光污染

出自維基百科,自由嘅百科全書
大量霓虹燈亦都係造成光污染嘅原因之一

光污染粵拼gwong1 wu1 jim5)又叫做光害gwong1 hoi6),係一種環境污染,係濫用室外照明造成,例如街燈、廣告招牌同大廈外牆燈光佈置等,將光線直接或間接照射上天空,大氣中嘅雲、霧、懸浮粒子同污染物將光線散射開,導致夜空被照光,因此量度夜空光度就可以反映光污染嘅情況。光污染唔單止令我哋睇唔見好靚嘅星空,更反映出我哋正喺度破壞大自然同埋人類嘅生活環境、浪費能源。

成因[編輯]

  • 街燈:街燈,會對居民造成光滋擾。
  • 廣告招牌:市區有大量廣告招牌,多數用強光照射嘅燈光效果展示。
  • 汽車車頭燈:車頭燈由朝到晚都要開住。
  • 商舖燈光:商舖用強力燈光照明,搞到街道附近嘅居民無覺好瞓。

影響[編輯]

  • 造成能源浪費:無論任何形式嘅光污染都一定要用電力,大量消耗電力唔止造成浪費,同時增加燃燒化石能源,造成空氣污染,導致更嚴重嘅熱島效應
  • 滋擾市民生活:研究指出大量嘅光污染對市民眼睛造成傷害,影響睡眠質素同影響情緒。減少光污染令市民生活更加舒適,令到身心健康,提升市民生活質素,亦減少因為強光而導致交通意外嘅機會,保障市民安全。
  • 損害市民健康:舖頭通常會安裝好光嘅燈來吸引客人,例如珠寶店同手錶零售舖頭,持久同強烈嘅燈光損害員工嘅視力健康(光污染係引致青少年出現近視嘅重要成因)。研究顯示夜晚過度暴露喺燈光之下重會提高女性患乳癌嘅機會。
  • 影響生態平衡:候鳥會因為光污染影響而迷失方向;影響咗動物嘅自然生活規律。另外一般昆蟲有趨光嘅特性,過量燈光導致夜行動物容易意外撞向發光廣告牌。美國鳥類專家估計每年有超過400萬隻候鳥因撞到廣告燈而死亡。
  • 影響天文研究:喺無光污染嘅情況下,夜晚嘅天空可以睇到光度6等嘅星星(科學家將肉眼可以睇到嘅星星進行分類,1等係最光,6等係最暗),而喺大城市度,光污染特別嚴重,淨係睇到2等嘅星星。

可行解決措施[編輯]

  • 規定燈光使用時限,例如夜晚11點後強制關閉冇必要嘅燈光。
  • 建立客觀嘅燈光亮度表,限制唔同時間嘅燈光亮度。
  • 加強防止燈光滋擾措施,例如限制燈光投射角度同加設燈罩。
  • 長遠改善城市規劃,分隔商業同住宅區。
  • 加強商界環保教育,鼓勵支持環保政策。
  • 定期公佈唔同企業嘅光污染調查數據等。

相關嘅文[編輯]

出面網頁[編輯]