大鐘樓

1880年嗰陣嘅大鐘樓

1870年代嘅必打街，可以遠望大鐘樓

大鐘樓（The Clock Tower）係香港舊時一座鐘樓，1908年拆咗。個鐘樓響香港島中環，皇后大道中同必打街（今日畢打街）交界。古蹟古物辦事處叫佢做畢打街鐘樓（Pedder Street Clock Tower）。座嘢曾經係中環地標。

大鐘樓響1861年到1862年起嘅，樓高八十呎（24.4米）共五層，鐘面透得光，可以報時同報火燭，夜晚可以照明，引導船行去必打步頭。座鐘係 Rawlings 先生設計嘅，不過初時籌唔夠錢，好多細節都省畧咗。最後，德忌利士洋行東主，香港黃埔船塢大班，蘇格蘭人德忌利士（Douglas Lapraik）捐夠錢起。因為座嘢係當時中環嘅地標，所以叫佢做大鐘樓（The Clock Tower）。搭正1863年1月1號子夜12點，個鐘第一次響嚟賀新一年來臨。

1908年，皇后大道中要擴闊，大鐘樓就咁俾人拆咗。鐘樓拆咗之後，鐘面重留響度。1915年啱啱起好嘅九廣鐵路尖沙嘴火車總站嘅尖沙咀鐘樓，其一面就咁安住上去，用到1921年，安新鐘先至換返四面新嘅 。

雖然大鐘樓畀人拆咗，但係香港人響20世紀初重係叫大鐘樓一帶做「大鐘樓」。雖然大鐘樓無咗，過咗差唔多廿年，響附近有另一個鐘樓出現。1926年當時全香港最高建築物告羅士打行起好，個行就有座告羅士打鐘樓，代替咗大鐘樓嘅地位。香港日治時期，「大鐘樓」一帶畀日本仔改名做「昭和廣場」。