大通寺 (廣州)

出自維基百科,自由嘅百科全書
  呢篇文講廣州嘅大通寺。想搵其它城市嘅大通寺嘅話,請睇大通寺

大通寺粵拼daai6 tung1 zi2)係中國廣東省廣州市荔灣區嘅其中一個遺址。而呢個遺址係喺芳村大道中嘅北邊,珠江嘅南邊,花地涌嘅東邊,上市街嘅西邊冇幾遠嗰度。喺宋朝元朝清朝嘅「羊城八景」入面,佢同煙雨井一齊攞埋「大通煙雨」嘅名。

[編輯]

寶光寺[編輯]

其實喺南漢嗰陣,呢度唔係嗌「大通寺」嘅名,而係嗌「寶光寺」嘅名。根據《南漢書》卷十七,列傳第十一寫咗嘅記錄係話咗,寶光寺係喺南漢達岸僧喺南漢時起咗嘅[1]。而嗰陣嘅寶光寺係南漢時期7間寺嘅其中一棟。

「大通寺」嘅名點嚟?[編輯]

到咗宋政和六年(1116年)嗰陣,有位經略使覺民就整咗個「大通慈應禪院」嘅橫額出嚟,「大通寺」就係因為噉得出嚟嘅。

宋朝嘅繁華[編輯]

宋朝時,白鵝潭嘅西邊就係大通滘(依家係花地河),嗰陣係喺西江同北江嘅船成日都行過呢度。而大通滘尐水好深,重有河又闊,而且風平浪靜,嗰陣就係宋朝時廣州嘅一個大港口,就係大通港喇。由於有咗呢個港口響度,所以大通寺南邊就發展到變咗廣州嘅八大城鎮(大通鎮)喇。

清朝[編輯]

呢間寺嘅最大一次重新裝修係喺康熙時期喇,而呢次重新裝修,係陣咗個金燦燦嘅大雄寶殿同天王殿,重喺煙雨井度起咗個六角亭同畀人上去睇景嘅煙雨樓同精舍,而間寺嘅範圍都變大咗。之後士大夫同名士都喺呢度起埋別墅都有。另外重種咗卅幾度嘅大大細細園林出嚟。[2]。喺鴉片戰爭之前,呢度成日都睺實嗮啲嚟廣州度經商嘅鬼佬,到咗嘉慶十七年,蔣攸做咗兩廣總督之後重將海幢同花地(大通古寺嗰邊)嚟做鬼佬嘅旅遊景區,重規定到咗農曆每個月帶有「八」字嗰日(初八、十八、廿八)嚟睇,喺太陽落山嗰陣就唔畀睇喇。有位嗌靈鷲(1639——?)嘅詩僧主持咗大通寺,重加咗大通煙雨嘅出名度添。而嗰時嘅大通煙雨,就係文人墨客嘅聚集地。

到咗清朝中葉之後,由於西南涌同官窯涌成日都發生淤塞嘅嘢,搞到喺西江同北江行嘅船都改嗮行第度,而大通港就開始衰落喇。但大通煙雨嘅旅遊景區重越嚟越勁,有尐遊客重將睇景搬到河度。大通滘重有唔哩嚜捈嘅遊艇出嚟畀遊客喺花地河度睇花或晚黑喺白鵝潭度睇月光光。

大通寺嘅消失[編輯]

民國嘅破壞[編輯]

喺民國初年,由於廣州嘅社會動盪,搞到治安惡化且經濟蕭條,而之前成日好多人旅遊嘅大通煙雨就越嚟越少人去喇,搞到個廟成日被人整爛,變咗個賊佬避難嘅地區。喺20世紀30年代,由於日本仔殺到廣州,重喺大通寺度搞咗個駐防(重起埋個卡都有)嚟儲存啲糧食,搞到整好咗成千年嘅廟都冇埋。

中華人民共和國成立之後[編輯]

  • 1953年:呢度變咗間一工廠(之前係廣州市農產品加工廠,後嚟變咗廣州果子食品廠)。
  • 1958年:「大通煙雨」嘅牌坊俾人拆咗。後嚟間工廠重整大咗個曬場同職工嘅運動場,而重凈低嘅爛六角亭同塞咗嘅煙雨井都鏟走埋,得返兩樖老榕樹響度。

重建[編輯]

1997年,本嚟話廣州果子食品廠就同香港嘅恒基地產公司嚟合作喺呢度搞棟高樓住宅嘅。但係喺2003年嘅7月份,廣州市就開展咗第四次嘅文物普查工作,就係芳村區文化局組織嘅文物調查入面,睇咗下轄區入面嘅文物資源,就係噉過咗一年(喺2004年10月),重嗌咗廣州市文物考古研究所入面嘅專家嚟幫手,喺之前嘅廣州果子食品廠嘅工地度挖咗煙雨井遺址出嚟,而呢個煙雨井重俾廣州市民關注咗。就係噉,成千年嘅古井重新出返嚟。到咗2005年7月,煙雨井已經俾廣州市人民政府加咗入去文物保護單位度[3]。喺2008年8月27號,大通寺同煙雨井已經修復好,嗰度係一個細型嘅公共文化場所[4]

[編輯]

  1. 原句係「僧迭岸,名志清,姓梁氏,新州人……一日,渡城河西,阻風,登南岸,愛其地僻,奏請移居。後主為發帑藏,建寶光寺,使駐錫焉。於是大闡宗乘。參學至者,舍不能 容,多就田間結廬居。」
  2. 《番禺縣續志》卷四十記雲:“國朝康熙六年,裡人肖子奇得異疾,發願贖地修復,疾愈,遂為重建,買田塘地基五十畝以益之。環寺植樹,尤擅幽邃”。
  3. 大通烟雨井的发现及其他 互聯網檔案館歸檔,歸檔日期2019年9月10號,. 廣州文史
  4. 宋元“大通烟雨”今朝重现羊城 南都網

睇埋[編輯]

連出去[編輯]