多數人暴政

出自維基百科,自由嘅百科全書

 多數人暴政粵拼do1 sou3 jan4 bou6 zing3英文tyranny of the majority),又稱爲民主暴政man4 zyu2 bou6 zing3多數人暴力do1 sou3 jan4 bou6 lik6群體暴政kwan4 tai2 bou6 zing3,係一種多數人話曬事,壓制少數異見嘅政治現象。具體講落,啲群眾之中有大部份嘅人都支持某個諗法、抑或政策、措施,於是贊同嘅人就認爲呢個諗法、政策、措施係主流民意,所以係絕對啱嘅,甚至天經地義,呢種錯覺令佢哋好排斥甚至打壓少數嘅反對異見,認爲自己先係啱嘅,唔贊同自己嘅都係錯嘅。亦都借人多勢眾控制咗話語權,令少數異見出唔到聲,亦即係話語霸權兼話語專制。

邏輯上講,呢種現象叫做主流思想謬誤,即係以爲主流諗法實啱,而唔諗真下係咪真係啱。放到政治,則係反思民意對政治嘅左右,尤其係民主政治嘅運作,以及言論自由嘅保障問題。比如話由於話語專制,少數群體出唔到聲,只能由得多數人話事,甚至畀主流迫害都無人知,自然無人幫口、繼續受侵害。又比如就民主政治嘅質素睇,啲話語畀班暴民把持固然係衰,但就日常來講,公眾唔係時時都知事事,偏偏有啲公眾事務係需要精專知識、事實數據先有討論基礎,噉呢個時候就可能有利益團體操作資訊、輿論,而啲公眾不明就裏,入曬愣(leng1),做曬政治應聲蟲,之後呢啲利益團體就可以利用多數人嘅優勢壓制不利於佢嘅少數聲音,從而達到一啲政治目的。所以點防範呢啲問題,就係政治制度嘅設計問題。

舉啲好粗嘅例。比如話廣州嘅白雲山好大座,阻住山兩邊嘅快速交通,假設而家所有廣州市民都贊成挖通座山,噉係咪意味住白雲山真係可以挖呢?又比如話香港用地緊張,所以要將市區推到原本係郊野公園嘅地方,唔鬼理咩生態環境,假設所有香港市民都贊成,噉係咪又真係可以噉樣做呢?就呢啲例子去思考,就會思及政治運作嘅種種問題。