古百越語底層

古百越語底層，係響粵語裏頭保存落來嘅古百越語特點，深深咁影響住粵語。佢令粵語明顯同其他漢系語言唔同，擁有獨特嘅特徵。

起源

嶺南一帶，響古代重未漢化之前，住嘅係百越族人，講嘅係百越語言。呢啲語言，同漢語好唔同，但係就似現時嘅苗、瑤、壯呢幾個少數民族嘅語言，同侗台語系關係密切。粵語係呢啲地方經過長時期漢化而産生出來嘅，所以有尐古百越語嘅特點，仍然保留到今日，成為粵語嘅一個底層。呢個底層，可以話係古百越語嘅活化石。

特點

文法

苗、瑤、壯語響修飾名詞嘅時係，會將修飾語放響名詞嘅後面。粵語有尐詞都係咁樣，好似「鷄公」、「豬乸」、「貓仔」、「菜乾」、「嘢食」咁，當中「公」、「乸」、「仔」、「乾」、「食」係用來修飾「鷄」、「豬」、「貓」、「菜」、「嘢」嘅。但係北方話，就叫「公鷄」、「母豬」、「小猫」、「乾菜」、「食物」，個修飾語係擺響名詞之前，次序同苗、瑤、壯、粵語（同埋一尐漢系南方話）啱啱相反。呢個現象反映出，響一尐最底層嘅常用詞裏面，粵語仍然保留住古百越語呢個文法特徵。

語音

粵語嘅元音，有分長短，呢個特點係其他漢系語言無嘅。反而苗、瑤、壯語嘅元音同粵語一樣，都有分長短。粵語元音長短分得最明顯嘅，係aa（國際音標：[aː]）同a（[ɐ]）呢一對。呢兩個音可以配上任何韻尾，組成最少對立體，見下表。aa同a兩個元音最主要嘅分別，係發音時拖幾耐，aa明顯耐過a。雖然兩個音嘅音質有少少唔同（發[a]時條脷低過[ɐ]一尐尐），但係母語係粵語嘅人主要係依賴時間嘅長短來區分呢兩個音嘅。外省人學粵語學得唔好，就會唔識分呢兩個音，通常會將a讀成aa，於是乎「心」讀成「三」、「米」讀成「買」，一聽就知唔係本地人。

粵語長aa音同短a音嘅對立

長aa音	韻母	aai	aau	aam	aan	aang	aap	aat	aak
	字例	拜	教	斬	翻	彭	峽	殺	百
短a音	韻母	ai	au	am	an	ang	ap	at	ak
	字例	閉	夠	枕	分	朋	合	失	北

聲調方面，標準粵語有九個（有尐地方有十個），多過其他漢系語言；而且有入聲類別，係大部分漢語系北方話無嘅。入聲只會配合-p、-t、-k三個韻尾出現，而舒聲（即係非入聲）就唔會搭-p、-t、-k尾。苗、瑤、壯語亦係聲調豐富嘅語言，一般有至少八個聲調，同粵語不相伯仲；而且佢哋都係有入聲同舒聲之分，都係入聲韻收-p、-t、-k尾，其餘嘅韻母都係配舒聲調。而最奇嘅地方，就係壯語同粵語都有三個入聲調，最高音嗰個只會搭短元音，中高音嗰個只會配長元音，而最低音嗰個就長、短元音都可以搭，兩種話嘅入聲分配規律全完吻合。 聲母方面，粵語有gw（[kʷ]）、kw（[kʷʰ]）兩個圓唇化軟顎聲母，非常獨特，係其他漢系語言無嘅；反而苗、瑤、壯語都有呢兩個聲母。

辭彙

如今嘅粵語，依然保留咗唔少古百越詞語，如果以使用頻率計，有兩成咁多。呢尐詞，好多時都有音無字（例如：「laan¹開」個laan¹），就算有字可寫，都可能係借用其他字（好似：「甩」），或者係新造字（例：「蠄蟧」）。

呢一類詞，好多都俾漢源詞取代咗，但係亦有一尐以地名嘅形式鎖住咗，流傳到家陣。不過，呢尐詞嘅真正意義，就俾人遺忘咗。例如：「六建」、「六賀」、「六謝」、「六吟」嘅「六」，其實係「山涌」咁解；「那務」、「那霍」、「那錄」嘅「那」（壯話：naz；國際音標：na˧˩），係「田」咁解；而「羅鏡」、「羅龍」、「羅沙」個「羅」，即係「山地」。留意：呢啲地名嘅構詞方法，係主詞行先、修飾詞在後，保存咗古百越語嘅語法。

其中一批比較易識別嘅古百越語底層詞，係嗰尐讀濁聲母（m-、n-、ng-、l-）配陰聲調（第1、2、3、7、8聲）嘅字。點解？因為漢語詞響粵語嘅語音發展有一定嘅規律：古代濁聲母嘅詞，今日會用陽聲調讀（第4、5、6、9聲），好少有例外（好似個「媽」字咁）。當然，單睇讀音係唔夠嘅，重要查埋其他漢系語言有無同源詞，有無源自古代嘅漢字用來寫呢個詞，同埋個漢字係唔係借字，重要查下其他侗台系語言有無一尐發音、意思都相近嘅詞，先致可以有把握話佢係古百越語底層詞。

想睇更多嘅例子？可以睇「古百越語底層詞」分類。

睇埋

• 類:古百越語底層詞

參巧

• 《粵語壯傣語問題：附語法語義詞彙問題探討》 劉叔新著 北京商務印書館 2006年5月第一版 ISBN 7-100-04660-2