回鄉證

出自維基百科,自由嘅百科全書
跳去: 定向搵嘢
信用卡大細嘅回鄉證又叫做回鄉咭

回鄉證Home Return Permit),正名叫做港澳居民來往內地通行證Mainland Travel Permit for Hong Kong and Macau Residents[1],由中華人民共和國公安部出入境管理局簽發,係具有或被視為中國國籍嘅香港人澳門人中國大陸(俗稱「回鄉」、「返鄉下」)過邊檢時必須出示證件,其他國籍人士可以用護照申請簽證過關。

港澳居民中嘅非中國公民唔可以用《港澳居民來往內地通行證》,譬如美籍港人返大陸必須申請中國簽證。

歷史[編輯]

1949年之前,當時嘅香港政府國民政府並冇限制中國大陸居民從內地移居香港,而一般人都可以隨意往來香港同大陸兩地。進出澳門嘅情況亦相似。

1951年1月30號,當時嘅廣東省人民政府頒佈《關於沿海旅客進出入國境的佈告》(粵公邊字第6號),規定自1951年2月15號起,所有旅客出入境前都要向所在地或目的地嘅縣、市以上人民公安機關申請出境或入境,經核准並取得通行證後,至准出入。當時如果要申請有關通行證,申請人須事先委託中國大陸嘅家屬或親朋,代向相關嘅公安機關申請。辦妥申請手續後,再由代申請人將辦妥嘅通行證寄畀申請人,申請人先至得以持通行證入境。

1956年起,港澳居民出入大陸前申請嘅通行證,改成憑港澳當局簽發嘅身份證件,響入境時向羅湖口岸或者拱北口岸嘅邊防檢查站,申領一次有效嘅《港澳同胞回鄉介紹書》。

1979年以前,港澳居民前往大陸要填寫《回鄉介紹書》,填寫時須列明返鄉目的、目的地同逗留時間等。

以前回鄉證係一本簿+回鄉證附頁

1979年7月10號廣東省公安廳宣佈,由1979年8月1號起,將一次有效嘅《港澳同胞回鄉介紹書》改為三年內多次使用有效嘅《港澳同胞回鄉證》,方便港澳居民前往大陸,證件大細同一本護照相同。另外每次入境時,持證人都要填寫「港澳同胞回鄉入境卡」,清楚列明目的地同日期等資料。同時,亦要向中國海關申報有冇帶住自用嘅免稅物品,好似手表、相機、限定嘅外幣等等。1980年12月起,《港澳同胞回鄉證》嘅有效期由3年延長到10年。1988年9月8號,《港澳同胞回鄉證》嘅照片頁上過膠並加貼電腦條碼

由於每本《回鄉證》嘅查驗頁用完,就要換新證,對於經常需要過境嘅人,好似中港過境巴,貨車司機等,佢哋嘅證件用咗幾個月就要換,引起唔方便,因此當局響1999年1月起推出現時嘅港澳居民來往內地通行證,大細同信用卡相同,即係ISO 7810 ID-1標準,可以響有效期內無限次來往內地同埋港澳兩地。至大約2002年,舊有嘅《回鄉證》亦都唔使再響查驗頁上蓋印。

現時,中方亦為現版通行證持有人提供類似香港入境處e-道嘅自助查驗系統,持有人只需填妥授權書,記錄容貌同指紋之後,就可以用。

2008年12月31號,《港澳同胞回鄉證》正式被取代(因最後一日簽發嘅最長有效期(10年期)回鄉證有效期響當日屆滿)。

申請方法[編輯]

批評[編輯]

回鄉證好似外國護照旅遊簽證,申請要審批,唔係人人都有資格一定得到批發。例如香港一啲泛民主派人士。另外近年大批港澳居民北上中國內地(特別係深圳)娛樂場所吸食毒品[3],若果佢哋初犯會被公安機關行政拘留或者罰款,並且會響回鄉證嘅電腦檔案內附注有關嘅犯事紀錄。再犯會被吊銷回鄉證一段時間,禁止踏足內地限制期由三個月到三年不等[4]

[編輯]

  1. 香港中國旅行社 香港居民申領《港澳居民來往內地通行證》須知 2012年10月
  2. http://www.cts.com.mo/visa/htm/vs_t1.htm
  3. 尤其係氯氨酮(K仔)
  4. 2009年7月21號《新報》A1版

參考[編輯]

  • 鄭宏泰、黃紹倫著,《香港身份證透視》,香港:三聯書店,2004年。ISBN 962-04-2367-4
  • 張勇、陳玉田:《香港居民的國籍問題》(出版社:三聯書店(香港))

睇埋[編輯]

出面網頁[編輯]