 2 億 8,700 萬元嘅電訊系統工程因承建商西門子公司未能按進度進行,九鐵公司被揭發唔單止冇索償,反而額外畀 1 億元承建商去延續工程,希望唔使搞到西鐵遲咗通車。[6]

車底機件裂縫問題[編輯]

2006年人事變動事件[編輯]


3月10日,九鐵公司署理行政總裁黎文熹連同全部5名總監同19名總經理,去信管理局,指管理局主席田北辰喺九鐵公司裏面干預過多、要求透明度太高同埋過份問責,形成一種「責難文化」,並喺兩日內收集到八成員工逾3000個簽名。

3月11日,行政長官曾蔭權田北辰會面。喺3月12日下晝,田北辰召開記者會,宣佈辭職,但生效日期由曾蔭權決定。

3月14日,九鐵管理局開咗特別會議搞單嘢,田北辰黎文熹都有出席。嗰日下晝2點,以九鐵市務總經理黎啟憲為首嘅20個九鐵高層人員集體請假,去位於中環嘅九鐵總部召開特別會議嘅會議室旁邊間房召開記者會,聲援黎文熹同埋支持田北辰辭職。會後環境運輸及工務局局長廖秀冬博士宣報會議取得有建設性嘅進展。

3月15日曾蔭權廖秀冬田北辰黎文熹政府總部召開記者會,宣佈田北辰將留任管理局主席,田黎兩人更四手相握以示和好。曾蔭權並指出九鐵出現嚴重紀律問題,故此佢已經下令九鐵管理局處理事件。

3月16日,九鐵公司宣佈黎啟憲被解,其餘19名請假出席記者會嘅管理層獲發警告信,如果一年內再犯就炒魷。同時黎文熹宣佈為九鐵公司出現嚴重紀律問題負責而辭去署理行政總裁一職,由做過新鐵路工程高級總監嘅詹伯樂出任署理行政總裁,而喺1986年加入教育電視至1993年離職嘅其中一人同埋潘錦全就被停薪留職。

兩鐵合併[編輯]

内文:兩鐵合併

為提高香港鐵路運輸系統嘅效率,政府計畫將九鐵同地鐵合併。2004年3月,政府請咗兩間公司傾下合併計劃。

2006年4月11日,行政長官曾蔭權宣布,行政會議通過地鐵同埋九廣鐵路嘅合併方案。政府落實合併方案,初步準備由地鐵租九鐵資產嘅模式,全權負責合併後嘅日常營運工作。

方案聲稱合併後可以提高鐵路網絡嘅效率,減少服務重疊;兩鐵合併後第一日(2007年12月2日)即時減價,中途車費減幅最少5%,長途車費減幅最少達1成,預計每日有大概280萬人次受惠。

《兩鐵合併條例》授權九鐵公司授予地鐵公司服務經營權,擴大地鐵公司專營權嘅適用範圍,以營運九鐵公司嘅運輸服務。

兩鐵合併方案包括兩個主要部分:

第一部分係服務經營權協議,呢個協議授予港鐵公司用九鐵公司鐵路資產嘅權利,令港鐵公司可以喺初步議定嘅50年期(可以延長)內,經營現有九鐵公司嘅路線、將來落成後新線,以及其他同運輸有關嘅業務,例如喺西北鐵路服務範圍入面經營嘅巴士服務。兩鐵合併後,港鐵公司每年要向九鐵公司畀7.5億元定額費用,以及喺36個月之後,每年再根據九鐵公司鐵路資產所衍生嘅收入,按特定嘅比率畀非定額款項。

第二部分係買賣協議,協議訂明港鐵公司要喺2007年12月2日以77.9億元收購九鐵公司多項物業同佢嘅物業管理附屬公司,另外要畀42.5億元,作為取得服務經營權同埋收購九鐵公司某啲短期鐵路資產(例如物料同埋備用品)嘅費用。

參攷[編輯]

  1. 公司編號:SO9000051嘅公司資料(九廣鐵路公司)—公司註冊處綜合資訊系統 互聯網檔案館歸檔,歸檔日期2017年6月23號,.
  2. 第90頁[失咗效嘅鏈]
  3. 2008年5月15日明報 九鐵剩兩員工 詹伯樂加薪17%. 原著喺2010年12月18日歸檔. 喺2010年8月29日搵到.
  4. 2008年九鐵年報,第7頁
  5. http://news.tvb.com/630pm/2007/0802/index.html 互聯網檔案館歸檔,歸檔日期2021年3月20號,. 無綫電視六點半新聞報道(2007年8月2日)
  6. www.legco.gov.hk/yr05-06/chinese/sec/library/0506fs10c.pdf