加拿大國家籃球聯賽

加拿大國家籃球聯賽
National Basketbal League of Canada
Ligue Nationale de Basketball du Canada

運動	籃球
成立	2011年
隊數	8
國	加拿大
盟主	溫莎快車

加拿大國家籃球聯賽（英文：National Basketball League of Canada；法文：Ligue Nationale de Basketball du Canada）係加拿大喺2011年秋季組建嘅職業籃球聯賽。

根據官方網站嘅介紹，建立加拿大國家籃球聯賽嘅目的，係為咗填補「加拿大身為全球30大籃球強國之一，唔可以冇自己嘅職業聯賽」呢個空白。之前喺1993年同埋2003年，加拿大都有人試過建立全國性嘅職業籃球聯賽，但係兩個聯賽都祇運作咗一個賽季就草草收場。

歷史

2011年，當時喺北美頂級籃球聯賽（Premier Basketball League）作賽嘅哈利法斯雨人、聖莊市街童同埋魁北克市魁北克人喺聯賽嘅季後賽裡面，因為幾個爭議性判罰而出局。由於不滿頂級籃球聯賽嘅裁判質素同埋其他利益衝突問題，哈利法斯雨人同聖莊市街童喺季後賽結束後一個鐘頭之內，同時宣佈退出頂級籃球聯賽，並且聲明唔會承認應屆冠軍羅車士達大鯊魚（Rochester RazorSharks）贏咗季後賽。一日之後，魁北克市魁北克人亦都宣佈退出頂級籃球聯賽。伊三支球隊之後開始計劃建立自己嘅聯賽。與此同時，另外四支球隊，包括倫敦閃電、奧沙華強力、森默西風暴同埋蒙克頓奇蹟，亦都喺好短時間之內組建咗球隊。以上七支球隊後來成為咗加拿大國家籃球聯賽嘅始創球隊。

喺第一屆聯賽裡面，倫敦閃電喺總決賽裡面以3-2嘅總比數擊敗咗哈利法斯雨人，成為第一屆盟主。

賽季結束之後，魁北克市魁北克人宣佈將會搬去滿地可隔離嘅拉華亞（Laval），但係未搬成球隊就折埋咗。魁北克人嘅位置，就被一支來自滿地可嘅球隊——滿地可爵士取代咗。

2012年6月，聯賽宣佈溫莎市將會組建一支新球隊。8月1號，球隊管理層宣佈球隊會叫做「溫莎快車」，2012賽季開始作賽。

2012年11月，聯賽宣佈渥太華將會組建一支新球隊。2013年2月26號，球隊管理層宣佈球隊會叫做「渥太華戰斧」，2013賽季開始作賽。後來，由於有評論話「戰斧」伊個名唔尊重原住民文化，所以球隊管理層將個隊名改咗做「天斧」。

2013年4月，聯賽宣佈安省布藍頓將會組建一支新球隊「布藍頓A士」，初定2013賽季開始作賽。2013年5月，奧沙華強力搬咗去密西沙加，新球隊依然叫做「強力」。2013年8月，滿地可爵士由於轉售失敗，而被聯賽暫停會籍。

2014年7月31號，聯賽宣布：由於渥太華天斧嘅東主滿足唔到聯賽嘅財政要求，董事會決定褫奪渥太華天斧嘅參賽資格；以後再有公司想喺渥太華組建球隊，要重新向聯賽申請。