六七暴動

出自維基百科,自由嘅百科全書
跳去: 定向搵嘢

六七暴動,又叫做六七左派工會暴動五月風暴,嗰時有份搞嘅人就話係「反英抗暴」,1967年5月6號香港爆發,由於佢係喺六七年發生嘅一連串暴動事件,所以啲人就叫呢單嘢做「六七暴動」。

六七暴動香港歷史上最大鑊嘅社會動亂之一,死亡人數第二多。事件由最初嘅罷工示威,發展到後期搞暗殺、四圍放「菠蘿」1(炸彈)。而原因係多方面,除咗當時大陸文革背景之外,社會上亦有好多唔同嘅矛盾,例如港英政府長期壓迫香港嘅親共左派、澳門一二三事件、香港天星小輪加價事件,都係引發六七暴動嘅導火線。

呢次暴動令香港政府更加注意香港福利政策。而香港親共左派因暴行失去民心,勢力大減,要到1997年後才有所轉變。

背景[編輯]

六七暴動發生喺大陸文革時期,啱啱嗰陣就係一啲造反派2全面奪權,結果令黨政機關全面癱瘓,令喺香港嘅左派無咗指導,而呢班人嘅極左思潮又去收唔到科。再加上當年嘅港共,即香港左派人士一早已經成日畀港英政府打壓,形成港共一路都好唔鐘意港英政府,當時英國政府因為響應美國嘅「圍堵中國」政策,所以一直採取敵視中國政策,當時喺香港直情唔畀掛五星旗,而所有左派活動都會以政治性理由而受到打壓,係咁嘅氣氛之下令香港嘅左派形成對港英政府仇恨嘅心理,澳門左派一二三事件奪權成功,就香港左派受鼓舞要「反英抗暴」。

澳門一二三事件[編輯]

內文: 一二三事件

一二三事件係澳門歷史上一件最大鑊而且影響深遠嘅社會動亂。最初喺氹仔呢個地方因為想擴建小學,計劃交咗畀澳門計劃繁榮委員會批,但係一路都無回應。當時氹仔有好多炮竹廠,呢啲廠好多都係由有左派背景嘅人經營,而係擴建小學呢件事又係由澳門工聯會負責同政府傾,但係因為一啲貪污問題,一直疏通唔到,最後決定夾硬起,於是澳葡政府就派差人阻止,結果變成衝突,在場嘅工人、街坊同教師都畀差佬打,有52人受傷,其中有11人重傷,同時拘捕咗14個人。

街坊派代表同警方交涉,但無人理,最後發動去澳督府請願,澳葡政府派差人阻止,喺推撞間演變成衝突,差人見人就打,而警察打人傳到成個澳門都知,好多人出嚟抗議澳門政府,而警方採取暴力鎮壓手段大開殺戒,死咗好多人,最後演變成暴動。

不過澳葡政府最後都係搞唔掂,重曾經諗住將澳門提早交返畀中國,最後由澳門總督簽署認罪書,事件先算平息。

經過呢單嘢之後,澳門嘅左派勢力開始擴張,表面上澳門仍然係葡萄牙殖民地,但實際上已經畀大陸控制咗。咁搞到葡萄牙人無心管治,淪為黑社會同左派當道嘅局面。

嗰時好多左派認為呢單嘢係喺毛澤東思想嘅光輝領導之下一次勝利,香港嘅左派於是有樣學樣,喺士打馬力加輪事件天星小輪加價事件新蒲崗香港人造塑膠花廠工潮等激發之下,以一二三事件做例,發動「反英抗暴」運動,以武力對抗英人治下嘅香港政府。而香港政府亦以一二三事件為例,唔想好似澳門政府咁無咗個主權,於是決定以強硬手段對待之後發生嘅一連串「反英抗暴」運動。

經過[編輯]

前奏工潮[編輯]

1967年4月,中央的士公司同上海的士公司,部司機因薪金而有勞資糾紛,實行罷工。的士公司停業,將的士賣畀無份罷工嘅司機。4月11號,駛晒去樂道培僑中學側,裏面嘅親共左派師生亦有參與呢同之後嘅暴動。4月19號,工友黎福順拎遺散費畀左派人士打傷。呢次的士風波差唔多時間,青洲英坭廠香港塑膠花廠都有左翼工人搞大工潮。

4月6號,紅磡青洲英坭公司。一個工程師被指打傷一工人,畀廿個到工人追打。廠方叫話畀人打傷嘅工人驗傷,工人唔肯。5月1號,班工人向廠方要求多項條件。下晝,另一個工程師駕貨車離廠,畀工阻住,兼且畀人擲石受傷。咁搞間廠生產有困難,廠方1967年5月4號閂廠。之後廠外有二百工人靜坐,亦有左派明星參與。

1967年5月,香港人造花廠有勞資糾紛。5月5號上晝,新蒲崗大有街分廠出貨上船嗰陣,畀親共工人制止出貨,記者影相畀人圍,要警方防暴隊保護離場。左派份子聚集膠花廠前,叫口號,引到唔少人來睇熱鬧,交通阻塞,警車來開路都畀人截車。

5月6號下晝4點,工人又結集。到場嗰陣,阻撓出貨工人指廠方總管孔標打傷佢,警方叫佢去警署報案。警方叫佢哋唔好再阻人出貨,因為咁係唔合法,而且佢哋係非法集會,要佢哋散去。不過工人繼續,同警方衝突,警方召防暴隊來拉人,廿一人被捕,工會代表前往警署亦被扣押。一人認罪輕判罰一百蚊,其餘廿名唔認罪押後審訊。呢啲後尾有8位判坐監。

5月7日,工人、工聯會代表同埋其他支持者上街集會示威。示威者仿效中國大陸文革做法,手持《毛主席語錄》,高喊中國共產黨口號。喺工廠外面貼晒大字報標語,云血債血償、造反有理等。左派工人又阻出貨,同兩名出貨工人互毆。警方施放催淚彈木彈驅散示威者,拘捕127人。

暴亂開始[編輯]

5月11號,新蒲崗塑膠花廠工潮演變成暴動,工人聚集喺新蒲崗街道外便,引來成千人聚集,同警察對峙,又用石頭玻璃樽襲擊警員。警察開槍鎮壓。暴徒到處阻塞交通,截停巴士,擲石燒車燒雜物,整爛交通標誌。當局鑑於事態嚴重,於當晚宣佈東九龍實施宵禁,所有後備警員取消休假候命,事件中有百多人被捕,並造成兩人受傷。

5月12號,暴亂持續,新蒲崗對面東頭村有燒車,燒巴士,擲石。警察拉咗106人,有14人傷,警察遇襲受傷12人,徒置大厦發現有一青年畀石塊重擊而死。

5月13號,九龍新蒲崗暴動蔓延至黃大仙東頭村同土瓜灣,大批群眾在街上聚集,暴徒放火燒車,破壞路標。又入去黃大仙徙置區職員宿舍、新區辦事處同埋學校搗亂。當局出動大批英軍同防暴隊鎮壓,派直昇機監視暴動,又將宵禁時間提前至傍晚6時開始。之後北京報紙稱「港英政府行為係民族迫害,鎮壓群眾係野蠻嘅法西斯暴行」,支持「香港市民上街抗暴」。呢日,左派報紙造謠,話香港斷水斷電。謠言話水電工人互罷工,會斷水斷電,結果個個爭住貯水,搶購燃料蠟燭同米糧。因為大多人開水貯水,水壓下降,部份地方無水。不過香港政府出來闢謠,話米糧食夠四個月用,亦增加水壓,謠言始破。

5月14號,新蒲崗只有零星暴亂,暴亂稍息。

北京支持同鬥委會成立[編輯]

5月15號,北京外交部向英國代辦提出抗議,中共提出五項要求:

  1. 立即接受香港中國工人同居民嘅要求。
  2. 停止法西斯措施。
  3. 立即放返拉咗嘅人。
  4. 懲兇、賠償、道歉。
  5. 保證唔會再發生咁嘅事。

北京重發動北京人喺英國駐華代辦門外示威。香港左派報章報導北京支持嘅消息,由左派學校學生喺街頭向路人派發;中國銀行亦喺皇后大道中德輔道中交界嘅中環總行屋頂裝上揚聲器,進行革命宣傳。

左報《大公報》社長費彝民,左方派明星傳奇、石慧兩夫婦,帶頭去到港督府同香港裁判署示威,叫口號同貼大字報。因為有明星坐陣,引起唔少人聚集參加同睇熱鬧。同時間,左派份子亦搞唔少反迫害大會。

5月16號,喺北京支持下,香港親共左派宣佈成立港九各界同胞反對港英迫害鬥爭委員會,簡稱鬥委會,由工聯會理事長楊光出任主任。鬥委會抗議港英政府暴力鎮壓「遏制香港同胞活學活用毛主席著作的群眾運動」,隨即以「反英抗暴」為口號,聯合各親共團體數百人,揸住《毛主席語錄》去港督府示威遊行,又喺港督府門外張貼大字報。港督府唯有閂門,留張檯喺門口收請願信。港府重申要維持法律秩序,限制到港督府請願人數,抗議行動於是轉到中環花園道皇后像廣場一帶。港九各地陸續有集會示威,參加者除工人外,亦有左派學生及其他人等。

新蒲崗膠花廠百幾個工人申請復工。黃大仙又有返巴士行。

膠花廠廿名工人案喺南九龍裁判司署開審,廿名被告無出庭,畀法官下令通緝,事後呢廿位都喺病翼工會被捕入獄。司署外有千名暴徒擲石,一名警司受傷。

因為動亂,搞到物價高漲,證券交易所停市。

九龍暴亂[編輯]

5月17號油蔴地官涌旺角一帶有暴亂,暴徒放火燒車,燒郵政局,南九龍裁判司署一帶同彌敦道都有人聚眾搗亂,銀行畀人擲石。呢日警察平名38人受傷,警察拉咗46暴徒,連日總共拉咗446人,唔少人都曾經有案底。

香港大學學生會議會緊急議決同發聲明反對騷動。

5月18號港督府繼續有大批人請願貼大字報示威,警員同守門只作戎備。

5月19號,港督府情況如舊,青洲英坭廠仍有靜坐。左派份子喺中環皇后像廣場同隔籬高等法院聚集。

5月20號,暴徒喺灣仔銅鑼灣北角搞事,但未搞到暴亂。中環中國銀行總行外面聚集好多人,對面嘅皇后像廣場同高等法院畀人破壞,雪廠街阻塞,記者畀人打。中國銀行後面嘅希爾頓酒店,畀人迫降英美國旗。一個青年喺花園道大嗌打倒左仔,畀暴徒打到重傷,撐入希爾頓酒店至畀警察帶去送院。佢哋之後得到幾多市民慰問。

港島暴亂[編輯]

5月21號,因為警方限去港督府請願人最多21個一組,花園道亦都有防暴隊戒備,所以左派人士只可以結集喺花園道,港督府無再受衝擊。二千滋事者,轉向中環商業中心區擲石,警方發射催淚彈鎮壓。

5月22日,中環騷亂更加嚴重,示威者同警察發生流血衝突,有警員畀人淋腐蝕液體,要跳入水池清洗。暴動工人以及學生以左派報館銀行國貨公司、學校等為據點,出動示威,襲擊警察同埋行緊嘅公共交通。防暴警察到場以催淚彈、警棍等驅散,潛入人羣掩護,之後暴徒又即迅速撤回據點,令警察疲於奔命,當局最後要喺港島北岸實施宵禁,係香港島二戰後首次宵禁。呢日有167人被捕。

唔單止港島,九龍都有騷動。南九龍裁判司署之成為目標,高舉毛語錄叫囂,貼大字報,警方最後要發射催淚彈驅散。

是日暴亂,有說係因中共支持埃及聯軍以色列刺激而起。

謠言同象徵式罷工[編輯]

5月23號政府禁結集、唱歌同叫口號。左翼工會陸續發起罷工。首起係中華巴士左派工人罷工。呢日有謠言話香港停止供水,而港府就出來澄清。118人要上庭受審。

5月24號,政府搜查暴徒,港島交通陸續恢復。九龍巴士部份司機罷工,煤氣工人罷四粒鐘。而新蒲崗膠花廠終於復工。幾百華人社團登報支持港府。受呢次暴動影響,英國外交官喺上海畀紅衞兵打,而北京有人向英國代辦示威。

5月25號牛奶公司左派工人宣佈廿四小時罷工。天星碼頭罷工一粒鐘。到呢日為止有810人拉咗。市民總共捐咗200萬畀警察子弟敎育基金。左報發文威嚇警察。

5月26號,米價因謠言暴漲。港府發圖文,以示暴徒襲擊警察真相。

5月27號,左報大造謠。另一邊共有四百社團支持政府。

5月28號,英美軍艦停留香港水域,而英國派航空母艦堡壘號駐港,以示支持港府。

5月29號油蔴地小輪部份工人罷工三粒鐘,由於係早上六至九點繁忙時間,唔少人返唔到工,而車都大排長龍等過海。當時有人講係受左派工人威脅誘騙先至會停工。中央紗廠靜坐一粒鐘,南豐紗廠靜坐四粒鐘,另有人怠工。中共政府發文講堡壘號來港係有陰謀。 

5月30號,左報造謠香港政府暴亂殺咗二百人,電車停駛同埋無水供應。謠言引致市民搶購筒貯水。另水務局部份工人罷工兩粒鐘,但完全無影響食水。另5月23號刑事毁壞案所示,大陸有人滲透入香港搞事。

6月1號,海事處部份工人,唔滿意英官摵走佢哋前兩日嘅大字報,決定罷工。另海事處油蔴地政府船塢,有工人上晝九點開始禁錮高級官員,到下晝五點先放返。呢日周圍都畀人貼大字報,連沙頭角警署都有,重有班人叫囂。因為天旱關係,政府宣佈每日供水八個鐘。喺澳門商舖迫於左派勢力,義賣支持港共四日。美國領使館下令喺澳門撤僑。

6月3號警察帶人清洗大字報。而喺澳門左派勢力之下,澳門禁咗六隻香港自由報紙入口。而香港]派煽動小販罷市。

6月4號,某啲當時左派嘅銀行,自行撕走大字報。

6月5號咁啱呢日六日戰爭開始,以色列消滅阿聯埃及嘅空軍,消息影響到香港嘅左右派嘅情緒。

6月6號上晝九龍倉有工人罷市半日。而左派到處貼大字報反擊警察大清洗。

6月7號,以色列大敗阿聯十二國聯軍,繼續影響左右派情緒。天星小輪罷工一日,資方決定將有份罷工嘅工人停職停薪。金價經連日暴漲後回落。港府公佈存糧充足,叫市民唔好搶購。而左派分子喺九龍一間戲院非法集會。

6月8號九龍煤氣公司左派工人,貼標語煽動,想放煤氣縱火,又用鐵枝打警察,六十三人被捕。邵氏影片公司,斥左報造謠,公司從無鬥委會。九龍亞皆老街水務局,三百工人罷工,局方革職處分,而食水並無影響。九龍宋皇台工務局,電器機械工場,部份工人罷工,滋事者被拘捕,工人徐田波喺打鬥之中,受傷而死。香]西灣河太古船塢工人鬧事,公司宣佈停工,可復工者,個別通知。渡海小輪工會,支持香港政府,維持交通。

飛行集會[編輯]

暴動期間政府對於各種集會都好敏感,除咗實施宵禁,一見到聚埋成班人都會好緊張,就算想喺街派傳單,都會當係左仔畀警察拉返去審,拉咗返差館重好大機會會畀人毒打3,於是啲左仔將啲傳單放喺啲樂器盒、米缸之類嘅嘢入面,然後去到一啲人多嘅地方,上去大廈嘅天台,然後將啲傳單掟落街,之後極速走佬。

又有人發明咗「飛行集會」,即係每個人扮大家唔識,約咗係一個時間去到某一個地方,然後突然間一齊嗌口號同抗議,同時搵人睇住水,喺警察嚟之前極速四散,有啲似而家嘅快閃黨

宣傳戰[編輯]

左派嘅報紙、銀行、學校日日口誅筆伐,評擊港英政府嘅“暴行”,係咁組織啲人去港督府示威,港英政府為咗抗衡左派嘅宣傳攻勢,於是成立心戰小組,同左派進行宣傳戰。

封左報[編輯]

新蒲崗香港人造塑膠花廠工潮而引發嘅六七暴動,其中一條導火線,係一個十三歲少年陳廣生喺衝突入面死咗,左派報章立即大造文章,話位少年係畀防暴隊毒打致死,《大公報》社評重話「根本不是執行甚麼法律,而是借題發揮,完全出自某種政治企圖,要對付中國人。」

由於有澳門一二三事件前科,港府知道呢啲左報嘅宣傳同煽動力好大,於是認為有需要打擊,但係一啲比較大嘅左報,例如《文匯報》、《大公報》,因為佢哋同北京關係密切,驚搞佢哋會激嬲北京,於是就選擇對付一啲細報,作為對左報嘅一種下馬威。

喺67年8月9號,港府展開行動,警方喺凌晨四點幾拘捕咗《香港夜報》社長兼《新午報》董事胡棣周,《田豐日報》社長潘懷偉同督印人陳艷娟,南昌印務公司董事長李少雄同經理翟暖暉。最後全部以《煽動條例》判咗坐三年監。

另外,《大公報》社長,同時又係鬥委會常務委員會副主席費彝民,重有編輯李宗瀛亦被控「刊載煽動性文字」而被判罰款,而《大公報》亦喺5月6號開始奉令停刊六個月。[1]

另外《新晚報》記者梁麗儀因為採訪示威而被拘捕,最後亦判咗坐監。

查封左校[編輯]

摩星嶺集中營[編輯]

港府除咗用鐵手腕手段對付參與暴動嘅示威者,亦出動好多人去捉一啲“左仔”,審都唔審就拉去坐監,呢啲左仔都拉晒去摩星嶺一個集中營,喺入面除咗不見天日,又唔畀見人之外,連去廁所都要定時定候,食嘢又夾沙,日子好苦。其中有啲拉咗入去嘅人本身無參與過暴動,甚至根本唔係左仔,不過政府有殺錯無放過,都畀人拉咗入去

傅奇、石慧[編輯]

傅奇石慧係當時好出名嘅左派電影明星,因電影結緣而成為情侶,最後重結為夫婦,而兩個人亦同時係鬥委會成員,喺67年7月15號畀警察衝入佢哋喺又一村花圃街嘅屋企將佢哋拘捕,拉咗入摩星嶺集中營,原本想將佢哋同其他拉咗嘅左仔驅逐出境,遣返大陸,點知大陸唔肯收,喺羅湖橋搞咗成三十幾個鐘,最後拉法入摩星嶺集中營坐咗幾年監。

不過亦有另一個講法,話傅奇石慧喺邊境死都唔肯走,因為佢哋覺得香港係中國嘅地方,認為中國同胞有喺香港居住嘅權利,為咗衝擊遞解法令所以唔肯過境。

傅奇最後喺1968年12月11號放返出嚟,而石慧就喺之後嗰日放,而家兩個人已經移咗民去加拿大

真假炸彈[編輯]

北角清華街炸彈事件[編輯]

林彬事件[編輯]

內文: 林彬事件

沙頭角事件[編輯]

內文: 沙頭角事件

沙頭角事件又叫做「邊境衝突」,1967年6月,暴動火頭燒到港九新界幾乎度度都有,而喺華界,即係未到沙頭角只係邊境嗰頭,如常咁有示威行動,聲援工人,點知出事,有一個沙頭角鄉民俾警察開搶射傷,又放催淚彈,而催淚彈重射到入沙頭角,沙頭角鄉民一直都有聲援左派行動,今次燒到埋身,結果大約百幾個大陸民兵響沙頭角同防暴警察發生槍戰,民兵燒咗一架指揮車同整爛兩架裝甲車。事件最後有五個警察殉職[2]

聯合大罷工[編輯]

格雷事件[編輯]

內文: 格雷事件

格雷(Anthony Grey)係一個英國路透社記者,67年嘅時候佢正喺北京採訪文化大革命嘅嘢,又咁啱兩國關係因為香港暴動而緊張,結果格雷無辜辜咁畀人拉咗,作為同英國政府講數嘅籌碼。

由於當時新華社駐香港記者薜平畀香港政府拉咗去坐監,於是北京政府就喺7月19日宣佈已經將格雷軟禁,英國政府駐華代表向北京要求探格雷,而新華社又要求返要探坐緊監嘅左報記者,大家都唔肯讓步。

當時港督戴麟趾曾經打算用傅奇石慧去交換格雷,不過中方就希望所有左報記者放監先肯放格雷。最後戴麟趾將當時刑期最長嘅大公報記者黃澤嘅刑期由1971年2月減到去1969年12月,而當黃澤喺12月2日放返出嚟之後兩日,北京亦都放返格雷。

格雷事件平息之後,北京表明唔會提早收返香港,兩國恢復返外交關係,再上喺當時嘅國家總理周恩來下令,香港罷工嘅工人亦陸續復工、轉工或者改行,簡稱「復轉改」,復轉改之後社會生活同經濟亦慢慢恢復返好,呢場五月風暴總算叫做平息咗。

爭議[編輯]

由於喺暴動期間,左派同港英政府都各自發動輿論戰爭取民心,所以好多報導立場都好極端,亦令當時好多事實都唔清唔楚,例如羅湖橋事件入面,傅奇石慧係自己唔肯走,定大陸唔肯收呢?北角清華街炸彈炸死一對姊弟,有人話係左派無良亂放炸彈,但亦有人話係港英政府搵人扮左仔放炸彈,為咗屈左仔係冷血恐怖份子。

由於好多嘢唔清唔楚,所以令呢單嘢背後充斥住好多陰謀論,到底六七暴動係點,唔同人有唔同背景立場都有唔同見解唔同版本,個個都講到堅嘅咁,所以真係話唔埋。不過事件係好有爭議性,例如喺2001年7月,前工聯會會長楊光獲授勳章,就又一次掀起邊個要為暴動死傷負責嘅爭議。

影響[編輯]

暴動平息之後,針對引發暴動嘅各種社會矛盾,例如政府決策機關入面華人同英國人唔平等嘅關係、貪污、警察濫權等各種問題而作出政策改善。例如針對貪污問題,喺1974年成立廉政公署,又開始肯請華人入政府決策架構,例如陸續升咗陳方安生曾蔭權許仕仁政務主任。另外由於暴動期間巴士司機罷工而令九人車變成主要交通工具,1969年政府將九人車合法化,九人車亦發展成而家喺香港嘅一種主要交通工具嘅小巴

相關[編輯]

註解[編輯]

  • 註 1: 「菠蘿」即係自制炸彈,呢啲自制炸彈通常都係裝喺個罐頭入面,當時最好賣嘅其中一種罐頭產品係某一隻牌字嘅罐頭菠蘿,所以啲人就將呢啲自制炸彈叫做「菠蘿」
  • 註 2:
  • 註 3: 以當時計,嗰時好流行一句:「有事無事,先打三拳」,反映出當時香港警隊一直都有濫用暴力嘅問題,加上暴動期間,喺警隊眼中左仔更加係麻煩友,唔打唔得,所以當時有好多左仔畀人喺差館打死嘅事發生。

參考[編輯]

  1. 香 港 印 刷 典 故 之 印 刷 業 法 門 (刑 事 篇 )
  2. 香港電台 網上神州50年