讓愛與和平佔領中環

  提示：呢篇文講嘅唔係遮打革命。

9月29號中環東面嘅集會情況

讓愛與和平佔領中環（英文：Occupy Central with Love and Peace，解做「畀愛同和平霸住中環」，通稱和平佔中），亦叫佔領中環、佔中，係香港大學法律學者戴耀廷教授計劃響2014年搞嘅活動，主題係爭取2017年香港可以落實真普選。呢場活動經已響2014年9月28號正式開波，初頭集中響添馬艦政府總部同金鐘一帶，隨住警方用武力鎮壓，令活動由嗰晚開始蔓延到香港其他地方，變成「遮打革命」。

人物

佔領中環記者會

積極推動佔領中環嘅戴耀廷、陳健民同朱耀明被人叫做「佔中三子」。

經過

警方施放催淚彈，嘗試驅散參加集會嘅市民

2014年7月2號凌晨，學聯同學民思潮已經喺中環遮打道搞咗場預演佔中，警方用咗5個幾鐘清場，拉咗511人。

8月31號，全國人民代表大會常務委員會宣佈香港政改框架，為特首提名加入好多限制，戴耀廷就決定會啟動佔領中環。9月中，佢哋申請10月1號中華人民共和國國慶嗰日由維園遊行到中環遮打道，再響遮打道集會，但康文署唔畀維園個場佢哋出發，所以惟有取消遊行，只申請遮打道集會，但警方一直都拖住未批。

9月22號開始，學聯帶頭搞罷課，一大班學生亦響添馬艦政府總部出面集會。26號晚，百幾個學生突破防線入咗政總東翼前地（「公民廣場」），到27號警方一度清場，重拉咗幾個核心人物，搞到越嚟越多人走去政府總部聲援。28號凌晨1點幾，戴耀廷見既然有好多人集會，就索性宣佈佔領中環行動正式開始。有佔中支持者贊成提早佔中，但亦有參加集會嘅學生覺得畀人騎劫咗。

活動有過萬人參加，逼滿嗮政府總部附近嘅車路，到挨晚警方開始施放胡椒噴霧同催淚彈。嗰晚開始，活動蔓延到中環東面、銅鑼灣，同對面海嘅旺角，30號晚更加蔓延到尖沙嘴。

到呢個地步，活動已經發展到同佔領中環原定計劃好唔同，加上活動已經唔係由「佔中三子」做領導，所以之後嘅發展，畀好多人叫做雨遮革命。至於原定嘅遮打道集會，最後都搞唔成。

爭議

陳志豪喺親建制派網站大公網發表評論，指佔領中環唔符合「公民抗命」嘅基本道德準則。佢認為公民抗命應該係：有可能會增加執政者嘅管治成本，但係唔會損害無關人士嘅利益。而佔領中環會損害香港人利益。評論人陳雲就喺facebook寫話，佔領中環唔係投向中央嘅「外爆」，而係投向香港自己嘅「內爆」，並且認為民主黨同蘋果日報立場「怪異」「神奇」。

約翰·羅斯，前倫敦市長肎·利文斯通嘅經濟顧問，批評一啲西方媒體嘅報導太虛偽。佢講：「我唔方便評論香港2017年特首普選問題，事關我始終唔係中國人。但西方媒體就香港問題嘅報導太虛偽。喺英國殖民統治香港嘅150年間，英國從未允許香港人選舉香港總督，美國亦冇因此抗議英國。現時中國為香港設計嘅體系遠比英國民主得多，但美國就強烈抗議中國政府。」

藍絲帶團體

内文：藍絲帶

• 幫幫香港出聲行動
• 保普選反佔中大聯盟