唐伯虎點秋香 (電影)

出自維基百科,自由嘅百科全書
跳去: 定向搵嘢
《唐伯虎點秋香》嘅 VCD 封面,由美亞娛樂發行

唐伯虎點秋香》係香港出品嘅電影之一,係笑片巨星周星馳喺1993年主演嘅作品,女主角係鞏俐。呢套戲係周星馳嘅代表作,裏面一啲台詞影響咗大中華文化好多年,例如甴曱俾人叫「小強」,就喺周星馳起嘅。

電影資料[編輯]

制作[編輯]

劇情大綱[編輯]

呢個係由一套傳統嘅劇目《唐伯虎點秋香》改篇出嚟嘅新版本故事,內容係用咗歷史人物藝術家唐寅(又稱「唐伯虎」)嚟玩搞笑。

劇中嘅唐伯虎(周星馳飾)既係詩畫雙絕,亦係一個武林高手,係唐家霸王槍嘅傳人,只不過當年佢阿爹唐天豪因為一次兵器排名嘅比鬥輸咗畀書生奪命劍,從此退出江湖,而身為傳人嘅唐伯虎應承佢娘親唔會喺其他人面前顯露武功,以免俾仇家追殺,所以伯虎喺其他人眼中只係一個解元身份嘅文人;佢畫嘅畫或者寫出嚟嘅墨寶,就算係失敗之作都好值錢,所以日日都有大把人喺佢屋企後門度等執呢啲掉出嚟嘅垃圾。

唐伯虎娶咗八個老婆,但係冇個對辦,全部唔賢良淑德不特止,重爛賭爛飲,日日喺屋企唔係開檯打牌就猜枚飲酒,搞到唐家上下家不成家;唐伯虎因為咁而非常之痛苦,但係佢娘親就覺得班新抱熱熱鬧鬧咁冇咩問題,重鬧個仔娶咗八個老婆都唔知足。

後來有一日,唐伯虎同其餘三個才子朋友行街睇女仔(四個人合稱「江南四大才子」),遇到華太師夫人同四大侍婢出巡拜神兼派善包,而佢哋聽聞四大侍婢裏面嘅秋香(鞏俐飾)係最國色天香,於是就假扮乞兒攞包嚟乘機索油,當唐伯虎見到秋香嘅天真笑容,就此而決心要娶到秋香。

唐伯虎打扮成賣身葬父嘅孝子去到太師府喊叫賣身,最後終於感動到秋香同埋侍婢主管而入到太師府做下人,編號係9527;太師府對待男下人好似軍訓咁,而且男女侍奴係分得好清楚,所以唐伯虎要接近秋香係絕對唔容易;終於有一次,號稱「江南四大淫俠」嘅四個鹹濕佬喺夜晚潛入太師府想侵犯四大侍婢,點知俾伯虎撞破而帶佢哋遊花園,後來伯虎趁機會走入去秋香個宿舍想報料叫秋香小心嘅時候,發現秋香讀緊【唐寅詩集】,唐伯虎心諗掂晒得來全不費功夫,即刻向秋香表露身份,點不知俾秋香而打到一仆一碌;同一時間,四大淫俠亦俾太師府總管同埋武功高強嘅太師夫人一網打盡,重爆出係伯虎帶佢哋入嚟,正要向編號9527嘅唐伯虎問罪嘅時候,有個下人向太師夫人呈上喺秋香房裏面發現嘅【唐寅詩集】。原來太師夫人正正就係當年唐伯虎娘親嘅情敵,後來因為得唔到唐父而由愛成恨,對唐家嘅人同埋所有有關於唐家嘅嘢都恨之入骨。因為咁,太師夫人就大發脾氣要搵出邊個喺太師府收藏詩集,唐伯虎心知呢本嘢係秋香嘅,所以用一段極富動感嘅數白欖嚟攬咗上身;呢吓嘢唔單止感動咗秋香,重講服咗太師夫人而得到機會成為太師公子嘅伴讀書僮,重俾夫人賜咗個名叫華安,可以自由進出太師府每個地方,從此就更進一步咁接近秋香。

後來有一次,橫行霸道嘅皇爺寧皇帶住大班軍馬,連同師爺對穿祥奪命書生一齊殺到嚟太師府,想以文鬥同武鬥嚟刁難華太師,畀下馬威等太師唔好同佢作對,點知都一一俾唐伯虎擊敗,搞到非常掃興而撤退;而另一邊廂,唐伯虎喺太師府所顯露嘅武功,同埋即席畫出嚟嘅畫俾太師夫人睇穿咗原來華安就係唐伯虎本人,於是將伯虎收監。

幾日後,恢復元氣嘅奪命書生返嚟太師府尋仇,重重創咗奮力頑抗嘅太師夫人,而呢個時候,秋香靜靜雞放走咗嘅唐伯虎返轉頭嚟應戰奪命書生,而且重因為打贏咗而重奪兵器譜嘅排名。唐伯虎因為拯救太師府有功,太師夫人決定既往不究,重將秋香許配咗畀唐伯虎,從此有情人終成眷屬。

主要出場人物同埋演出者[編輯]

  • 唐伯虎、唐天豪(唐父):周星馳
  • 秋香:鞏俐
  • 朱茜(唐母):朱咪咪
  • 華太師:黃霑
  • 太師夫人:鄭佩佩
  • 太師府總管:梁家仁
  • 太師府侍婢總管:苑瓊丹
  • 大公子華文:李家聲
  • 二公子華武:黃一山
  • 寧皇:林威
  • 對穿祥:谷德昭
  • 奪命書生:劉家輝
  • 祝枝山:陳百祥
  • 文徵明吳鎮宇
  • 周文賓:陳輝虹(其實周文賓唔係正式嘅四大才子之一,徐禎卿先至係)