同位異音

出自維基百科,自由嘅百科全書
跳去: 定向搵嘢

同位異音,係語言學術語,指幾個唔同嘅語音對應到同一個音位。又叫做同位音音位變體。由於每種話嘅音位配置都唔同,所以兩個音係唔係同位異音,要視乎語言而定。一般來講,同一個音位嘅異音,即使撈亂來用,都唔會影響意思,因為嗰種話係母語嘅人,聽說話嗰陣自然唔會理同位異音嘅分別,將佢呢嘅音睇成係「一樣」。不過,撈亂同位異音來用,會令聽嘅人覺得唔自然、發音唔正。

譬如粵語裏面,有個音位/i/,多數讀[i](如:思([si˥˥])、閃([sim˧˥])、蝕([sit˨]),但係響韻尾/-ŋ//-k/之前,就讀[ɪ](如:聲([sɪŋ˥˥])、色([sɪk˥]))。咁即係話,[i][ɪ]呢兩個語音,係同位異音,對應到音位/i/。即使有人撈亂呢兩個語音,例如將「聲」讀成[siŋ˥˥](將韻母讀成好似普通話嘅「星」噉),又或者將「閃」讀成[sɪm˧˥],意思都係一樣,但係就會令人覺得佢發音唔正。

好似普通話入面嘅/e/可以用來表示「德」嘅母音[ɤ],又可以表示感嘆詞「呢」嘅母音[ə],咁樣[ɤ][ə]喺普通話入面就係同位異音,佢哋嘅共同音位係/e/

又好似英文入面嘅/p/音位,一般係發[pʰ]音(噴氣),但係喺佢喺/s/音後面就發[p]音(唔噴氣)好似speed就讀[spiːd]

參見[編輯]