南宋

南宋（粵拼：naam4 sung3）係中國歷史嘅一個朝代。自從1127年北宋亡國之後，趙構（宋高宗）響臨安（而家嘅杭州）重建宋朝，史稱南宋，同金朝東面用淮水（而家嘅淮河），西面用大散關做邊界。1279年，南宋俾蒙古人滅咗，建立元朝。

疆土

南宋受到北宋戰亂節節敗退所影響，只能夠統治長江流域同埋南部嘅一啲地區，東邊、南邊直到大海。而長江北面亦即係黃河流域，則係由金人所統治。

外交

南宋繼承咗北宋嘅一套，同北方外族對立，但唔係遼國同西夏對立，而係金國人。南宋打仗一樣都係打唔贏，成日畀人迫到簽和約。南宋同金打過五次仗，喺金人俾蒙古人消滅咗之後，南宋俾蒙古人軍隊攻入首都臨安，南宋喺1279年滅亡。

南宋喺抗金同埋抗元戰爭中出現過一啲名將、名臣，包括岳飛、韓世忠、文天祥同埋陸秀夫等。

經濟

南宋嘅皇帝一樣都係以銀兩或者布匹同外族講和。南宋嘅首都臨安係南宋對外貿易嘅重心，喺江南沿岸重有多個通商口岸，買賣貨品到南洋等地。

文化

南宋朝廷比較注重文人嘅提拔，所以南宋亦都出咗唔少詩人，好似辛棄疾就係好好嘅例子。