南崗區
南崗區（粵拼：naam4 gong1 keoi1）係中華人民共和國黑龍江省哈爾濱市嘅市轄區。總面積182.9km²，市區面積73km²。人口134萬（2013年），佔哈爾濱市區人口四分一。郵編150000。區府駐大成街50號。
史[編輯]
- 南崗嘅舊名叫秦家崗，來源於當年哈爾濱站附近一個秦姓工人。原來指嘅地方係馬家溝河以北、中東鐵路以南嘅山陵帶，呢片山陵係松花江南岸嘅一級臺地，係哈爾濱市區地勢最高嘅地方，海拔約181.2-123.2米，所以叫做「南崗」[1]。
- 清代時呢處係阿勒楚喀副都統嘅轄地。1898年，中東鐵路鋪到來呢度，當地開始形成街區，人稱新市街。
- 1907年，新市街（大直街、哈爾濱火車站週邊）、鐵路沿綫附屬地、王崗鎮啲村劃入哈爾濱市區範圍，受俄人嘅哈爾濱自治公議會管轄。
- 1926年民國政府解散公議會、驅除俄人統治勢力，將公議會嘅轄地（埠頭區、新市街）變做哈爾濱特別市。
- 1938年7月1號，新市街、馬家溝河以北地方設南崗區，馬家溝河以南設「馬家區」。
- 1949年10月，馬家區併入南崗區。
- 1958年11月，濱江區解體出一部分畀南崗；1963年3月恢復濱江區；1972年8月又解散濱江區畀南崗。
政區[編輯]
南崗區轄18條街道、1個鎮、1個民族鄉、2個單位。
- 街道：花園街道、奮鬥路街道、革新街道、文化街道、大成街道、蘆家街道、榮市街道、燎原街道、松花江街道、曲綫街道、通達街道、七政街道、和興路街道、哈西街道、保健路街道、先鋒路街道、新春街道、躍進街道
- 鎮：王崗鎮
- 民族鄉：紅旗滿族鄉
- 單位：紅旗農場、南崗區農墾
