動物橫町

出自維基百科,自由嘅百科全書
跳去: 定向搵嘢

動物橫町》(アニマル横町Animal Yokochō)係日本漫畫家前川涼筆下嘅一部搞笑漫畫,其後韓國同埋日本亦共同將佢整成電視動畫

漫畫[編輯]

動物橫町嘅漫畫自1999年開始喺集英社嘅少女漫畫雜誌《Ribon》、《Ribon Original》、《りぼん増刊》同埋《あみーご!》連載至今,總發行數量為100萬本(至2005年12月為止)。單行本漫畫暫時出到第14本。

呢套漫畫亦係第51回(平成17年度)小學館漫畫賞兒童向部門嘅得獎作品。

動畫[編輯]

動物橫町嘅電視動畫版係由東京電視台2005年10月4號2006年9月26號期間播放,共102集,每週二播出兩集(每集大概長15分鐘,加埋大概半個鐘)。其後2006年10月出版嘅《Ribon》曾經提到整動畫版續集嘅可能性,但直到現時重未有關於動畫版續集嘅任何消息。

韓國同埋香港等地亦先後播放了電視動畫版。韓國SBS將作品稱為「秘密朋友」(두근두근 비밀친구),並喺2005年12月6號2007年1月9號期間播放。香港無綫電視翡翠台2007年5月4號2007年7月27號期間逢星期四至五下晝5點15分播第1至48集,其後喺2007年9月26日2007年11月1日期間喺《放學ICU》時段內播第49至102集。

故事概要[編輯]

故事講述一個睇起來好平凡嘅幼稚園學生松崎小美有一個不可告人嘅秘密 ── 就係佢喺自己嘅睡房入面同一班不可思議嘅迷你動物生活:天真活潑嘅小爾、鍾意胡鬧嘅健太以及永遠唔會攰嘅依沙。佢哋係從異次元空間「動物橫町」來嘅居民,唔知幾時喺小美新屋嘅睡房入面整咗一道可以通去動物橫町嘅秘密之門。而動物橫町嘅其他角色亦隨之一一登場……

登場角色[編輯]

主要登場角色[編輯]

  • 松崎小美松崎 亜美。配音:江里夏(日本);何璐怡(香港))
作品嘅中心主角,係一個5歲嘅幼稚園學生。12月15日出生,星座屬人馬座,動物橫町星座屬蓆子座。住喺「明治村」(メイジ村),喺明治幼稚園讀書,並擔任明治幼稚園第28屆學生會會長。屋企有爸爸媽媽同埋細佬(動畫版未出場)四個人。性格聰敏、懂事,但同時又易喊,而且成日因不滿小爾同埋健太將啲事情搞到亂七八糟而發火大。同小哲好好朋友,但有時會為咗取勝或意向唔同而造成不和。另外亦因智商、行為等大大超越5歲水平,成日俾健太質疑佢嘅年齡(動畫第10集:《寫畀偶像嘅信》、動畫第44集:《動物橫町探險隊》)。
來自動物橫町嘅一隻兔仔1月4號出世,自稱16歲(動畫第29集:《小哲初次登場》)及23歲(動畫第32集:《不同嘅嗜好》),動物橫町星座屬巨蛇座。性格天真活潑、陰險、自負,嗜好係激嬲健太(第32集:《不同嘅嗜好》),成日搞搞震,夢想係成為有超凡魅力嘅主婦。耳仔可以隨時攞出古靈精怪嘢同埋伸長縮短,亦可以釋放電光能量(小爾激光),係佢108個必殺技之中最常用嘅一招,成日用來攻擊健太。喺動畫第62集《美少女小爾?》耳仔重可以垂低。當佢俾人「忽略」、認為係冇用或者唔使佢參與一啲佢想做嘅事(甚至假如俾人搶咗佢想講嘅嘢)就會暈低,並會飄出靈魂,要俾人重新重視才回復正常(後來俾小美揭穿係假嘅),但喺動畫後期就多數係因為冇人理佢而自己回復正常。佢嘅靈魂重可以走入人哋嘅身體(動畫第69集:《交換靈魂》)。此外亦經營一間蛋糕店。據說她好似鍾意健太(?)。而且雖然係白兔但就出人意表噉鍾意食牛扒。最鍾意攞出佢喺山並先生道買嘅吞拿魚攬枕整蠱人(特別係小美)。佢扮成人嗰時有金頭髮,又或者係着住一套人形公仔衫,叫小爾子。
來自動物橫町嘅一隻5月6號出世,動物橫町星座屬巨蟹座。性格粗魯、粗心大意,不時同小爾爭吵,亦不時俾佢整蠱。條頸成日帶住一條紅色頸巾,絕唔容許人哋偷佢條頸巾(動畫第12集:《健太同依沙嗌大架》),據稱係佢婆婆送畀佢嘅。心裏面總係渴望得到其他人(尤其係小哲)嘅讚賞同埋疼愛。暗戀小哲,但因為一次誤會而俾小哲誤以為佢係一隻機械熊。同時亦渴望成為一位受歡迎嘅主角(動畫第15集:《配角唔易做》)。另外特別討厭小美嘅啤啤熊公仔,因為佢覺得小美屋企應該得佢一隻熊。不過喺動畫第76集《健太嘅細佬?》就將玩具公司送來嘅機械熊當係親細佬。佢扮成人嗰時(着住人形公仔衫)叫健太郎。
來自動物橫町嘅一隻熊貓11月23號出世,動物橫町星座屬雙子座。佢係男仔,但有時會扮演女角色。性格勤勞、善良,但力大無窮,亦常常協助調停小爾同埋健太之間嘅紛爭,藉此希望得到小美嘅疼愛(鍾意小美?),但有時亦會將件事搞到一塌糊塗。佢好重視佢啲同伴,亦好享受同大家喺埋一齊嘅快樂時光。偶爾會好想做壞人。另外一旦聽到「絕種」兩個字就會暈低。喺依沙嘅內心世界有4種唔同嘅隱藏性格,分別係紅依沙,藍依沙,黑依沙同埋白依沙。佢扮成人嗰時(着住人形公仔衫)叫依三雄。
來自動物橫町嘅一隻純種馬,係動物橫町嘅領袖。原名約翰·保奈詩·聖安德利·馬連奴六世(ジャン・トラード・タケオ6世),不時自稱17歲。成日為大家作一啲小貢獻,之後走咗去。據小爾所講,動物橫町嘅所有動物都必須服從「山並指揮官」嘅命令,唔係就會受到恐怖嚴厲嘅處分。管理「黑市郵購」服務,不時遊說小美訂佢啲貨。此外每次出場有時會扮演唔同身分,通常會喺身上嘅衫印咗啲字講明身份,並可以變出無數個山並先生。

其他登場角色[編輯]

小美喺幼稚園識嘅親密朋友,原名哲子。5月21號出世,星座屬雙子座。擅長編織各種物品嘅套。佢係健太鍾意嘅對象,但因為小爾嘅大話,令佢以為健太只係一個要用電行嘅公仔。另外因為細個嗰時俾馬傷害過,所以特別驚馬同埋山並先生。
來自動物橫町嘅一隻雌性生物,既唔係人亦唔係動物。4月4號出世,動物橫町星座屬大象座。成日同小司一齊出場。最初出場係一名牙醫,後來就經常以客串身份出現,據講係一位推銷員。曾經加入健太開辦嘅武館,並叫佢做「大哥」。
來自動物橫町嘅一隻雀仔,成日同樂樂一齊出場。喺動畫第73、74集《新偶像登場》係動物橫町明日之星訓練學校嘅校長。喺動畫第83集《動物橫町嘅幕後製作》就變成一隻道具公仔。
  • 小龜Mr. のんこちゃん。配音:福原香織(日本))
小爾嘅寵物龜。
  • 彌生弥生くん。配音:伊藤靜(日本))
來自動物橫町嘅一隻樹熊3月3號出世。職業係動物橫町航空局一名太空人。冇嘴但都講到嘢。入面係一隻類似機械人嘅物體。
  • 松本先生マツモトさん。配音:羽多野涉(日本))
動物橫町居民,個身係長頸鹿,但個頭成日都係睇唔到。
小美嘅媽媽,冇喺作品露出個樣。曾經俾健太直接叫佢個名。
  • 小美嘅爸爸あみパパ。配音:羽多野涉(日本);招世亮(香港))
冇喺作品露出個樣。
  • 吞拿魚攬枕まぐろの抱き枕。配音:羽多野涉(日本))
小爾用嘅攬枕,會「吞拿吞拿」(まぐまぐ)噉叫。
  • 寶迪迪花ポテテチュート。配音:?→伊藤靜(日本))
依沙鍾意嘅花。喺月圓之夜會一齊奔向大海。
  • 金色瑞獸/金色海獸しゃちほこ。配音:羽多野涉、鈴木菜穗子(日本))
動畫版原創角色,後來亦喺漫畫出現。
  • 島子香樹しま シマ子。配音:高乃麗(日本);蔡惠萍(香港))
動畫版原創角色。來自動物橫町嘅一隻斑馬,係動物橫町嘅潮流指標,山並先生嘅戀愛對象。佢喺動畫第95集由動物橫町去咗巴黎橫町(パリ横)。
  • 青森亞子青森 あこ。配音:伊藤靜(日本);陳凱婷(香港))
小美就讀嘅幼稚園嘅老師,25歲,有近視。夢想係成為了解兒童心理嘅教師。
小美、小哲嘅同班同學,個人通常冇乜表情。
  • 前川老師カトリーヌ前川
漫畫家,係喺雜誌RYO連載、小美追開嘅オヤジ女子高生☆(動畫版係愛と哀しみのドスコイ,愛和悲傷的呼叫)漫畫原作者。

動畫中嘅場景[編輯]

  • 小美間房:小美從事起居生活嘅地方。當中嗰道通去地下嘅門就係前往動物橫町嘅出入口。小爾佢哋就係透過呢道門同小美一起相處;不過,小美完全冇去過動物橫町。

音樂[編輯]

片頭曲[編輯]

  1. 飛んでもNothing~どき☆どき アニマル横町のうたの巻~」(第1集-第50集)
    演唱:江里夏、宍戸留美、永澤菜教、佐藤佑子(小美、小爾、健太、依沙),作詞:杉山昭彦(マイクスギヤマ),作曲:田中公平,編曲:村瀬恭久
  2. ラブ chu ユー!!」(第51集-第102集)
    演唱:りぼんガール(Ribbon Girl),作詞、作曲、編曲:unicorn table

香港粵語版[編輯]

  1. 「動物橫町」(第1集-第102集)
    演唱:鍾嘉欣

片尾曲[編輯]

  1. ファンタジスタ★ガール」(第1集-第50集、第101集-第102集)
    演唱:the Indigo,作詞:田岡美樹,作曲、編曲:市川祐一
  2. 「Sweetie」(甜絲絲;第51集-第100集)[1]
    演唱:折笠富美子,作詞:折笠富美子,作曲、編曲:上野洋子

註釋[編輯]

  1. 香港無綫電視翡翠台首播時喺第101及102集都加咗呢隻片尾曲。

出面網頁[編輯]

日本
韓國
美國