和合石墳場

出自維基百科,自由嘅百科全書
箕勒仔望和合石墳場

和合石墳場英文Wo Hop Shek Cemetery)係香港一個喺新界和合石嘅公眾墳場,由香港政府管理,係香港最大嘅墳場。和合石墳場起喺山上面,山係北大刀岃東北一支,遍及和合石谷地,山腳到山頂。和合石墳場喺粉嶺西南,可以由粉嶺火車站華明邨過去。

[編輯]

和合石村喺二十世紀初立村,寓意和諧好合[1]。地名、墳場名,亦由此而來。

一九四一年,香港政府就有起和合石墳場嘅念頭[1]。當時唐人葬喺九龍七號墳場,即係而家嘅順利邨。政府認為呢個地方,經濟價值好高,就提出搬墓到和合石,騰出土地,發展城市[1]。一九五零年,和合石墳場正式啟用[1]。和合石雖然地點偏遠,但勝在近九廣鐵路,同羅湖沙嶺墳場,有同工之妙。一九五一年開咗和合石支線,方便運載棺木,亦喺清明重陽,載客拜山[1]。所以今日紅磡火車站側邊,殯儀館林立,絕非偶然。支線喺一九八三年,九廣鐵路全線電氣化後作廢[1]

和合石墳場,原本得棺地,一九五七年加金塔地[1]

分佈[編輯]

和合石墳場分棺地金塔地兩部份[1]按發年期分。後尾墳場位極之缺乏,於是乎,香港政府喺和合石火化場附近,開闢靈灰安置所,安骨灰位之用。另外喺山腳,亦預有大片墓地,留來畀大災難,好似地震瘟疫水災等,可以即刻安葬死者。所以叫災難預留用地,係全香港唯一有預留墓地。現時墳埸嘅浩園景仰園,原來亦係災難預留地。另外和合石墳場時時潮濕,場內留有小片墓地,留畀山泥傾瀉而墓地倒塌,遷葬補償之用。除此之後,亦有公墓、重整棺木地、西安墓園、同鄉墓地[1]

和合石墳場棺地,用來擺棺木,一般只安葬五年,但後尾稍爲放寬,比其他墳場長,但棺木唔留得過八年,否則會強行火化。棺地除咗按年而分,有啲亦按籍貫宗敎[1]。而金塔地,係永久墓地[1],用來擺金塔,面積得三英尺乘四英尺,只有重用墓地,再無新地,極爲之逼。和合石墳場,山勢平坦,墓段廣闊,喺同一墓段,墓位好多,唔似其他段段得一兩行。所以墓段中央,出入都有困難。而部份偏遠墓段,行石級都有啲危。墓地蚊患,亦好嚴重。

西安墓園,葬咗客輪西安號大火嘅死者。一九四七年大火,死咗約莫二百人[1]

交通[編輯]

和合石墳場有車路上,方便送殯上山。之不過,清明時節,拜山人多,年年都封路。後人拜山,要行上山。

[編輯]

  1. 1.00 1.01 1.02 1.03 1.04 1.05 1.06 1.07 1.08 1.09 1.10 1.11 . 原著喺2013年6月26號歸檔. 喺2011年7月10號搵到.

睇埋[編輯]

出面網頁[編輯]