南寧普通話

出自維基百科,自由嘅百科全書

南寧普通話,又叫做「南普」,好多南寧人都講噉嘅話。佢係廣西嘅一種普通話變體。從1997年開始,南寧市借助行政手段大規模推廣普通話,然後南寧就有好多人喺公共場所講普通話啦。佢係南寧本地三種話(之一)——南寧白話(即係粵語嘅南寧方言)、南寧壯話同埋南寧平話同普通話嘅融合體,南寧特色非常之重。

學術界都冇人將南寧普通話睇成一種獨立嘅漢語方言,南寧普通話淨係普通話嘅地方變體。

南寧普通話可以分為三種:「夾白」(又叫「夾粵」)、「夾壯」、「夾平」。但係因為平話同白話、壯話都有相似之處,而且講平話嘅人都唔算得好多,所以「夾平」噉嘅講法好少人知。

「夾白」[編輯]

講「夾白」嘅人大多以白話為母語,但亦有人係因為受到白話影響至講出「夾白」普通話嘅。

語音特點[編輯]

  1. 啲北方佬嘅捲舌音兒化音基本上冇人講。
  2. 部分聲韻母同白話相同。
  3. 音高同白話嘅相似,冇輕聲,而且有啲字會發成入聲

詞彙特點[編輯]

根據語音對應規律,部分白話詞彙會轉成普通話發音直接講出嚟。

語法特點[編輯]

語法同白話相似,狀語後置。亦有白話嘅其他好多語法特點。

示例[編輯]

南寧普通話 南寧普通話讀音(漢語拼音) 標準普通話 白話
踎下來 mōu xià lái 蹲下來 踎低
勁得屄魂 gǐng dé hēi wén 好厲害 勁得屄魂
你痴啊 nǐ qī à 你傻啊 你痴啊
搏懵 bó mǒng 占便宜 搏懵
癲佬 diān lǎo 神經病 癲佬
他是個癲佬 tā sì gè diān lǎo 他是個神經病 佢係隻癲佬
你讓我走先,得不得? nǐ yàng ngǒ zǒu xiān,dé bù dé? 你讓我先走,行不行? 你畀我行先,得唔得?
雞公 jī gōng 公雞 雞公
好激 hǎo gīk 很生氣 好激

「夾壯」[編輯]

大多數「夾壯」嘅人都講北部壯話北壯),壯話語音對佢哋影響至大。至於詞彙同語法[1]呢,影響就唔算得幾大啦。

示例[編輯]

南寧普通話 南寧普通話讀音(漢語拼音) 標準普通話讀音(漢語拼音)
水槽 suǐ sáo shuǐ cáo
天地 diān dì tiān dì
開車 gāi sē kāi chē

文字[編輯]

「夾壯」嘅南寧普通話一般淨受到壯話語音同語法影響,呢種南寧普通話通常冇特殊文字。

「夾白」嘅南寧普通話有啲詞嚟自白話,所以啲詞就要用粵語漢字寫出。但係其實呢,好多人都鍾意用普通話中讀音相同嘅字替代粵語漢字[2]。比如話「痴屄/」(「神經病」之意),好多人會根據佢喺南普中嘅讀音qīhēi寫成「七嘿」、「七黑」、「7嘿」或者「7黑」。好多外地人(包括廣東人)都不知所云。噉嘅原因可能有:講南普嘅人教育程度比較低,因為有文化嘅南寧人好多都睇唔起南普;學校根本就冇白話同壯話教學,普通人唔瞭解自己嘅語言;重有其它好多好多原因,總之一言難盡。

社會地位[編輯]

南寧有三種本地話:白話、平話同壯話。經過幾十年嘅推普之後,三種本地話受到影響,標準普通話變成普通話嘅地方變體。雖然係噉,南寧重得到「推廣普通話先進城市」嘅稱號。

南寧人好多都認為講普通話好文明噃,所以喺市區已經好難聽到三種本地話囉。好多人,雖然明知人哋同自己講同一種話,都會用南寧普通話同人哋交流。南寧市啲八零後都重有好多識講母語,但係啲九零後淨識南寧普通話。好多南寧居民都唔願意教仔學母語。所以南寧本地三種話逐漸衰弱,變成瀕危語言[3]

南寧人認為自己講嘅係普通話,只不過係唔正。但因為南寧普通話嘅發音、詞彙、語法實在係太過於地方化,啲外地人士經常以為南寧普通話係南寧本地語言,有啲外省人士重認為係廣西方言。廣西同廣東其他地方嘅人大多數瞭解南寧,普通話水平比較好嘅人就戲稱南寧普通話為「南寧版普通話」。

南寧有啲媒體將南寧普通話睇成南寧城市文化嘅代表。而家南寧電視台廣西電視台有兩隻節目以南寧普通話播出:〈嘆茶「傾」南寧〉同埋〈南國故事會〉。

因為普通話大行其道,南寧三種本地話正快速消亡。所以南寧民間有啲人話要抵制南寧普通話,同時「講標準普通話,講標準白話」(標準白話係唔受普通話影響嘅標準南寧白話)。

參考[編輯]

  1. 壯話語法同白話相似,所以又可以認為南寧普通話嘅語法同時受到白話、壯話嘅影響。
  2. . 原著喺2021年2月11號歸檔. 喺2011年2月4號搵到.
  3. . 原著喺2011年4月30號歸檔. 喺2011年2月4號搵到.

出面網頁[編輯]