地鐵 (香港)

出自維基百科,自由嘅百科全書
跳去: 定向搵嘢
地鐵 (MTR)
MTR.svg
位置 香港
交通類型 地下鐵路
開業 1979年10月1號
系統長度 91.0 km(56.5 
線數 7
站數 53
每日載量 約 2.557 百萬(2007年5月)
軌距 1,432 mm(大約標準軌闊度)
營運者 地鐵公司
香港地鐵樂富站月台
香港地鐵青衣站出口

地鐵MTR),原本叫地下鐵路Mass Transit Railway),係香港集體運輸系統,由地鐵有限公司MTR Corporation Limited)營運。自1979年10月1號開通去到2007年12月2號九鐵合併為港鐵為止,香港地鐵總共發展咗7條路綫,全長91.0公里嘅鐵路系統網絡。系統共有53個車站,其中14個係轉車站。

網絡[編輯]

內文: 香港地鐵車站一覽
路綫 開放年份 頭站 尾站 站數 (個) 行程需時 (分) 車廠
觀塘綫 1979 調景嶺 油麻地 15 27 九龍灣
荃灣綫 1982 荃灣 中環 16 30 荃灣
港島綫 1985 柴灣 上環 14 25 杏花邨
東涌綫 1998 東涌 香港 8 28 小蠔灣
機場快綫 1998 博覽館 香港 5 28 小蠔灣
將軍澳綫 2002 寶琳 北角 7 15 將軍澳南
迪士尼綫 2005 欣澳 迪士尼 2 4 小蠔灣
香港地鐵2005年12月嘅路綫圖。

歷史[編輯]

概覽[編輯]

香港地鐵中環站大堂

經濟急速發展[編輯]

1960年代香港經濟急速發展,人口不斷增加,公共交通嘅需求越嚟越大。所以,香港政府1964年邀請咗嚟自英國嘅道路研究部門,就香港交通未來發展進行研究,並喺1967年發表咗《香港乘客運輸研究》(Hong Kong passenger transport survey),交代香港有必要興建一種集體運輸系統,要嚟解決當時嘅交通問題。

早期系統[編輯]

1967年9月,英國嘅費爾文霍士顧問工程公司(Freeman, Fox, Wilbur Smith & Associates)發表咗《香港集體運輸研究》,提議香港興建地底集體運輸城市軌道交通系統(地下鐵路系統),全長51公里,4條路綫分9期興建,耗資150億港元。當時建議嘅4條路綫係咁嘅:

1967年嘅建議發展

1968年,顧問公司就研究所倡議嘅集體運輸系統嘅建造估價做咗啲修正,要嚟作進一步嘅研究。

1970年,顧問公司完成咗對興建地下鐵路系統嘅進一步研究,發表咗《集體運輸計劃總報告書》,具體咁提出建造鐵路嘅建議。研究報告建議要起一個全長52.7公里嘅地下鐵路系統,分成3條主要嘅行車綫:港九綫、港島綫及東九龍綫,同埋兩條港九綫嘅支綫:荃灣支綫、觀塘支綫。

1970年建議方案。

顧問公司同時亦都建議用「分期興建」嘅方式嚟起頭4期共長20公里嘅路綫,即係「早期系統」。早期系統包括港島綫(上環街市↔海軍船塢)、港九綫(海軍船塢↔旺角)同埋觀塘支綫(旺角↔彩虹)。

1972年,香港政府成立咗集體運輸臨時管理局,原則上同意咗先起「早期系統」。

1973年3月,香港政府曾經喺屬於地鐵沿線嘅港島舊海軍船塢、尖沙咀半島酒店荔枝角同埋樂富嘅地底起試驗隧道用嚟試吓啲地質。呢啲試驗隧道俾英國財團投到,用900萬嚟起,合約條款中亦都註明咗嗰個財團3年裡面唔可以參與其他地鐵承建項目,以示公平。同一時間,香港政府亦都幫工程進行招標,總共有8個財團投標,而政府亦初步揀好咗四個國際財團。當時嘅計劃係將工程用固定價格嘅單一合約形式批出去。

1974年初,日本財團簽咗承投工程嘅意向書,但係喺同年嘅11月因為石油危機問題而對投資前景悲觀,決定退出,令計劃一度暫停。

修正早期系統[編輯]

地鐵修正早期系統嘅路綫圖
香港地鐵鑽石山站

1975年初,香港政府屬下嘅集體運輸臨時管理局宣佈,將「早期系統」輕輕縮減到15.6公里,即係「修正早期系統」。同時亦都放棄用單一承建合約嘅方法,將工程分番做25個主要土木工程合約同埋10個電機機械工程合約。由香港政府全資擁有嘅地下鐵路公司亦都同時間正式成立,取代咗臨時管理局監督工程嘅進行,並且打算喺通車之後,用審慎嘅商業原則嚟負責經營鐵路。

「修正早期系統」連接中環至觀塘,喺1975年11月開始動工興建。路綫將香港島中環九龍嘅主要住宅同埋工業區連接起嚟。路綫其中12.8公里係喺地底起,而其餘嘅2.8公里就係架空路段嚟。全綫有15個車站,包括12個地底車站同埋3個架空車站。

「修正早期系統」最早期叫「香港地下鐵」,當時集體運輸臨時管理局起緊地下鐵時出過一句口號:「香港地下鐵,為你而建設」,後尾改做「地下鐵路,為你建造」,最後通車時就將呢個集體運輸系統正式叫做「地鐵」。

經過差唔多4年嘅工程,修正早期系統嘅北段(石硤尾←→觀塘)喺1979年9月30號完工,並且喺10月1號正式通車。嗰陣時地鐵淨係用4卡車行,最平嘅票價係港幣1蚊,相對於巴士嘅票價係兩毫子,對一般市民嚟講地鐵的確係一件奢侈品。喺同年12月31號,路綫伸延到去尖沙咀1980年2月12號,成個修正早期系統「觀塘中環段」通車,通車日期比原定嘅提前咗7個星期,成為咗香港第一條過海嘅鐵路。由於過海乘客嘅龐大需求,地鐵列車就由通車初期嘅4卡加到6卡。

起修正早期系統嘅總費用係港幣58億。由於路綫係起喺全世界人口最稠密嘅地區之一,起嘅時候遇上咗好多困難。嗰陣時需要克服地底嘅唔同地質同埋比較高嘅地下水位,有啲路段亦曾出現過地陷等等嘅情況。但係最終仍然可以保持冇超出預算呢項驕人成績。

荃灣綫[編輯]
香港地鐵葵芳站

喺1977年嘅7月,香港政府正式批准起荃灣綫,並且喺1978年11月開始動工。荃灣綫全長差唔多10.5公里,由太子站去到荃灣站。路綫將地鐵嘅版圖總長度加到去26.1公里。成條綫有10個車站,包括6個地底車站、1個地面車站同埋3個架空車站。1982年5月10號,荃灣綫「荃灣太子段」開放通車。工程費用係港幣41億。

荃灣綫通車之後,喺1982年5月17號取代咗修正早期系統,經尖沙咀直接去到中環。由嗰日開始,修正早期系統剩番嘅路段就叫做觀塘綫,並且需要縮短到油麻地。咁嘅做法係因為喺「修正早期系統」相關文件同埋喺1976年嘅《香港整體交通研究》裡面指出咗荃灣綫喺需求量、必要性同埋技術上嘅要求而做嘅。呢個預計喺1998年之前都仲係啱架,直至東涌綫通咗車之後,分流咗來往香港島同埋荔景以北嘅大批乘客為止。

港島綫[編輯]
香港地鐵金鐘站

1980年12月,香港政府正式批准起港島綫,並且喺1982年10月開始動工。實際起嘅港島綫係由上環去到柴灣,而且會同荃灣綫嘅中環同埋金鐘交匯成為轉車站。呢條路綫將地下鐵路嘅路綫加到去37公里。港島綫總共有14個車站,包括12個地底車站、1個地面車站同埋1個架空車站,而鰂魚涌站係到1981年12月先至落實起嘅。

1985年5月31號,港島綫「金鐘柴灣段」通車。同一時間,地鐵列車全面加到變8卡。因為起行車管道嗰陣時出錯咗引致延誤,上環站需要等到1986年5月23號先至啟用。嗰日,部份地鐵車站嘅名亦都作出咗改動。「荔灣站」改做「美孚站」,中環站(Chater→Central)、旺角站(Argyle→Mong Kok)同埋油麻地站(Waterloo→Yau Ma Tei)嘅英文名稱亦都做咗啲修改。

東隧延綫[編輯]

當年地鐵打算喺港島綫通車後就休養生息吓,暫時唔做大投資住,但係日本財團就提出用民間興建營運後轉移模式(BOT,建造-營運-移交)嘅形式嚟起東隧,地鐵就樂觀其成咁答應咗。喺1984年初,日本財團提出東隧方案並且主動同地鐵接洽,當時地鐵諗住東隧同重有一年先通車港島綫太古站交匯。但係當政府同地鐵研究呢條鐵、陸兩用嘅隧道之後,認為東隧應該會遷就行車管道而同東區走廊交匯,所以鐵路管道根本冇辦法同太古站連接,最後地鐵唯有大幅度咁改造鰂魚涌車站,變咗一個根本唔啱香港標準嘅轉車站

因此,觀塘綫就被安排經東隧延長到鰂魚涌。而鰂魚涌站就成為咗港島綫同埋觀塘綫嘅轉車站。有關工程喺1985年12月開始動工興建。1989年8月6號東區海底隧道起好,觀塘綫觀塘鰂魚涌一段通車。而新起嘅藍田站亦喺同年嘅10月1號正式啟用。

機場快綫[編輯]
香港地鐵機場站

1989年10月,當時嘅港督衛奕信爵士落實咗將喺九龍城區香港國際機場(啟德機場)搬去遠離市區嘅大嶼山,同埋提出咗機場核心計劃,起機場鐵路嚟連接。但係,因為中國政府同英國政府喺造價問題上面出現咗分歧,結果呢條路綫拖到去1994年11月先至開始起。

機場鐵路喺定線初期,只係得一條主線,喺大蠔先至分開2條支線去機場或者東涌新市鎮。因為未來發展嘅需要,先至將機場鐵路分開做兩個部份:機場快綫(通車前原本叫做「飛翔快綫」)同埋東涌綫,咁樣做有助利用東涌綫嚟做服務延伸。

1998年6月22號,東涌綫通車,成為第一條延伸到去大嶼山嘅鐵路。1998年7月6號,即係香港國際機場啟用嗰日,機場快綫通車,成為香港第一條來回機場至市區嘅鐵路,當時由機場來回中環市區只需23分鐘。

為咗配合九廣西鐵嘅興建,東涌綫喺深水埗加咗南昌站,呢個車站係由九廣鐵路公司起,地鐵同埋九鐵一齊管理。南昌站已經喺2003年12月16號啟用。

2005年6月1號開始,欣澳站啟用,要嚟準備迪士尼綫喺8月啟用。機場快綫同埋東涌綫嘅全程行車時間分別修訂為24同埋28分鐘。

東涌綫同機場快綫通車初期設有7卡車,東涌綫嘅列車喺2003年初改咗做8卡,要嚟配合南昌站啟用之後增長嘅客量。而機場快綫亦都喺2005年10月開始改埋做8卡車,要嚟配合博覽館站啟用後增長嘅客量。

東涌綫同埋機場快綫嘅列車係由德國Adtranz公司同埋西班牙CAF公司聯合製造,行車時速可以去到每小時135公里,成為咗全世界最快嘅鐵路系統。地鐵同南韓嘅Rotem株式會社訂咗4部8卡嘅高速列車,係買嚟俾迪士尼綫通車之後增加嘅客量。第一批新列車已經喺2006年3月嚟咗香港。

將軍澳綫[編輯]
香港地鐵將軍澳站

1998年,政府落實將將軍澳綫交畀地鐵起,同時亦決定將東區海底隧道路段交畀將軍澳綫,而觀塘綫嘅總站就由港島改返去新界調景嶺站

基於將軍澳綫工程需時,地鐵首先進行咗鰂魚涌站嘅轉綫通道紓緩工程,要嚟解決轉綫通道嘅擠塞情況同埋第時將軍澳綫乘客嘅增加,暫時將觀塘綫總站由鰂魚涌站伸到去北角站,直至將軍澳綫落成之後先一齊交返。工程期間曾經試過火燭,所以喺2001年9月27號先至落成啟用,工程拖遲咗差唔多1年。

為咗配合方便觀塘綫嘅乘客可以適應喺油塘站轉過去搭將軍澳綫列車過去港島,將軍澳綫同埋觀塘綫來往北角站同埋藍田站至到油塘站嘅路段喺2002年8月4號啟用,列車喺離開鰂魚涌站同埋東隧路段之後,就唔會再去藍田站,改行一段新起嘅鐵路去新嘅油塘站。另一方面,原本喺起東隧嗰陣時由鰂魚涌藍田嘅路段就被棄置。

2002年8月18號,將軍澳綫正式啟用,路線延長去到寶琳站,而觀塘綫亦都同時延長到調景嶺站

通車初期,好多乘客都唔習慣咁繁複嘅轉車過程、同埋將軍澳綫嘅列車班次過於疏落,一度引起混亂。位於油塘嘅轉車站最高峰嗰陣,曾經試過有3班嚟自觀塘綫嘅乘客喺月台度等轉車。另一方面,因為新路軌同列車嘅配合問題,加上新路段好多急彎,令到新路段嘅嘈音特別大,呢個問題直到而家都仲未有妥善嘅解決方案。

將軍澳綫支綫:由將軍澳將軍澳南,係而家將軍澳綫嘅第二期工程,經百勝角隧道直達將軍澳地鐵車廠(未來大型住宅發展計劃夢幻之城)隔離嘅新車站。通車後,將軍澳線列車將會「一分為二」,分別係「北角寶琳」同埋「北角將軍澳南」,以梅花間竹嘅形式開出。地鐵曾經有興趣喺將軍澳同埋將軍澳南之間起多一個百勝角站,但係因為百勝角發展計劃有變而被擱置。呢一條綫喺2009年7月已經落成啟用。

近年發展[編輯]

2003年12月16號,為咗配合九廣西鐵通車,東涌綫荔景站奧運站之間加咗個南昌站,喺香港第一個地鐵同埋九廣鐵路共用嘅車站;美孚嘅轉車通道亦都啟用。

2004年10月24號,為咗配合九鐵尖東站(而家係九廣東鐵嘅一部份)啟用,來往尖東站同埋尖沙咀站之間嘅行人隧道隨住尖東站啟用;尖沙咀站成為咗第4個同九鐵連接嘅轉車站。

2005年6月1號,同迪士尼綫交匯嘅東涌綫欣澳站正式開幕,欣澳站啟用之後,機場快綫東涌綫嘅車程將會稍為增加,分別係24分鐘同埋28分鐘。

2005年8月1號,來往欣澳同埋迪士尼站無人駕駛鐵路迪士尼綫開始投入服務。市民紛紛趁住暑假周末,帶埋仔女去試搭新車,同埋參觀迪士尼站同附近嘅迪欣湖等等嘅設施。

2005年12月20號,機場快綫博覽館站開始投入服務,要嚟配合亞洲國際博覽館啟用。

2007年第1季,機場站翔天廊通用。由於香港國際機場通用二號客運大樓同埋基礎設施,叫做「翔天廊」,為咗應付離境旅客直接進入翔天廊,所以地鐵公司將會喺機場站上行綫月台對面起一個全新嘅三號月台。三號月台係一個兩邊都落得車既月台。

收費[編輯]

香港地鐵欣澳站

截至2006年初,香港地鐵收費分為成人同埋特惠兩種。12歲以下嘅小童、65歲或者以上嘅長者、12至25歲嘅全日制學生先至可以用特惠票。3歲以下嘅小童就可以免費搭車。同其他地鐵系統唔同,香港地鐵收費唔係劃一,而係根據路程長短而定。搭嘅站數越多,收費就會越高。一般路綫嘅成人單程收費由港幣3個8至23個1不等。特惠票價差唔多係成人票價嘅一半。

付款方法有3種:八達通、單程票同埋旅客票。

八達通[編輯]

內文: 八達通

八達通係香港嘅其中一種電子收費系統,咭嘅大小同信用卡一樣,裡面裝有晶片,用嘅時候將張咭放喺接收器上面就可以完成付款過程。而香港地鐵就係一個最常用到八達通嘅服務。除咗機場快綫之外,香港地鐵為八達通使用者提供優惠。例如來回金鐘同埋尖沙咀,成人八達通收費係港幣7個9,但係單程票收費就要港幣9蚊。

單程票[編輯]

單程票係一種附有磁帶車飛,要喺入閘之前買咗先。車站大堂設有自動售票機,售賣各種單程車飛。但係,香港地鐵係冇雙程票,除咗機場快綫之外。

旅客票[編輯]

旅客票分為兩種,分別係一日內任搭嘅通行飛(售價港幣五十蚊),同埋喺3日之內任搭,附有機場快綫來回程嘅通行飛(售價港幣三百蚊)。旅客喺購買旅客票嗰陣,需要提供旅客證明文件,好似護照咁。

特別版紀念票[編輯]

每逢新年或者有新嘅卡通片上映,地鐵都會推出新嘅車飛。呢啲車飛嘅表面印咗一啲特別圖案,每張都可以畀一程嘅錢(唔包括機場快綫)。

用完1次出閘嗰陣張飛唔會收咗去而係畀返人,可以留為紀念。

地鐵服務[編輯]

香港地鐵喺2004年,每日乘客量就超過230萬人次,成為世界上最繁忙嘅鐵路系統之一。

香港地鐵喺大部份日子都會提供每日19小時嘅列車服務,大約由上晝6點去到午夜1點,非行車時間就要嚟進行軌道及軌旁嘅維修工程。喺一啲假期,好似平安夜同埋大除夕咁,地鐵更加會通宵行走。

地鐵系統[編輯]

香港地鐵鐵路系統網路全長91.0公里,包括超過129.1公里長嘅隧道所組成。而喺53個車站當中,其中10個係地面車站,8個係架空車站,其餘35個就係地底車站,起喺距離地面12至37米下面。每個車站嘅設計各有不同,唔少車站都採用較為簡單嘅箱形結構,以2至3層嘅結構容納大堂同埋月台,亦都有部份車站採用較為複雜嘅佈局結構,月台起喺鑽挖隧道裡面,而大堂就喺路面以下。有啲仲有多層嘅地庫結構,要嚟提供更多空間去容納車站大堂嘅售票設施、商店、控制室同埋機房等嘅設施。

香港地鐵用嘅重型鐵路系統,可以有效咁應付眾多嘅乘客需求量。地鐵列車有8卡,可以載2500個乘客。喺繁忙時間,市區綫每個鐘最多可以開34班車,即係每1.75分鐘一班,載客量差唔多85000人次。而地鐵列車數目已經由啱啱通車嗰陣嘅140卡,增加到2002年嘅1050卡(包括機場快綫嘅88卡同埋迪士尼綫嘅12卡)。而每日早上嘅繁忙時間,會有86%嘅車卡投入服務。

地鐵安全[編輯]

香港地鐵月台幕門

香港地鐵一直都舉行唔少活動,確保乘客注意使用地鐵時嘅安全。例如喺各個地鐵車站裡面有唔少嘅海報月台同埋車廂亦都有廣播提醒乘客。另外,地鐵引入附例嚟防止乘客進行不當或者危險嘅行為,例如禁止攜帶易燃物品,違規者可以被罰款甚至入獄。值得留意嘅是,地鐵禁止攜帶金屬氣球進入車廂範圍,以免影響架空電纜運作。

2002年8月開始,香港地鐵開始引入月台幕門到各個地底月台,並且已經喺2005年嘅10月全部完成。而東涌綫機場快綫同埋將軍澳綫喺落成嘅時候都已經裝咗月台幕門。月台幕門能夠防止乘客墮軌,同埋防止月台嘅冷氣流失。

由於欣澳站同埋迪士尼站車站設計以開放式為主,並無安裝空調設備,所以呢兩個站就引入咗月台閘門月台閘門嘅高度只有1.5米(大概等於月台幕門嘅一半)。月台閘門可以防止乘客墮軌,成本亦都較平,唔駛顧及車站嘅設計。

每個月台兩端都有壓力感應器,一旦有人經月台兩端嘅樓梯行落路軌,感應器就會傳送信號到站長室,通知職員。另外,每個月台都有緊急停車掣,防止有人墮軌而俾列車輾過。

地鐵設施[編輯]

香港地鐵升降機同埋加闊入閘機

由於每日有大量乘客使用,所以香港地鐵嘅月台都裝有大量嘅扶手電梯,雖然早期由於認為傷殘人士唔適合搭地鐵而冇裝旅客用嘅升降機,但因應機場快綫嘅開通,而家絕大部分車站都最少有一部,以方便攜帶大型行李嘅旅客之餘,同時亦都方便傷殘人士。與此同時,為咗適應更多傷殘人士搭地鐵,地鐵亦都做咗多項改善措拖,包括車廂裡面嘅輪椅專用位置、盲人導向地板同埋加闊入閘機等等。但係,有別於世界各大地鐵系統,香港地鐵基於衛生理由,大部份車站都冇洗手間設施,只有機場快綫同埋迪士尼綫先至有。

香港地鐵車站有唔少商店,而且自從地鐵私營化之後,種類就不斷增加。喺大部份香港地鐵嘅車站裡面,都有下面嘅服務:

另外,每個地鐵站亦都設有收費電話飲品售賣機自助攝影機。而站內嘅報刊派發處,就會免費派發四份免費報刊:新聞娛樂報章都市日報》同《快線周報》、同埋求職招聘刊物《招職》。

地鐵列車[編輯]

香港地鐵市區綫日韓車廂

香港地鐵列車係動力分散動車組,全部設有8個車廂,由1500伏直流電架空電纜推動,喺軌距為1432毫米嘅路軌上行走(同倫敦地鐵一樣比標準軌1435毫米窄少少)。地鐵車廂採用嘅設計,可以有效應付高流量嘅乘客。除咗機場快綫之外,其餘都設有橫向座位安排同埋額外嘅通風設施,而每個車廂都設有10道車門。

荃灣綫港島綫將軍澳綫全線同埋觀塘綫大部份嘅用車都係用由英國都城嘉慕製造嘅列車,最高時速去到80公里。由於列車投入服務初期嘅設計已經不合時宜,所以地鐵喺1998年開始將所有英製列車全面翻新,翻新工程喺2001年8月完成。

為咗配合將軍澳綫通車,地鐵買咗13列由南韓Rotem同埋日本三菱重工株式會社製造嘅列車。呢批列車原本係行將軍澳綫,但地鐵將負責將軍澳綫列車維修嘅將軍澳車廠維修合約外判俾負責英製列車翻新工程嘅United Goninan公司,最終13列日韓列車要行觀塘綫,地鐵就重組英製列車嘅車卡排列,將大部分喺1989年由英國都城嘉慕同埋喺1995年買嘅由GEC Alsthom製造嘅列車車卡調動到將軍澳綫度行。

東涌綫同埋機場快綫用西班牙製造特別設計嘅車廂,當中迪士尼綫嘅車廂,其實係由市區綫調動嘅車卡進行改裝而成,以配合香港迪士尼樂園而被重新設計,例如車廂窗門同埋車廂裡面嘅扶手都係米奇老鼠頭部嘅形狀咁。

為咗配合九廣西鐵同埋迪士尼綫通車,令到東涌綫載客量持續上升,地鐵再訂多4列列車(第一列列車已經喺2006年6月12號12點05分投入咗服務,而最後一列列車將會喺2007年初交付)。由於時間緊迫而且訂貨量小,所以地鐵只係以市區線韓製列車做藍本,同南韓Rotem訂購增強型韓製列車。

香港地鐵列車嘅維修工作,目前由5個車廠負責,分別係九龍灣車廠、荃灣車廠、柴灣車廠、將軍澳車廠同埋小蠔灣車廠。每個車廠除咗負責為相應行車綫嘅電動車組提供電力之外,亦都有停車設施、洗車設施同埋預防同糾正性嘅維修設施,例如起重同埋頂升設備等等。

未來發展[編輯]

新路綫[編輯]

香港地鐵迪士尼綫車廂

為咗應付香港長遠嘅發展,地鐵有多條新鐵路嘅發展計劃。

車站改善工程[編輯]

  • 主要行人通道工程:地鐵公司香港政府同埋地產商,計劃喺各建築物底起行人通道,連接各地鐵車站。
  1. 地鐵金鐘站行人隧道工程:連接太古廣場第三期同埋金鐘站現有通往太古廣場嘅行人隧道,長280米,隧道裡面設有行人運輸帶,預計喺2006年9月完工。
  2. 地鐵太子站行人隧道延展工程:將而家太子站B出口行人隧道喺西洋菜南街度向南延伸160米,連接始創中心同埋太子站B2入口,現有嘅太子站B2入口就會重建,預計喺2006年2月開始施工。
  3. 地鐵荔枝角站行人隧道工程:新起嘅行人隧道喺荔枝角長荔街下面,長300米,連接昇悅居、宇晴軒等等新物業發展區同埋荔枝角站。長荔街將會起兩個新嘅地鐵出入口。

參閱[編輯]

外部連結[編輯]