偷天情緣

出自維基百科,自由嘅百科全書
偷天情緣 DVD,由哥倫比亞電影公司發行。

偷天情緣》(Groundhog Day)係美國哥倫比亞公司喺1993年出品嘅英語電影之一,屬於奇幻式嘅愛情喜劇。

電影資料[編輯]

制作[編輯]

出品機構:

  • 哥倫比亞電影公司 (Columbia Pictures / Tristar Pictures)

導演:Harold Ramis

編劇:Danny Rubin

主演:標.梅利(Bill Murray)、安迪.麥杜維(Andie Macdowell)、基斯.伊利渥(Chris Elliott)……等。

簡介[編輯]

劇情講述一個乞人憎嘅電視天氣報導員,因一次去到第二個地方採訪時發生嘅奇遇,令到佢嘅人生觀點從此完全改變。

劇情大綱[編輯]

有一個叫做菲爾(Phil)嘅電視天氣報導員,佢為人自私自大,成日覺得自己懷才不遇,而且又口不擇言,所以佢身邊嘅人都覺得佢好乞人憎。

有一次佢被派去賓夕凡尼亞州(Pennsylvania)嘅一個小鎮普蘇塔尼(Punxsutawney)採訪土撥鼠節;呢個鎮有個習俗,就係每年二月二日冬天就嚟過嘅時候,鎮民都會喺呢日聚集埋一齊,睇吓一隻又係叫做菲爾(Phil)嘅土撥鼠會唔會出嚟「講嘢」,如果佢會叫,即係冬天好快過去,而春暖將會降臨,相反如果佢唔叫,即係冷天可能重會持續一段時間。報導員菲爾聯同美麗女導演麗塔(Rita)同埋攝影師拉利(Larry)三個人一齊嚟到呢個小鎮,喺菲爾下塌一間旅館之後,佢嘅奇幻旅程就正式開始。

第二日,即係二月二日土撥鼠節嘅正日。呢一朝早,菲爾床頭嘅收音機鬧鐘準時六點響起,輕鬆嘅民謠帶住菲爾去梳洗換衫,然後開始一日嘅工作;當菲爾同女導演三人做晒嘢之後就諗住走,點知因為天氣報告話外圍天氣開始變壞,離開普蘇塔尼嘅路已經俾大雪封咗,於是菲爾就被迫要留多一晚。到第二朝瞓醒,個鬧鐘搭正六點響起,而收音機裏面亦響起同一首民謠,菲爾發現電台主持講嘅嘢同前一日一樣,佢以為電台播返前一日嘅錄音帶,不過佢都覺得奇怪,於是伸個頭望出窗口,見到又有人流向住土撥鼠節嘅會場進發。佢出門口之後,所遇到嘅人同埋事都曾經發生過,土撥鼠節個會場又係有好多人;菲爾見到女導演同攝影師,點知佢哋又係講返同一樣嘅開場白,菲爾喺報導緊嘅時候越諗越亂,於是劈低支咪走咗……自此之後,菲爾週而復始咁過住同一日,一到六點就紥醒,一樣都係土撥鼠節,而佢跟本唔知點先可以脫離。有一個土撥鼠節,菲爾終於發咗癲,於是諗盡方法尋死,但係佢呢頭死,嗰頭紥醒又係朝頭早六點鬧鐘響起嘅時候,又係播住同一首民謠,又係土撥鼠節。

期間菲爾有啲鍾意美麗女導演麗塔,於是發奇想,想喺一日之內令女導演對自己改觀,搵機會同佢上床;喺每一日都係同一日嘅情形之下,菲爾利用無限嘅時間一啲啲咁去了解麗塔,但係始終都冇辦法取得麗塔嘅完全信任,就算有一次麗塔俾菲爾說服陪佢喺間房度等天光,到第二朝床上一樣剩返菲爾一個,一樣係回復返土撥鼠節。最後菲爾明白到,與其冇方法要人鍾意自己,不如令自己嘅每一個同一日都過得充實同埋有意義,等到萬一可以脫離框框會有個新嘅未來,於是佢利用無限嘅時間去學咗好多唔同嘅手藝同自己增值,同埋因為佢已經好熟咁知道每日喺邊度會有咩事發生,佢亦會積極咁週圍去幫嗰啲要人幫嘅人;不過當中都有個小遺憾,就係佢唔可以阻止其他人生命嘅終結。

喺某一個土撥鼠節,菲爾感動人心嘅現場報導,令到在場所有專注聽佢講嘢嘅人都大拍手掌;而喺呢日嘅夜晚,麗塔去到鎮上開早春慶祝會嘅社區會堂,只見到菲爾喺舞檯度彈住一手輕快兼且熟練嘅鋼琴,之後人人都爭住向佢打招呼,成為咗席上最閃耀嘅人;原來一日嚟佢幫過幾個女人架車換,所以幾個女人都走埋嚟多謝佢;佢幫過一個食嘢啃親嘅肥佬吐返粒核出嚟,於是兩公婆又走嚟多謝佢;佢鼓勵咗一對心大心細想結婚但又唔放心嘅情人,於是呢對準新人又嚟多謝佢……。到到慶祝會嘅壓軸環節,就係由鎮上面嘅女人出錢競投王老五共度良宵嘅慈善項目,菲爾一上檯就個個爭住開價要投佢,而麗塔唔知點解之下就傾盡成副身家競投,終於俾佢投到菲爾。

兩個人離開咗社區會堂,菲爾用好紳士嘅態度去對待麗塔,陪佢傾計,重喺條街度整咗個好靚嘅冰雕頭像送畀佢,令到麗塔大為感動,重接受咗菲爾嘅示愛,不過菲爾只係發乎情止乎禮,冇再進一步向麗塔要求;當晚麗塔去到菲爾嘅宿舍,兩個人喺張床度傾傾吓大家就瞓著咗……

六點鐘,收音機鬧鐘又再響起,菲爾慢慢掰開雙眼,心諗又要預備土撥鼠節嘅一日,點知一隻懶洋洋嘅手打橫撳熄咗個鬧鐘,菲爾唔敢相信自己眼睛,但係呢隻手已經暖暖咁抱住菲爾,手嘅主人就係麗塔;菲爾彈起身伸個頭望出窗,見到出面陽光襯住一片白濛濛嘅雪地,街上面亦靜英英咁冇晒湧去睇熱鬧嘅人……菲爾已經跳出時間嘅循環,土撥鼠節終於過去!

菲爾嘅人生觀完全改變,而有情人亦都終成眷屬。

主要出場人物同埋演出者[編輯]

  • 菲爾:標.梅利(Bill Murray)
  • 女導演麗塔:安迪.麥杜維(Andie Macdowell)
  • 攝影師:基斯.伊利渥(Chris Elliott)