利是

利是封

利是，有時讀做「勵事」，又寫做利市、利事、勵事，中國北方叫做紅包、紅封包，即係紅色封包住嘅錢，係種禮物，紅色響中國文化代表喜慶。響過年、結婚同生日等喜慶場合送錢做禮物都會用到，而喺呢啲場合送利是畀人係中國傳統嘅習俗。利是入面通常會擺入有吉祥數字嘅錢，好似有8字，或以雙數結尾嘅數目。

傳統嘅利是係用一張紅紙包住啲錢。但近年有好多地方都改用機器印製嘅小信封。每年臨近農曆新年，各大商業機構都有整利是派畀顧客。

新年

• 中國傳統文化習慣響利是入幾多錢經常同雙方交情成比例。
• 響除夕由家長派畀細路嘅利是叫做壓歲錢，係表示將祝福同好運帶畀佢哋。
• 每年農曆新年期間有派利是嘅習俗：
  • 部份地區（如廣東、香港和澳門）係已婚人士發畀未結婚嘅親友，叫「逗利市」，不過，而家響香港同澳門有啲同居多年嘅情侶、未婚媽媽或爸爸、同埋一啲未婚嘅中老年人亦會派利是。
  • 響中國大陸，派利是嘅習慣通常只響比較親近嘅親戚朋友之間。
  • 台灣就係由一啲廿一、二歲左右，已經出社會嘅人派畀廿一歲以下未出社會嘅後輩。
  • 響部分地區，新年發利是嘅範圍比較廣泛，例如鄰居屋企嘅細路、普通交情嘅同事之間都有可能派利是，但呢種利是內嘅金額往往比較細，有啲人甚至會響利是入啲5蚊、10蚊嘅紙幣。
  • 另外，亦有啲人會因唔同理由，送利是畀大廈管理員、助手，或者酒樓侍應等。
  • 響部分地區，農曆新年時各機構通常都會向所有員工派一封「開工利是」。而公司內結咗婚嘅員工或者上司，通常亦會向同事或下屬派利是。
• 今時今日，好多人已習慣用啲新印製嘅銀紙來做利是，有人認為除咗比較雅觀外亦寓意去舊迎新，因此每年農曆新年前好多銀行嘅現鈔提取量就會急劇增加。印鈔廠亦會有印新銀紙嘅壓力。部分環保主義者認為呢個習慣唔環保。因此，2006年港澳政府都叫啲市民響農曆新年期間用舊鈔來包利是，而銀行亦都會準備迎新鈔（大概八成新）畀市民封利是。[1]

利是封

內文： 利是封

相傳送利是嘅習俗，響好耐以前就流行，但嗰時啲人不過係以寓意吉祥嘅鮮紅色紙，包住一張寫滿祝福字句嘅字條，送畀親朋好友，以表心意。到咗大概300年前，啲人就改用一張形狀同正方形相若嘅紅紙，包住啲銅錢，封作「利是」。而第一代嘅利是封，大概響1900年印刷術開始廣爲所用時，先至面世。當時嘅所謂利是封，做法超簡單，只係紅紙印上黃油，再喺未乾嘅黃油上曬上金粉，效果就好似而家燙咗金字嘅利是封咁，而圖案就多以簡單爲主，再配吉利嘅字句。

賀禮

除咗農曆新年以外，響其他喜慶場合，好似婚禮、新店開張等亦有送利是嘅習慣。由於賀禮利是嘅金額往往不菲，因此好多人響頻繁收到婚禮請柬嘅時候，將之戲稱為「紅色炸彈」，意味住又要拎一筆賀禮出嚟做利是。香港同埋澳門俗稱為「做人情」。

其他民族相似嘅習俗

• 越南：派「利市」（Lì xì）。
• 日本：家長會派「お年玉」（羅馬拼音：otoshidama）畀細路，類似華人社會嘅壓歲錢，不過係用白色封套包裝，而且封套上會寫上接受人嘅名。
• 馬來西亞：傳統馬來人會派一種入面有錢嘅綠色封套，附有一啲伊斯蘭嘅圖案，咁係受咗華人響節慶時派利是嘅影響。

同利是相關嘅犯罪

• 送利是以往又成為華人慣常使用嘅貪污手法。行賄嘅一方畀對方利是，以作為某種服務嘅報酬。響香港，向政府人員送利是曾經係日常生活嘅部份，但響廉政公署成立以後，送利是已接近絕跡。根據現行嘅法例，公務員只有收受親屬嘅利是唔受限制；私交好友嘅利是唔能夠超過 2000港元；其他人唔可以過1000元；同時不准收受有公事往來及下屬嘅利是。若果送利是係用作行賄，就無論邊個人、乜數量嘅利是都屬違法。一啲地方，仍保留呢個制度。
• 響香港同埋澳門嘅農曆新年期間，亦曾有一啲不法之徒（通常係三合會成員）假意送財神、送年桔、送揮春、舞獅賀年等手法，迫一啲商戶同市民派利是以作回謝，以圖或企圖勒索。
• 東亞國家嘅人民有響手術前後致送畀執刀醫生利是嘅陋習，呢種利是嘅目的係拜託醫生特別照顧同表達酬謝之意，原本係東亞文化中一種禮數同敬意嘅表現，但就變質為醫生向病患亂咁攞利是，甚至利是成為醫生嘅主要收入來源，嚴重傷害醫病關係同善良風俗，因此幾乎已被各國政府立法禁止，但至今仍無法完全杜絕。

你可以維基同享呢類嘅媒體資源：
Category:利是