卡佩雅蒂

出自維基百科,自由嘅百科全書
跳去: 定向搵嘢
2004年嘅卡佩雅蒂

卡佩雅蒂英文Jennifer Marie Capriati1976年3月29號—),係美國前職業女網球手,喺美國紐約市出世,係第10位登上女子網球聯合會單打世界排名第一嘅選手。身高1.70,體重72.5公斤

球員生涯[編輯]

卡佩雅蒂右手揸拍。

卡佩雅蒂喺1990年3月5號投身職業網球,嗰陣時嘅佢重未到14歲。出道之後第一次出賽就打入決賽,第三次出賽就已經擠身世界排名前25名,同年佢畀人選做1990年溫布頓網球公開賽嘅12號種子,嗰陣時先至14歲另3個月嘅卡佩雅蒂,成為歷屆網球大滿貫賽事入便年紀最細嘅種子球員。從此,佢畀人叫做網球界嘅「天才少女」。

1991年,卡佩雅蒂先後喺溫布頓網球公開賽同埋1991年美國網球公開賽入便打入四強,其中溫布頓一役打贏咗網球名將娜拉蒂露娃(Martina Navrátilová),技驚四座。1992年巴薩隆拿奧運會入便,佢重一舉打贏咗嗰陣時世界排名第一、德國嘉芙(Steffi Graf),以16歲嘅稚齡,攞咗網球女子單打金牌。但係之後佢就進入咗網球生涯嘅低潮,先係染上咗毒癮,後來又喺商場偷嘢畀人拉咗,1994年5月16號,卡佩雅蒂因為畀人查到吸食大麻而畀人禁賽。

喺沉寂咗兩之後,卡佩雅蒂喺1996年返到咗網球界。嗰段時期,卡佩雅蒂嘅成績非常之唔理想,1998年嘅排名重跌到第101位。但係佢並冇因為咁而放棄,重不斷努力咁從谷底爬上去。1999年,佢重新返到咗佢曾經熟悉嘅大滿貫賽事。

2001年係卡佩雅蒂復出之後嘅第五年。佢喺2001年澳洲網球公開賽入便以直落兩盤贏咗嗰陣時世界排名第一嘅瑞士籍選手軒芝絲(Martina Hingis),攞到佢職業生涯第一座大滿貫系列賽嘅冠軍,同年佢又擊敗比利時新秀克莉斯達斯(Kim Clijsters),攞埋2001年法國網球公開賽后冠,同時另外兩場大滿貫賽 ─ 2001年溫布頓網球公開賽同埋2001年美國網球公開賽,卡佩雅蒂都一路殺到入準決賽。嗰年10月15號,卡佩雅蒂終於登上咗世界排名第一嘅寶座。之後一年嘅2002年澳洲網球公開賽,佢又係打贏咗軒芝絲,第二次攞澳網冠軍。

2003年之後,卡佩雅蒂因為受傷嘅關係,成績已經大不如前。但係佢浴火重生、東山再起嘅過程,重仍然叫好多球迷津津樂道、難以忘懷。

威水史[編輯]

  • 單打最高排名:1(2001年10月15號)
  • 雙打最高排名:28(1992年3月2號
  • 網球大滿貫最叻(女單):
    • 澳洲網球公開賽:冠軍(2001年、2002年
    • 法國網球公開賽:冠軍(2001年)
    • 溫布頓網球公開賽:四強(1991年、2001年)
    • 美國網球公開賽:四強(1991年、2001年、2003年、2004年
  • 1992年夏季奧林匹克運動會網球女子單打冠軍

[編輯]