乾清宮
.jpg)
乾清宮位於北京紫禁城，喺大明永樂十八年（1420年）建成，大清嘉慶三年（1798年）重建，明、清年間曾經係唔少皇帝居住、處理政務同停靈嘅地方；宮內大廳高掛一幅「正大光明」匾，匾後係秘藏傳位詔書，令佢成為紫禁城內家喻戶曉嘅宮室。
介紹
[編輯]
乾清宮係內廷正殿，面寬9間，進深5間，高20米，重檐歇山頂。乾清宮嘅尺度比太和殿一組細咗唔少，但係又比較接近人體比例尺度，可增加生活氣氛。明朝時係皇帝同埋皇后嘅寢宮，皇后喺呢度同住。
明朝時，乾清宮有暖閣9間，分上、下兩層，共設床27張，畀後妃作進御之用。由於室、床眾多，皇帝每晚就寢嘅地方幾乎冇人知道，以防不測。雖然皇帝居住喺迷樓式嘅宮殿內，而且外面守備森嚴，但係仍然唔可以高枕無憂。據記載，嘉靖年間發生壬寅宮變後，世宗移居西苑，唔敢返去乾清宮住。萬曆皇帝嘅鄭貴妃為咗爭皇太后鬧出嘅「紅丸案」、泰昌妃李選侍爭做皇后而移居仁壽殿嘅移宮案，都發生喺乾清宮[1]。
清朝入關之後，乾清宮重修。雍正皇帝即位後，寢宮去到養心殿，乾清宮做咗舉行內廷典禮活動同埋引見官員、接見外國使臣嘅場所。光緒三十二年（1906年），光緒皇帝喺乾清宮接受奧、法兩國使臣嘅國書。
乾清宮重係清代皇帝死後停柩嘅地方，有「壽終正寢」之意。順治皇帝死喺養心殿，康熙皇帝死喺暢春園，雍正皇帝死喺圓明園，咸豐皇帝死喺避暑山莊，靈柩都被停放喺乾清宮，按照儀式祭奠後，轉至景山內嘅觀德殿，最後正式出殯，葬入皇陵。
乾清宮同坤寧宮分別係傳統意義上嘅帝、后寢宮。乾、坤分別為《周易》中嘅卦名，乾為天，坤為地。
乾清宮前左右有日精門，月華門，寓有「乾坤日月明，四海皆生平」嘅意思。
清朝皇帝喺乾清宮舉行兩次千叟宴。第一次喺康熙六十一年（1722年），第二次喺乾隆五十年（1785年）。第二次規模最大，有三千幾位六十歲以上嘅老人參加咗乾隆皇帝（七十五歲）舉辦嘅宴會，包括大臣、官吏、軍士、民人、工匠等等。宴會嗰陣，乾隆皇帝召集一品大臣同埋年齡九十歲以上嘅老人到御座前賜酒，並賜予每人拐杖以及其他禮品。宴會上，眾人聯句賦詩三千四百幾首，以顯示「普天同慶，共享昇平」，起到安撫民心嘅作用。
乾清宮有眾多聯匾，以及一幅對聯，係康熙手書：
- 表正萬邦，慎厥身修思永；
- 弘敷五典，無輕民事惟難。
上聯意思：皇帝係「萬邦」嘅表率，需謹慎修身，一心要持之以恆。下聯意思：要弘大五典五常，維繫倫理觀念，唔好輕率處理民眾力役嘅野，要慎重考慮其中嘅艱難。
正大光明匾
[編輯]乾清宮御座上方有一個匾，叫做正大光明匾。匾上「正大光明」四個字係順治皇帝手書。雍正皇帝創立秘密建儲制之後，建儲匣擺係正大光明匾後面。匣內藏咗皇帝選定並御筆親書嘅皇位繼承人個名，皇帝死咗之後，取下匣子由秘密指定嘅皇子即位。