大帽山

從大刀岃對望廣闊嘅大帽山

大霧嘅大帽山

大帽山霧景

大帽山道

香港天文台喺大帽山設置嘅雷達站，提供低空雷達數據，熱帶氣旋襲港時期間會有人當值。

大帽山（帽讀冒；Tai Mo Shan），又名大霧山，《香港雜記》繙做大磨山，係香港一山。海拔九百五十七米，係香港至高，高過第二嘅鳳凰山廿三米。大帽山處於新界中部，山體廣闊，坡度平緩，附近範圍劃入大帽山郊野公園之內。山系一帶，伸入大欖郊野公園同埋林村郊野公園。大帽山位於荃灣區同埋元朗區交界，小部分歸大埔區。

由於大帽山喺春天不時都有大霧，絕大部份香港人都叫佢做「大霧山」。

地理

大帽山主要由火山岩組成，喺山谷亦有唔少沉積岩。山坡嘅上半部露出山脊，亦有一啲石澗由高地流到山谷。大帽山由於係全港至高，可以遠望四處。佢南面近處係荃灣，遠啲係青衣島，再遠可以望到香港內洋。而東望則可見馬鞍山，北望近見石崗。天氣好時，向西南遠望，會見到大嶼山。

香港政府將佢劃入郊野公園，是爲大帽山郊野公園。呢帶山林最大威脅係山火。一九六八年，火燒大帽山同城門，燒咗卅四粒鐘，毁咗廿八萬幾樖樹。

史

《香港雜記》有云，大清「守兵多寨於此。」而大帽山高地，方便傳送煙號，以防海賊。

氣候

大帽山平均溫度，全港至低，只有攝氏十七度二，比天文臺廿三度一，低六度左右。全年有一百零三日，處於寒冷天氣狀態，全港之冠。而全年平均濕度係百分之八十八。

屋宇

由於位於高地，氣候獨特，接近高空大氣，香港天文台喺大帽山設置雷達站，提供雷達影像同埋數據。

動植物

大帽山東南面有森林，但受氣候限制，喬木只可以伸展至海拔550米，再高啲嘅地方植物主要係灌木同埋草。以前大帽山曾經盛產綠茶，名霧茶或雲茶。現時山坡有見梯田痕跡。

動物方面，大帽山有多種雀、蛇同埋蝴蝶，亦有唔少螢火蟲。

鄰近嘅山

• 金山
• 針山
• 草山
• 狗肚山
• 蓮花山

交通

大帽山有車路，名大帽山路，由荃錦公路杈出。大帽山路頭，有扶輪公園，有遊客中心，設有好多停車位。

讀音

帽字嘅正宗讀音係 mou⁶，同「冒」字同音。但係通常個「帽」字都會變調讀成 mou²，陰上聲；反而好少用原本「冒」呢一個音。於是，好多人都以為「帽」字只可以讀 mou²，反而唔知道正音其實係 mou⁶。讀「大帽山」呢個名，就係要用正音，讀成「大冒山」daai⁶mou⁶saan¹先至啱。

所以，「大帽山」呢個名，喺口耳相傳嘅時候，經常俾人誤會成「大霧山」，因為「霧」字都係讀 mou⁶，同「帽」、「冒」同音。而且大帽山山頂好高，時時有霧，加深咗呢個誤會。但係，當啲人睇書睇地圖嘅時候，又會見到「大帽山」呢個正確寫法；多數人唔知道「帽」字嘅正宗讀音，就會懷疑係錯別字。

近年香港電視台、電台，有尐新聞報導員矯枉過正，將「大帽山」夾硬變調讀成daai⁶mou²saan¹，令問題惡化。

睇埋

你可以維基同享呢類嘅媒體資源：
Category:大帽山

• 香港嘅山
• 鳳凰山
• 大東山