盂蘭節

出自維基百科,自由嘅百科全書
(由地官誕跳轉過來)
跳去: 定向搵嘢

地官誕係中國民間拜祭先人、普渡佈施、祈福嘅節,北方係農曆七月十五時過,所以又叫七月半,而華南(兩廣、閩臺)則提早一日,係農曆七月十四,緣由係宋末蒙古入侵時,啲人為咗去南方走難就提早一日過節。相傳呢一日地府開門,陰司放禁,啲走曬出來,來到人間;有子孫後人拜嘅就返家廟喫香,無主野鬼就遊離浪蕩,去騷擾人家,所以呢個節都要拜先人、普渡野鬼、做法事,亦都有求鬼去病消災。所以呢個節又叫做鬼節,類似於西方嘅萬聖節。

呢個節重有好多個名,因為要燒金銀衣紙,所以又叫燒衣節,同時又係佛教道教嘅宗教節日,佛教嗌佢做盂蘭盆節,簡稱盂蘭節,道教嗌做中元節,因為道教話呢日係地官生日,所以百姓又叫地官誕

呢個節開始於佛教盂蘭節佈施餓鬼,後來中國三教合流,同道教中元祭亡人、儒教祭祖合成今日嘅拜祭儀式。喺習俗上,北方普遍集中喺七月十五拜祭,亦有各地輪流普渡,而華南從七月頭到七月十四每日都有人燒衣,並唔集中,就係唔可以超過十四先燒衣。而對湖南、江西來講,呢個節重緊要過清明重陽,佢哋係呢日行山。同時呢個節日本韓國越南亦都過。

佛教[編輯]

呢一日要開盂蘭盆法會供奉佛祖、僧人,濟六道苦難眾生,報謝父母慈恩。盂蘭盆嘅意思係用來解救因畀嘢吊住而生嘅痛苦嘅法器。

典故上就話釋迦牟尼有重要弟子目犍連,有神通嘅能力,因為佢阿媽做衰嘢多,死咗變餓鬼,目犍連用神通睇到就好傷心,就用法力畀啲飯畀老母食,但啲飯到咗嘴邊就化灰,於是搵佛祖求救,佛祖話要搵齊眾僧,每年七月中攞個盤裝百味五果供奉十方僧人,靠呢啲功德濟度老母,最後佢阿媽得以解脫。

道教[編輯]

道教全年盛會有三次,分別係三元大帝嘅生日,正月十五叫做上元節,係天官誕,天官賜福,呢日係祈福;七月十五係中元節,係地官誕,地官赦罪,祈求減輕地府亡魂嘅罪過;十月十五係下元節,係水官誕,水官解厄,為有過失嘅人解除厄運。

就話呢日地府放生啲鬼,可以為地府亡魂赦罪。

鴨怕燒衣[編輯]

雖然廣府人無雞不成宴,但燒衣時主菜係鴨唔係雞,講法有三:一,金銀衣紙要落先人手上,就靠呢隻禽鳥,雞嘴尖爪利,會搲(音:we2)爛啲衣,所以用鴨;二,祭品過奈何橋時要靠隻鴨孭(音:me1)過去;三,七月時鴨係當造,肉質肥美,畀先人既得體,又令陽間子孫有口福。

不過過年就唔用鴨,因為話:苦瓜炆鴨,苦過弟弟。弟弟指鴨,因為鴨喺水盤食嘢會發出di3 di2聲,所以有噉嘅花名;用苦瓜炆鴨,苦味會滲入鴨肉,就苦過原先隻鴨。所以冇人過年用鴨拜。

所以有歌仔唱:人怕失魂,狗怕夏至,騸雞最怕年廿幾,生雞最怕年初二,黃毛鴨仔最怕七月燒衣。

參攷[編輯]

黃毛鴨仔最怕七月燒衣