夏朝

中國史
中國考古
傳疑時代（參考三皇五帝）
夏
商
西周					周
春秋			東周
戰國
秦
西漢				漢
新朝
東漢
三國
西晉		晉		十六國
東晉
南北朝
隋
唐 （參考武周）
五代十國
北宋		宋	遼 （西遼）
南宋			金		西夏
元
明
清
中華民國
中華人民 共和國			中華民國 （參考台灣問題）

夏
首都	都城不定，各王相異
君主  -開國君主  -亡國君主	共16位 啟 桀
成立	(禹傳畀啟（有爭議）)
滅亡	(鳴條之戰)

夏朝（約為前2000年—約前1600年）係中國史書記載嘅第一個朝代。史書記載夏朝有萬國，所以一般認為夏朝係一個部落聯盟形式嘅國家，同時中國大陸馬克思主義史學將夏朝定性為一個奴隸制國家。夏朝文物（西元前1600年以前嘅文物）中有一定數量嘅青銅同玉製嘅禮器，所以佢嘅文化同文明程度高過新石器後期文化。但由於去到而家，嚮考古學上重未揾到夏朝存在嘅文字依據（中國最早嘅文字記載出於商朝），因此佢嘅真實存在性未得到正式確認。但亦唔可以否認夏朝嘅存在，因為如果當時嘅文字係寫嚮一啲唔易保存嘅嘢上面，流傳唔到落嚟係絕對有可能嘅，商朝嘅存在就係因為甲骨同埋青銅器係容易保存嘅嘢至得以證實。史書記載「禹時五星累累如貫珠，炳炳若連璧。」經過全面計算，西元前1953年2月26號有一次好好嘅五星聚會，呢個可以作為估定夏代年代嘅參考。

根據史書記載，夏朝係禹個仔啟建立嘅國家。夏禹傳子代替咗以前嘅禪讓制度，由禪讓制變成王位嘅世襲制。夏朝共傳13代，16王（一說14代、17王，主要係大禹係君主定係部落聯盟首領呢個有爭議嘅問題），大概400年後，俾商朝滅咗。

爭議

龍山文化嘅蛋殼高柄杯，1976年山東諸城呈子遺址出土

按照考古學嘅標準，夏朝嘅真實存在性唔能夠確認，或者話，嚮有力嘅文物出土之前（好似證明商朝存在嘅甲骨文），學術上唔承認夏朝嘅存在，夏朝嘅存在淨係出現喺後人嘅記錄或者杜撰。嚮中國人嘅傳統觀念以及當代中國嘅某啲學者眼中，未文字考古實物嘅夏朝當作係歷史上存在過嘅，但從考古學嘅角度來睇，呢個係唔嚴謹嘅。不過另一批西方歷史學家又多次批評中國歷史、考古學界嘅疑古情緒過於嚴重，導致對傳說同神話嘅歷史學價值發掘唔夠。據中國社會科學院考古研究所殷瑋璋教授所講，由於流傳至今有關夏朝嘅史料非常匱乏，所以歷史上有冇夏朝存在，曾經俾好多人懷疑。但係《史記•夏本紀》中記載嘅夏代世系同同一本書《殷本紀》中記載嘅商代世系一樣明確，商代世系嚮安陽殷墟出土嘅甲骨卜辭中得到證實，因此《史記•夏本紀》中所記嘅夏代世系被多數學者認為係可信嘅，而商代在此之前就同夏代一樣係不被主流睇法接受嘅。咁樣，嚮考古學家對安陽殷墟、鄭州商城等商代嘅物質文化遺存有咗進一步認識嘅基礎上，提出咗夏文化探索嘅研究課題，希望用考古手段去揾到夏代嘅物質文化遺存，進而恢復夏代歷史。

目前嚮河南偃師二里頭文化，發現咗距今3600年嘅宮城，面積達10.8萬平方米（比附近嘅偃師商代都城面積大好多），重發現咗距今3700年嘅車轍，係同史書中夏朝同時代嘅文物。中國政府已專門撥款進行夏商周斷代工程，對夏朝嘅研究力度正喺度加大。學術界對二里頭文化有兩種睇法，一種認為二里頭文化一至四期都係夏朝文物，發現嘅宮城就係夏都；另一種認為一二期係夏朝文物、三四期係商朝文物，所以發現嘅宮城係商都。由於到而家為止夏朝都城嘅考古實據重未得到充分確認，所以所確知嘅夏朝暫時僅存在於古代文獻中。

以徐旭生為代表嘅古史學家依據文獻資料，提出有兩個地區可能係夏人嘅活動地區：一個係河南西部嵩山附近嘅登封、禹州同埋洛陽平原；一個係山西南部嘅汾水下游地區。因為傳說中夏代嘅都邑同一啲重要嘅歷史事件，大多同呢個兩個地區有關。1959年開始「夏墟」調查，拉開咗夏文化探索嘅序幕。四十年來嚮豫西、晉南開展咗一系列考古調查同埋發掘工作，令夏文化探索嘅目標逐漸縮細。目前，多數學者認為：以偃師二里頭遺址命名嘅二里頭文化（包括二里頭類型和同埋東下馮類型）同埋豫西地區嘅龍山文化係探索夏文化嘅主要對象，並對夏文化問題發表咗各種睇法。但因為缺乏文字等直接證據，目前學術界對邊種遺存係夏代文化重未形成共識。不過無論係豫西地區嘅龍山文化定係二里頭文化，都已經累積咗相當豐富嘅資料，為最終解決呢個問題創造咗一定嘅條件。

文獻中嘅夏朝歷史

大禹治水圖

據中國古代文獻記載，嚮夏朝建立之前，曾經出現過夏部族同周圍其他部族之間爭奪聯盟首領嘅頻繁戰爭。夏部族大概係嚮中國古史傳說中嘅帝顓頊以後逐漸興起嘅。有唔少古代文獻都將夏部族追溯到帝顓頊。其中《史記•夏本紀》同埋《大戴禮記•帝系》稱禹為顓頊個孫，但有某啲文獻話禹係顓頊嘅五世孫。呢啲文獻表明，夏氏族好有可能係顓頊部落嘅一支後裔。

鯀

文獻中所記載最早嘅一位元夏氏族成員係鯀。《國語•周語》中話鯀作為夏族首領被封嚮崇，即被稱為「崇伯鯀」。之後禹繼承咗鯀，為「崇伯禹」。咁就表明夏氏族早期活動喺崇附近。當時黃河氾濫，為咗抵抗洪水唔少部落形成咗部落聯盟，鯀被四嶽選為負責治水嘅領導。佢治水歷時九年而最終宣告失敗。鯀失敗嘅原因好有可能係因為佢不善於團結族人，搞好各部落嘅關係而最終失敗。《尚書•堯典》中記載，堯最初認為鯀方命圮族、毀敗善類而反對鯀做治水領導。呢個有可能表明鯀嚮擔當治水領導時，已經有唔少部落對佢產生咗不滿。《尚書•洪范》喺《國語•魯語》中又提到「鯀障洪水」，話鯀治水嘅方法主要係用土木堵塞，而最終失敗，呢個有可能亦係鯀治水九年失敗嘅原因之一。總而言之，鯀治水失敗後，被殛死喺羽山。

禹

禹係鯀個仔。禹唔單止冇表示任何憤怒，而且重依然恭敬舜，得到咗舜嘅信任。舜就將治水任務交咗畀禹。禹改進咗佢阿爸嘅治水方法，廣泛地團結咗各部落嘅族人，令治水成功。《史記•夏本紀》記載到禹治水時「勞身焦思，居外十三年，過家門不敢入」，佢艱苦卓絕嘅精神俾人廣泛頌揚，呢個有可能促進咗各部落族人嘅團結。《孟子•滕文公》提到禹嘅治水方法「疏九河，瀹濟、漯而注諸海；決汝、漢，排淮、泗而注之江。」

由於禹治水有功同發展農業生產，夏部族勢力增強，成為部族聯盟首領。隨後舜又派禹去討伐三苗。禹將三苗驅趕到丹江同漢水流域，鞏固咗王權。《墨子•非攻》中講道禹克三苗後，「別物上下，卿制大極，而神民不違，天下乃靜。」呢個寫法雖然有少少誇張，但可以說明禹喺治水同討三苗成功後，夏部族已提升到當時黃河流域文化前所未有嘅重要地位。舜將帝位禪讓畀禹，禹嚮塗山召集過部落會盟，再次征討三苗（當時中原部落成日同三苗展開鬥爭）。據《左傳》（誇張嘅）記載「執玉帛者萬國」參加咗塗山會盟，可見當時夏部落嘅影響力。有一次嚮會稽部落會盟時，防風氏首領遲到而俾禹處死。呢個表明夏部族嚮穩定權力後開始出現咗濫權嘅行為。隨住以黃帝族為核心嘅夏氏部落聯盟嚮政權嘅日益鞏固，各地嘅經濟關係亦同樣加強。古代文獻中常有禹畀諸侯部落以路途嘅遠近來分別納貢嘅講法，就可以體現出因夏氏族對佢周邊部落經濟上嘅控制。

古代文獻亦屢有描述禹嚮晚年有強烈嘅權勢欲。禹雖然想將權力保持嚮夏氏族內，但又顧慮禪讓傳統嘅影響，所以佢採取咗一個靈活嘅辦法。禹先任命幾有威望嘅有偃氏首領皋陶為繼承人，以表示禹對禪讓傳統嘅尊重。然而皋陶年紀重大過禹，重未等到禪讓，皋陶已經死咗。禹又任命冇多少影響嘅東夷族首領益為繼承人。然而當時好多部落都唔擁護東夷族嘅益，反而相信禹個仔啟。禹認為益得唔到民眾嘅支持必定會禪讓畀佢個仔啟。

啟

禹死後，益並未得到權位，反而嚮民眾嘅擁護下，啟得到咗權位。於是益率領東夷族聯盟討伐啟。經過幾年嘅尖銳鬥爭後，益被啟殺，從而啟確立咗王位。呢個就係大多數歷史學家所認為中國嘅第一個世襲制王朝—夏朝嘅開始。隨後，重有唔少傾向禪讓傳統嘅部族質疑啟嘅權位。居於當今陝西省關中平原一帶嘅有扈氏率領聯盟討伐啟，嚮甘（今陝西省戶縣之南）大戰。戰前啟稱佢嘅權位係「恭行天」嘅，呢個就係幾百年後周朝天子論嘅雛形。啟擁有中原民眾嘅贊同，嚮人數方面佔絕大優勢，最終打敗咗有扈氏。啟嘅呢兩次勝利代表住當時中原社會觀念從傳統嘅禪讓制度轉向世襲制度。

啟能歌善舞，成日搞盛宴。其中最大嘅一次係嚮鈞台（今河南省陽翟），此即鈞台之享，重喺「天穆之野」（今具體位置不詳）表演咗精彩嘅歌舞。《山海經•海外西經》記載到啟跳舞嗰時「左手操翳，右手操環，佩玉璜。」甚至有文獻話啟曾經上天取樂舞。啟被視為中國古老嘅樂舞文獻《九辯》、《九歌》同埋《九招》嘅原作者。

夏氏族原先姓姒，但從啟開始改用國名「夏」作為姓。同時啟唔再用伯呢個銜號而改用後，即「夏後啟」。

啟統治期間，佢個仔武觀成日作亂。《韓非子•說疑》話佢「害國傷民敗法」，最終被誅殺。除咗夏氏族內部嘅糾紛，為爭奪方國部落聯盟權威，而成日同東夷族作戰。

太康失國

啟死後，佢個仔太康繼承咗後位。太康只顧住嚮田野玩，唔理政治，在位期間，夏部族權威削弱，東夷族太昊同埋少昊部落趁機西進。東夷族有位善射嘅首領羿。《呂氏春秋•勿躬》認為弓就係羿發明嘅。羿率軍從東夷屬地鋤遷*（同“鋤”音意，左金字旁、右“且”）到咗有夏氏屬地嘅窮石（今河南省洛陽南面），同當地夏人通婚，結好咗關係，形成咗有窮氏。從而令羿嚮夏民嘅擁護下奪得咗夏政。隨之太康投奔斟尋嘅斟尋氏。

羿奪得權位後並未稱王，而係將太康嘅細佬中康設為夏後。但事實上，國事全部由羿治理。呢個引起咗唔少部落嘅不滿。其中主持天象活動嘅有和氏同埋有羲氏公開反對。羿話佢哋廢時亂日，派兵討伐佢哋並且取勝。

中康死後，佢個仔相繼位。隨後，相投奔親夏嘅斟尋、斟灌氏。從此，羿獨承夏後權位。但得權後，羿就好似太康咁，唔再理國事，成日喺野外射獵。佢廢咗武羅、伯困、龍圉等忠臣，但就重用被伯明氏驅逐嘅不孝子弟寒浞。寒浞網羅黨羽，權力日益增大。終於有一日，佢趁羿出外射獵嘅機會將羿同佢屋企人殺晒。奪取咗有窮氏嘅大權。寒浞將戈封畀佢個仔「豕壹」*（一個字），將遼封畀佢一個仔澆。澆率兵眾滅咗親夏嘅斟灌氏同埋斟尋氏，殺咗嚮斟尋躲避嘅相。相嘅老婆緡嗰時已經有咗相個仔，佢從牆洞避開澆，走到佢阿媽有仍氏屋企避難，冇幾耐就生咗少康。（注：太康、中康、少康均名康，但為咗不混淆，加注咗輩分。）

少康中興

少康大咗之後，為有仍氏牧正，結果俾澆知道咗。澆又派人去追殺有仍氏，少康無奈逃奔有虞氏（即舜嘅後代）躲避。有虞氏當時無仔，得兩個女，對少康格外款待。佢哋將綸邑送咗畀少康，少康就以綸邑為根據地，組織兵眾。佢開始收集存餘嘅夏民眾，設官分職。喺澆廷中設間諜，準備恢復夏朝。呢個時候，喺有鬲氏躲避嘅原夏臣靡聽到少康準備恢復夏室，親自帶領斟灌、斟尋氏殘餘民眾同少康聯合擊敗寒浞。複立少康為夏後。少康又喺過滅澆，又派佢個仔杼喺戈滅「豕壹」*（一個字）。至此，控制中原三代近百年嘅東夷族有窮氏終於覆滅。太康失國至少康中興表明著，華夏族平定中原方國部落（尤其係東夷族）嘅過程以及最終嘅勝利。

少康結束咗後羿同埋寒浞40年左右嘅統治，恢復咗夏朝嘅政權，史稱「少康中興」。少康死後，佢個仔杼立。佢重視發展武裝同埋製造兵甲。形成咗夏代中興嘅局面。

夏王朝經過較長一段時間嘅中興穩定局面，到孔甲時，內部矛盾日趨激化。從孔甲經皋同發，到履癸（即夏桀）內亂不止。

由於夏王朝後期特別係最後一個王桀王嘅暴虐無道，俾商族部落首領商湯乘機而入，率大軍同夏朝軍隊喺鳴條打過（一說河南中部，另一說山西安邑），即鳴條之戰，夏桀失敗，逃到安巢（今安徽巢縣），並死嚮嗰度，夏王朝滅亡，商王朝誕生。

疆域

夏朝嘅疆域西起河南省西部同山西省南部；東至河南省、山東省同河北省三省交界處；南起湖北省，北至河北省。當時夏嘅勢力延伸到黃河南北，甚至長江流域。夏王朝建都陽城（今河南省登封嘅東部）、酌鄩（今河南省登封嘅西北部）、安邑（山西省夏縣西北部）等地。

政治狀況

夏朝嘅國家機構直接來源於部落聯盟機構，特徵係：

1. 國家直接管轄嘅範圍只限於本氏族內部。超出夏族本部落之外，其他部落首領嚮自己嘅領地上，享有較為獨立嘅管理權和統治權；對於夏王，佢哋就以臣服同納貢嘅方式，表示相互關係。
2. 嚮政權形式同管理制度方面，具有專制、民主二重性，表明咗國家制度由氏族民主政體過渡至君主政體。

文化與科學

夏人已經掌握好多天文歷法嘅知識，《夏小正》即係中國最早嘅曆書。冶鑄銅業係夏朝新興嘅重要手工業。

二里頭一、二期文物中出現玉製禮器，證明佢已經有相當文化水準。

科學與技術

嚮夏代，農業文明到咗好高嘅程度，傳說禹嘅大臣儀狄開始造酒，夏王少康又發明咗秫酒嘅釀造方法。為咗適應農業生產嘅需要，探索出農事季節嘅規律，現時重流行緊、有時稱為夏曆嘅農曆就係嗰個時代發明嘅。

畜牧業有一定發展。有一大批奴隸從事畜牧工作，重有一啲專門從事畜牧業嘅氏族部落。養馬得到相當重視。

此外製陶業嚮夏代可能已經成為一個獨立嘅極為重要嘅行業。

至於青銅器，中國已經發現咗二里頭文化嘅銅刀。如果二里頭文化被認為係夏朝時期嘅文化，咁呢件青銅器就係夏朝時期嘅。夏朝人用嘅工具都係以石器為主。

夏朝都城出現咗車，但重未能夠確認係人力車定係馬車，因為車轍只有1米寬，同商朝嘅2米寬車轍不同，商朝已經確認係用馬車。

重要人物

禹：

禹執政期間，對苗族嘅征戰取得巨大勝利，後者被迫退到長江流域，從此以後，佔據黃河流域嘅黃炎族嚮中原地區地位更加鞏固。禹做共主之前最偉大嘅功績就係治水。據說大禹吸收阿爸鯀用圍堵法治水失敗嘅教訓，用疏導法治理洪水，曾三過家門不入，終於平水土，定九州。禹重改善咗灌溉工程，有利農業。禹嗰時嘅伯益發明鑿井、奚仲發明造車，禹時用銅做兵器，顯然，禹嘅時代生產力大為提高。據說，禹時開始建造城市，並由儀狄發明瞭用穀物釀造甜酒嘅方法。呢個表明，當時嘅私有制發展，已經形成咗階級。禹死後，眾酋長擁戴禹個仔啟，於是禪讓制度被廢除，由禹嘅後裔開創嘅夏王朝正式開始。

夏朝帝系表

　1·啟
　　│
　　├─────┐
　　│　　　　　│
　2·太康　　3·仲康
　　　　　　　　│
　　　　　　　4·相
　　　　　　　　│
　　　　　　　5·少康
　　　　　　　　│
　　　　　　　6·予
　　　　　　　　│
　　　　　　　7·槐
　　　　　　　　│
　　　　　　　8·芒
　　　　　　　　│
　　　　　　　9·泄
　　　　　　　　│
　　　　　　　　├──────┐
　　　　　　　　│　　　　　　│
　　　　　　１0·不降　　１1·扃
　　　　　　　　│　　　　　　│
　　　　　　１3·孔甲　　１2·廑
　　　　　　　　│
　　　　　　１4·皋
　　　　　　　　│
　　　　　　１5·發
　　　　　　　　│
　　　　　　１6·履癸（桀）

夏（前2054——前1600）

啟 39 己卯 前2054

太康 29 丙戌 前2015

仲康 13 乙卯 前1986

相 28 戊辰 前1973

後羿 2 丙申 前1945

寒浞 38 甲辰 前1943

少康 21 丁醜 前1905

杼 17 戊戌 前1884

槐 26 甲寅 前1867

芒 18 庚辰 前1841

泄 16 戊戌 前1823

不降 59 甲寅 前1807

扃 21 癸醜 前1748

廑 21 甲戌 前1727

孔甲 31 乙未 前1706

皋 11 丙寅 前1675

發 11 丁醜 前1664

桀 53 戊子 前1653

出面網頁

• 《中國大百科全書》夏