動物園

出自維基百科,自由嘅百科全書
北京動物園一隻黑猩猩BB
香港動植物公園嘅紅鸛

動物園英文Zoo)又叫動物公園英文Zoological park),係養咗一啲野生或者外來動物畀人睇嘅地方。「動物學公園」(Zoological garden)呢個詞係生物學範疇動物學,而zoology呢個字係源自希臘文Ζωο(意思係動物)同埋λογος(意思係學嘢)。呢個詞語最初出自1828年嘅「倫敦動物學公園」(London Zoological Gardens),後來倫敦啲人縮寫做「zoo」。

世界上好多大城市都有動物園,而動物園主要係用來吸引遊客。喺美國加拿大,每年都有超過1億3500萬人參觀動物園,不過多數動物園都係蝕本,所以要諗辦法去節省開支。好多非牟利動物園,尤其係以保育生物學、教育同埋生物學研究為目標而開設嗰啲,都係靠公共資金嚟維持。

目標[編輯]

現時好多非牟利同熱心嘅動物園,佢哋做嘅唔單止係提供野生動物畀大眾觀賞同娛樂,亦同時有瀕危動物嘅保護生物學,教育同生物學研究。呢啲團體想透過保護活動,例如飼養瀕危動物,來維持地球上生物嘅多樣性[1][2]

1993年,世界動物園暨水族館協會(英文簡稱:WAZA;前名:國際動物園園長聯盟)推出咗首個保育政策。並喺2004年11月實行咗新嘅政策,佢哋制定咗21世紀動物園嘅目標同任務[3]

瀕危動物嘅繁殖任務係由相關嘅繁殖計劃一同協辦,而呢啲計劃包括咗國際物種系譜同協調者(呢啲協調者會用全球性或地區性嘅觀點去評估個別動物同相關團體)。而家喺唔同地區都有一啲保護瀕臨絕種動物計劃:

歷史[編輯]

奧地利維也納動物園
路易十六時期嘅凡爾賽動物園

動物學公園係源自中世紀起歷史悠久嘅動物展覽(menagerie)。而現存最耐歷史嘅動物園係奧地利維也納動物園英文Tiergarten Schönbrunn,自以前貴族動物展覽,係哈布斯堡王朝1752年起嘅。

埃及中國亦有開設動物園。喺前5世紀前4世紀嘅埃及,當地人興建神廟嚟養佢哋心目中嘅「神獸」,一啲食草動物例如羚羊就困喺獸欄裏面,而獅子獵豹等猛獸喺2世紀時更用嚟打獵同打仗。喺第十三王朝哈塔蘇女王底比斯起咗人類歷史上已知嘅第一座動物園。中國歷代皇帝都好鍾意起大型庭園嚟養珍貴動物,作為觀賞或打獵用。例如商代紂王時嘅「鹿苑」[4]前10世紀周文王修建咗一間375公頃嘅「智慧之園」(又叫「靈囿」),秦始皇就起咗一間周長約有150公里嘅「上林苑」[5] [6] [7]

第一個為科學同教育用途嘅動物園係1794年喺巴黎起嘅「Ménagerie du Jardin des Plantes」。倫敦動物學會英文Zoological Society of London創辦人同會員用咗早期巴黎動物園嘅1828年構思嚟做嘅倫敦動物園

1835年倫敦動物園嘅馬騮屋

倫敦動物園嘅成功令世界各地也開始相繼開動物園。澳洲首個動物園係響1860年成立嘅墨爾本動物園英文Melbourne Zoo。同年美國亦喺紐約市起咗國家第一個對外開放嘅動物園——中央公園動物園英文Central Park Zoo。其實早喺1859年,費城動物學會英文Philadelphia Zoological Society已計劃起動物學公園,但因為美國內戰而被推遲。

1970年代起,由於大眾開始關注生態學,部分動物園開始考慮以保護動物做佢嘅主要任務。並由澤西動物園傑洛德杜瑞爾英文Gerald Durrell布魯克菲爾德動物園英文Brookfield ZooGeorge Rabb英文George Rabb、同布隆克斯動物園英文Bronx Zoo國際野生生物保護學會英文Wildlife Conservation Society威廉康威英文William Conway帶頭開會。咁,動物園嘅相關專業人士開始關注同參加生物保護計畫同美國動物聯會(American Zoo Association),冇幾耐更變埋優先計畫[8] [9] [10] [11]

外觀[編輯]

有好多動物園都會將啲動物放喺好似佢哋原本自然棲息地嘅圍欄裏面生活。但係而家好多動物園都整咗特別嘅設施俾畀夜間活動嘅動物,例如喺日頭就用暗淡嘅照明系統,所以當啲遊客入去參觀嗰陣,啲動物都重周圍走,並喺夜晚開返燈等啲動物可以休息,呢種就叫夜間動物園,喺香港濕地公園小鼷鹿展覽,就係仿照夜間動物園嘅模式設計出嚟。

另外亦會為喺特別環境生活嘅動物設定特有嘅氣候環境,例如企鵝。另外重有為鳥類昆蟲魚類同其他水中生活嘅動物製作嘅特別環境。

兒童動物園[編輯]

佛羅里達州嘅兒童動物園

寵物動物園(petting zoo),又叫做「兒童農場」或者「寵物動物園」,裏面養咗一啲家養動物同較溫馴嘅野生動物,可以俾細路仔摸同餵佢哋,因此呢啲寵物動物園都好受小朋友歡迎。為咗確保動物嘅健康,嗰度畀人餵嘅食物都係由動物園提供,而呢啲食物可以喺動物園裏面特定嘅自動販賣機或者自助機台(kiosk)買到。除咗獨立嘅寵物動物園之外,而家好多動物園裏面都附設寵物動物園。香港海洋公園喺1970年代都有「兒童動物園」,有養兔仔、山羊、駝羊袋鼠孔雀等。但係而家已變咗做「兒童王國」。

另外,好多動物園都有徒步穿越嘅展覽,遊客可以入去一啲無攻擊性嘅動物所住嘅圍欄裏面,好似狐猴狨猴雀鳥蜥蜴海龜等。但動物園一般都會鄭重要求遊客遵從入內嘅規則,以免發生意外。現時,香港公園裏面嘅尤德觀鳥園,同海洋公園嘅「百鳥居」,就係用呢種方式製造大鳥籠畀遊客欣賞。

對動物園嘅批評[編輯]

華沙動物園裏頭嘅黑猩猩

新帝國主義時期,原住民有時會同動物一起關喺籠裏頭去用嚟展示同支持科學種族主義嘅論點。1906年,社會名流以及業餘人類學家麥迪遜格蘭特(Madison Grant),紐約動物學會(New York Zoological Society)嘅首長,就將嚟自剛果侏儒澳塔本嘎(Ota Benga)放喺紐約市嘅布隆克斯動物園裏面猿同其他動物旁邊一起展示畀遊客睇,作為猩猩同白人進化中嘅過渡動物為例子。呢種現象被認為係「人類動物園」,並持續到第一次世界大戰後。因此喺1931年,人類亦喺巴黎殖民展覽困喺籠裏頭展出。此外,1958年布魯塞爾世界博覽會亦展出咗一個「剛果村落」(Congolese village)[12]

近年嚟,好多動物權益嘅活動分子都唔贊成開設動物園,佢哋認為動物園只係俾人類控制同等生物,並批評佢冇教育價值同膚淺。

動物福利組織基本上唔反對動物園嘅存在,但佢哋亦經常指出將動物放置喺非自然或者其他受爭議條件嘅人類環境嘅問題,例如困喺細籠裏面。的而且確,一啲動物園會將動物置於一啲唔能夠接受嘅環境下,尤其係嗰啲商業為主或者冇乜錢嘅動物園。當睇到動物做緊一啲典型行為模式嗰陣,例如踱步,搖頭擺腦或者搖動時,代表動物喺唔適當生活嘅環境度所以感到痛苦。譬如當大象經常不斷左右搖擺,或前後搖動就表示佢哋感到唔舒服。

多數大型非牟利同熱心嘅團體,例如有天然資源保護論者,或者以教育或科學為方向為主嘅動物園,就算知道要根據一啲特別物種嘅動物福利去製作可接受同大型嘅人造環境仍然有困難(例如海豚同其他鯨魚),但佢哋都會盡力去改善動物喺動物園嘅居住環境[13][14][15]

特別動物園同相關機構[編輯]

清邁動物園嘅熊貓圈地

相對於一般展示全世界動舞群嘅典型動物園,有啲動物園集中喺某啲地理方面嘅地區,例如生活喺水中嘅動物,或者將動物用唔同方式展示畀遊客睇。而呢啲部份團體,前身多數係主題公園,並用動物嚟作為娛樂元素。

野生動物園[編輯]

野生動物園一般比典型動物園大好多。第一個呢類型動物園係1931年喺英國開放嘅貝都福溫比思奈得野生動物園(Whipsnade Wild Animal Park)。呢個公園屬於倫敦動物學會,動物公園覆蓋600英畝(2.4平方公里),並且係現時歐洲最大嘅野生保護公園,嗰度啲動物住喺相當大嘅地方入面。另外自1970年代早期,一塊位於聖地牙哥附近嘅帕斯誇爾谷(Pasqual Valley)一塊1,800英畝嘅土地(7平方公里)亦被計劃建為新動物園:聖地牙哥野生動物園(San Diego Wild Animal Park),呢個公園係由聖地牙哥動物學會經營。另一個可以同呢間動物園比較嘅野生動物園係位於澳洲墨爾本Werribee Open Range Zoo,佢哋將動物展示喺一個野生開放嘅大草原上,呢個500英畝嘅野生動物園由管理墨爾本公園嘅動物學公園以及圓林會(Zoological Parks and Gardens Board)同時管理。

動物主題公園[編輯]

動物主題公園係集主題公園同動物園於一身嘅地方,主要以娛樂同商業為主。美國受歡迎嘅有海洋哺乳動物公園,又例如海洋世界(SeaWorld)。呢類動物主題公園有較精巧嘅海豚館,養咗更多鯨魚物種同附加嘅娛樂項目。另一類新嘅動物主題公園係喺1998年,佛羅里達州奧蘭多開幕嘅迪士尼動物王國(Disney's Animal Kingdom)。呢個商業公園係由和路迪士尼公司建立,就公園面積嚟講,佢類似動物主題公園(550英畝,2平方公里),但目標同外貌就唔同,因為佢包含比典型動物園更多嘅娛樂同消遣元素。

而家香港濕地公園香港海洋公園嘅性質同動物主題公園好相近。

水族館[編輯]

佐治亞水族館嘅「海洋航行者隧道」

世界上第一個公共水族館係喺1853年嘅倫敦動物園內。跟住1853年至1899年期間,歐洲(例如1859年嘅巴黎、1864年同1868年嘅漢堡、1869年嘅柏林、1872年喺布萊頓)以及美國波士頓(1859年)、華盛頓(1873年)、三藩市(1894年)、紐約(1896年))都陸續起咗一系列嘅水族館。2005年,非牟利嘅佐治亞水族館(Georgia Aquarium),可容立超過8百萬美製加侖(約30,000立方米)嘅海水,同養咗超過十萬隻動物同五百種唔同物種,開放喺佐治亞州亞特蘭大,呢個水族館最著名嘅展品包括鯨鯊白鯨

相簿[編輯]

參考[編輯]

  1. Colin Tudge: Last Animals in the Zoo: How Mass Extinction Can Be Stopped, London 1991. ISBN 1-55963-157-0
  2. http://www.biaza.org.uk/resources/library/images/MANIFESTO.pdf 互聯網檔案館歸檔,歸檔日期2006年8月23號,. John Regan Associates: Manifesto for Zoos, 2004
  3. http://www.waza.org/conservation/wzacs.php 互聯網檔案館歸檔,歸檔日期2007年2月16號,. The World Zoo and Aquarium Conservation Strategy
  4. 《中國園林史》,ISBN 978-7-80186-825-1 / 7801868250
  5. 《新動物園:在荒野與城市中漂泊的現代方舟》,胡桃木出版,ISBN 957-8320-04-3
  6. 《動物園的歷史》,好讀出版 ISBN 978-986-178-058-0
  7. 「追溯上林苑與動物園的歷史」,《古代文明:圖像大百科》週刊第14期
  8. Vernon N. Kisling (ed.): Zoo and Aquarium History, Boca Raton 2001. ISBN 0-8493-2100-X
  9. R. J. Hoage, William A. Deiss (ed.): New Worlds, New Animals, Washington 1996. ISBN 0-8018-5110-6
  10. Elizabeth Hanson: Animal Attractions, Princeton 2002. ISBN 0-691-05992-6
  11. David Hancocks: A Different Nature, Berkeley 2001. ISBN 0-520-21879-5
  12. . 原著喺2008年4月18號歸檔. 喺2007年2月23號搵到.
  13. Stephen St C. Bostock: Zoos and Animal Rights, London 1993. ISBN 0-415-05057-X
  14. Bryan G. Norton, Michael Hutchins, Elizabeth F. Stevens, Terry L. Maple (ed.): Ethics on the Ark. Zoos, Animal Welfare, and Wildlife Conservation, Washington, DC 1995. ISBN 1-56098-515-1
  15. Randy Malmud: Reading Zoos. Representations of Animals and Captivity, New York 1998. ISBN 0-8147-5602-6

參閱[編輯]