史德拉海牛

出自維基百科,自由嘅百科全書
跳去: 定向搵嘢
en:Wikipedia:How to read a taxoboxHow to read a taxobox
史德拉海牛
史德拉海牛
史德拉海牛
瀕危指標
物種分類
界 (Regnum): 動物界 Animalia
門 (Phylum): 脊索動物門 Chordata
綱 (Classis): 哺乳綱 Mammalia
目 (ordo): 海牛目 Sirenia
科 (familia): 儒艮科 Dugongidae
屬 (genus): 無齒海牛屬 Hydrodamalis
種 (species): 大海牛 H. gigas
二元學名
Hydrodamalis gigas
(Zimmermann, 1780)

史德拉海牛Steller's Sea Cow),又叫大海牛巨儒艮,係一種已經絕種嘅大型海洋哺乳動物。佢哋係海牛目中已知最大隻嘅品種,比起佢哋嘅近親海牛儒艮都要大好多,而佢哋亦係生存至近代嘅海牛目當中,唯一適應寒冷氣候嘅物種。史德拉海牛響1741年白令海峽畀人發現,發現佢嘅人係博物學家喬治·史德拉,當時佢正同其他探險家維他斯·白令一齊旅行,而佢亦係已知唯一見過德拉海牛活體嘅生物學家。當時史德拉海牛嘅數目已經好少,主要生活嘅靠近司令群島(Commander Islands)嘅白令島銅島(медний)嘅近海水域。

命名[編輯]

史德拉海牛響1741年時被發表為一個新物種,早響林奈提出學名格式嘅時間開始,只係知道27年後即宣告滅絕,已知無保留任何模式標本,因此曾經有好多學名被提出。現今採用嘅學名Hydrodamalis gigas,係由Zimmerman喺1780年時命名,而無齒海牛屬(Hydrodamalis)就由Retzius響1794年時確立。19世紀時曾經將史德拉海牛歸入Rytina屬。史德拉海牛另外重有兩個俗名,分別係borkèntier(德文)同埋kapustnik(俄文),前者意思係「似樹皮咁嘅皮膚」,後者嘅意思係「食甘藍嘅(cabbage eater)」。

外形特徵[編輯]

1902年畫嘅大海牛群油畫

根據史德拉嘅記錄,史德拉海牛身長約7.5米,重4,500至5,900公斤,可以長到10.7米。史德拉海牛嘅前肢粗壯但短鈍,呈槳狀,尾巴嘅外型同儒艮好似。史德拉對佢哋嘅描述:「呢種動物從來唔游近沙灘,一直棲息喺水裏面,皮膚又黑又厚,好似橡樹皮咁,按身體各部分嘅比例,個頭好細。無,嘴裏面只有兩片又平又白嘅骨頭,一個喺上頜,一個喺下頜。」除咗無牙之外,史德拉海牛嘅另一項特點在於前肢末端得腕骨同掌骨,趾骨退化至幾乎完全消失,呢點同海牛或儒艮唔相似。

分布[編輯]

史德拉海牛骨

史德拉海牛首次被人類發現時,分布範圍大致位於白令海嘅司令群島周圍,往東達阿留申群島西側,往西至堪察加半島。由上新世(Pliocene)同更新世(Pleistocene)嘅化石發現記錄研判,過去大海牛嘅分布範圍可能廣達整個北太平洋中北部海岸地帶,東側達下加利福尼亞半島同而家墨西哥西岸約北緯30度處,西部就去到日本本州(南限約北緯37度)。

生活習性[編輯]

史德拉海牛食喺岩岸邊生長嘅多種大型海藻,僅取食柔軟部分,據講當時每次史德拉海牛食咗海帶之後,海帶嘅莖同根就會被沖到岸上。而佢哋亦係海牛目中唯一食藻類嘅動物,不過有時都會食海草,但呢種講法仍然有爭議。似乎唔識潛水,至少食嘢嗰陣佢哋只將部分身軀埋落水度,響岸邊食潮線附近接近海面啲大型藻類,估計覓食深度唔超過1米深。史德拉嘅記錄中亦提到佢哋會「集體進食,個仔會被圍響群體中央受保護。」史德拉海牛內外都有寄生蟲,皮膚上有幾種甲殼動物寄生。天敵可能包括殺人鯨同其他大型鯊魚

由於史德拉海牛唔怕人類,加上活動範圍接近岸邊,游得又慢,所以好容易捕捉。史德拉描述佢哋「從來唔叫,即使受傷都係咁」,不過群體間係咪有呢種以叫聲溝通嘅情形就唔知。當有同伴受傷,其他史德拉海牛會試圖加以拯救,根據獵人嘅講法佢哋會嘗試拔出受傷同伴身上嘅魚叉。

生殖[編輯]

關於大海牛嘅文獻記錄中,曾經提到有1隻史德拉海牛被捕殺後拖上陸地嗰陣,另1條同佢同行嘅史德拉海牛就喺岸邊停留唔肯走,至少維持兩日以上。加上其他群體觀察記錄,研判史德拉海牛可能係1夫1妻制,配偶關係可能會維持相當長嘅時間。史德拉留低嘅記錄重提到,史德拉海牛多數喺早春時交配,懷孕期係1年以上,年年生得仔,不過秋天係分娩嘅高峰期。事實上史德拉喺白令島停留嘅時間由1741年11月底至1742年8月,由時間上睇嚟佢可能從未親眼睇過史德拉海牛BB仔。

點解絕種[編輯]

當史德拉第一次描述呢種海牛時,佢哋嘅族群經已好少,分布地區好有限,數量得番1,000至2,000隻。響人類發現佢哋之後無耐,白令海地區嚟咗好多獵人,呢啲人嘅目標就係捕殺生存響當地嘅海獺北方海狗以獲取毛皮,而為咗補給需求而造成史德拉海牛嘅悲劇。呢啲人大量捕殺史德拉海牛,食佢哋嘅肉、用佢哋嘅皮嚟造船同修補船。已知1768年響白令島捉咗最後1隻,距離史德拉發現佢哋嘅時間只係得27年。部分學者認為,海獺嘅減少亦可能係大海牛絕種嘅原因之一,響其他生活響白令海嘅動物當中,海獺可能係同佢哋關係最密切嘅海洋哺乳動物,因為海獺會捉食海藻海膽醫肚,如果由得海膽漫無止境咁生長,好快海藻林就會食晒。因此當時海獺嘅減少可能會令海牛帶嚟食物短缺嘅壓力。

喺白令海地區有時會聽到一啲消息,話見到好似海牛嘅動物,所以有啲學者提出,史德拉海牛嘅小群體可能一直活到而家,無絕種到,但呢種睇法目前並無科學證據。

參考[編輯]

  1. Pieter A. Folken, Randall R. Reeves, etc. / illustrated by Pieter A. Folkens, 《Guide to MARINE MAMMALS of the World》,Alfred A. Knopf, 2002: p476. ISBN 0-375-41141-0
  2. Ronald M. Nowak, 《Walker's MARINE MAMMALS of the World》, The Johns University Press, 2003: p 214-215. ISBN 0-8018-7343-6
  3. Paul K. Anderson and Daryl P. Damning, 《Steller's Sea Cow (Hydrodamalis gigas)》, edit by William F. Perrin, Bernd Würsig, etc. 《Encyclopedia of marine mammals》, Academic Press, 2002: p1178-1181. ISBN 0-12-551340-2