天下無賊

出自維基百科,自由嘅百科全書
跳去: 定向搵嘢
《天下無賊》宣傳海報

天下無賊》係中國香港合作嘅電影作品之一,係喺2005年農曆新年賀歲電影。

電影資料[編輯]

制作[編輯]

  • 出品機構:華誼兄弟太合電影投資有限公司、太合電影投資有限公司、寰亞電影有限公司、北京紫禁城影業公司
  • 出品人:王偉、王中軍、莊澄、張振華
  • 監製:陳國富
  • 導演:馮小剛
  • 編劇:馮小剛、王剛、林黎勝、阿魯
  • 主演:劉德華劉若英葛優李冰冰、王寶強、尤勇、林家棟、張涵予……等。

背景及簡介[編輯]

呢套戲由中國文學作家趙本夫嘅同名小說改篇而成。

故事主要係發生喺一架由青藏高原開往北京火車裏面,講關於兩幫賊人喺火車上面嘅盜竊鬥爭。

劇情大綱[編輯]

喺大有錢佬劉總裁屋企,英文老師王麗喺度教緊劉總英文,點知呢個劉總見王老師幾靚女,就趁老婆唔喺屋企想乘機侵犯,點知俾一直暱喺廁所王薄攝錄機偷拍晒;原來王薄同王麗係一對雌雄大盜,佢哋影底咗劉總想偷食嘅罪証,成功咁敲詐咗一架寶馬房車

佢哋兩個揸住呢架寶馬一直穿,想話賣咗佢賺返一筆錢;沿途上王麗突然提出話想收山唔再做賊,但王薄反對。當佢哋揸車去到青藏高原一個城附近時,王麗想落車去拜拜神,王薄亦無不可,就陪咗佢入去。王麗一個人虔誠參拜,但係王薄就好似入咗寶山咁,將嚟到參拜嘅善信袋裏面嘅手提電話同埋財物都偷晒喺手;期間遇到個冷艷女子都喺度偷緊嘢,於是王薄就上前去挑戰,重乘機偷走咗呢個女子啱啱偷返嚟嘅手機。離開之後,王薄向王麗展示成袋嘅戰利品,但係王麗想積陰德唔想再做賊,於是提出要同王薄拆伙,王薄一怒之下就將王麗放落車,賴底佢喺高原度就自己揸車走咗去。

王麗一個人喺一片荒漠度四圍蕩,一個早前喺廟城度幫廟宇翻新嘅小師傅傻根踩住單車經過,見到王麗口乾求救,於是落車畀佢飲,重載佢去到近城鎮嘅地方;落車時王麗諗住畀啲傻根多謝佢,傻根拒絕不特止,重送咗個高僧送畀佢嘅降魔杵吊墜畀王麗保平安。

傻根係一個正直嘅青年,十六歲就憑住家傳手藝嚟到廟城跟一個鄉里大叔做修揖廟宇嘅工作;佢覺得自己已經廿一歲,係時候要返鄉下成家立室,於是問一直照顧佢嘅大叔一路以嚟嘅工作賺咗幾多,大叔搵會計計過條數,話幫傻根儲咗六萬蚊人民幣,傻根就要求大叔幫佢攞錢,畀佢拎啲錢返鄉下起老婆。大叔拎住包錢畀傻根,提議傻根搵郵局幫手送錢返鄉下,但係國家規定運錢郵費要收總額嘅1%,即係大概六百蚊;傻根覺得六百蚊可以買隻仔拉吓車推吓磨,點解要無端端將啲血汗錢畀人,於是想自己親手帶住啲錢返去,但係大叔話沿途會有好多好危險,隨時會俾人搶晒啲錢,可惜傻根個人太直,覺得呢個世界唔會有咁多賊,冇咁容易俾人打劫,於是一意孤行咁帶住啲錢起程。

幾個大叔送傻根去到火車站,傻根因為唔信會有咁多,傻到喺月台大嗌叫賊嚟搶佢裏面嘅,點知撞到王麗同王薄;王薄已經賣咗架寶馬,因為唔放心王麗一個人,於是就跟咗佢嚟火車站,重應承以後會同佢形影不離。王薄同王麗一聽到傻根身上面有巨款,於是即刻要傻根跟住佢哋一齊坐,不過喺兩個人嘅心裏面,其實各自嘅諗法已經有所不同:王薄想將傻根嘅錢據為己有,但係王麗覺得傻根係正直嘅人,希望沿途可以保護佢唔好俾其他人搶走佢啲錢,後來重認咗佢做契細佬義弟)。不過呢個時候,傻根先前大叫搵賊嘅愚蠢行為除咗俾王薄王麗知道佢身懷巨款之外,亦已經招惹咗另一班假扮旅行團扒手集團嘅注意。

火車離開咗車站,而喺火車嘅貴賓包廂裏面,一個冷艷嘅年輕女子正喺度幫一個老人家清除緊佢嘅面部化粧,佢就係先前喺廟城度俾王薄反偷手提電話嘅女賊,叫做小葉;而嗰個老人家嘅化粧清除咗之後,露出嘅係一副威嚴兼且帶啲奸狡嘅中年男人面孔,原來佢就係呢班扮扒手集團中嘅最高領導賊阿頭--胡黎,因為佢嘅扒竊手法非常高明兼且乾淨利落,因此同道中人都會尊稱佢做黎叔。黎叔因為之前俾王薄發現咗佢假扮老人家嚟接近傻根,覺得王薄有啲料子係一個可用嘅人才,所以傳令畀手下知叫佢哋呢程車裏面都唔好再搞傻根,想藉住順水人情(將傻根嘅錢讓畀王薄)嚟招攬王薄幫佢賣命。

黎叔嘅手下雖然得到命令呢趟車唔准「打獵」,但正所謂「聞到肉香嘅,點會唔發狂」,面對咁大隻肥,終於忍唔住而要出手;賊二哥胖子聯同黎叔愛將四眼一齊出動,趁住傻根行咗出嚟通道去廁所,先先整到好唔覺意咁將好熱嘅滾潑喺傻根身上,然後詐諦要幫傻根換,再乘機偷傻根袋裏面用羊皮紙包住嘅,好彩呢個時候王薄及時趕到一手按住個,而四個人就喺一個狹窄嘅通道裏面推來攘去,當王薄同兩個賊幫過咗幾招得勝之後,啲錢幸保不失,王薄同傻根兩個安然咁返返埋佢哋嘅卡位

坐喺王薄佢哋另外一邊卡位嘅係一個畫畫老師同埋佢嘅一個學生,突然間畫緊嘅畫畫老師發現唔見咗個銀包,而其實佢個銀包一早喺車站就俾王薄扒咗,於是大嘆倒霉。傻根睇到人哋俾賊仔偷咗嘢雖然都覺得無奈,但係佢仍然覺得呢個世界係唔會有咁多賊,因為佢覺得,之前喺高原嗰陣成日都對住啲同佢哋傾計,啲狼都冇襲擊佢,重建立咗微妙嘅友誼;連出名嗜殺嘅狼都唔會傷害佢,所以佢覺得:唔通人重會衰得過狼?

王薄唔抵得班賊出手挑釁,於是拎住隻熟走入貴賓餐廂諗住搵黎叔佢哋,咁啱黎叔同小葉,胖子同四眼喺度食緊嘢,於是王薄搵咗斜對面嘅一個位坐低,洋洋自得咁向黎叔露咗一手「空杯退蛋殼」,黎叔好欣賞咁坐埋咗王薄張,亦表演返一手「指甲批生蛋殼」,技術更高超;黎叔借住機會提出要王薄跟佢搵食,但王薄話自己不嬲係獨行俠,所以拒絕,重當場篤咗胖子同埋四眼出嚟,話佢哋冇照黎叔命令出咗去「打獵」。返到貴賓車廂,黎叔發晒脾氣要責怪四眼,點知原來四眼都係聽到胖子講話係黎叔吩咐先咁做,黎叔心裡有數,但係念在兩個都幫得手,就冇去罰佢哋。不過黎叔覺得,既然王薄唔肯為佢賣命,班兄弟又忍唔住手,於是直頭吩咐小葉出動去扒傻根嗰六萬蚊。

深夜時份,普通車廂裏面差唔多個個都瞓晒,小葉嚟到坐咗喺畫畫老師後面個位預備郁手,佢將點着咗嘅唇膏頭彈咗入一個男人嘅衫袋裏面搞到係咁冒煙,嚇到個男人紮醒大叫火燭;呢個時候王薄唔喺位,得返王麗同傻根一齊,傻根見有人嗌火燭就自告奮勇衝過去滅,王麗按佢唔住,混亂間傻根袋裏面嗰舊錢就俾小葉掉咗包變成咗包紙巾。小葉扮成大肚婆諗住避開王薄王麗嘅耳目,點知都俾王薄識穿,過咗幾招之後王薄終於搶返包錢,小葉趁機會想勾引王薄,但係王薄始終唔過

因為保護唔到傻根嘅錢,王麗覺得好沮喪,王薄返到嚟就話既然傻根個身冇錢即係冇危險,不如落車唔好理咁多;中途站落車之後,王薄透露畀王麗知佢其實已經搶返包錢,勸王麗唔好理傻根,等佢面對現實唔好沉醉喺天下無賊嘅夢入面;王麗大發脾氣,於是話畀王薄知因為佢有咗BB,想積返啲德,所以先至去拜佛同埋保護傻根;王麗拎返包錢畀傻根,然後唔理王薄,自己同傻根上返車。火車又再開動,冇幾耐王麗個手提電話嚟咗個短訊,王薄話:「有我在你放心。」

王薄一個人喺酒吧車廂坐,小葉就嚟挑釁佢,諗住同王薄比試,點知表面上贏咗王薄,其實就中咗王薄嘅迷藥圈套。後來胖子同四眼又嚟搵王薄比試膽量,佢哋走咗上車頂,王薄就提議大家企直,如果邊個喺架火車入隧道之前唔縮低頭就贏;胖子自己唔敢上,就叫四眼出戰,呢個時候黎叔靜靜雞喺上車頂嘅度暗中睇住戰果,可惜四眼喺臨到隧道口嘅一刻就縮低咗頭,而王薄就輕描淡寫咁仰頭避過撞隧道頂嘅危險。不過當一出隧道之後,胖子唔抵得輸就向王薄偷襲,王薄一跌低黎叔突然出手,搞到王薄跣咗去車嘅一邊差啲跌咗落車,黎叔及時捉住王薄隻手,但係呢個時候架火車喺條上面,而腳下就係好深嘅山谷;黎叔冇乘人之危,拉返王薄上嚟之後就同佢打賭,要喺架車到站之前將傻根嘅錢偷到手。

黎叔親自去到普通車廂,坐低喺另一面卡位陰陰咀笑咁望住王薄,忽然廣播話有人急需要大量血液,要搵人捐血,傻根又自告奮勇要去捐血,王薄冇佢符,於是就陪佢去;喺條通道行緊嘅時候,有個阿伯喺頭頂個架度攞嘢唔小心整跌咗個水壺,眼見個水壼會跌中個BB嘅頭上,王薄一伸手就接咗個水壼,但就喺呢個電光火石嘅一刻,佢同傻根嘅距離就拉遠咗;同一時間火車再次入隧道,喺冇乜底下王薄知道出事,佢發現傻根個袋得張紙話佢輸咗,就冇晒心機咁返埋位。點知四眼畀黎叔一睇嗰包錢就即變晒口面,原來成包都係陰司紙!黎叔認為王薄出古惑就好唔高興,正想離開普通車廂時,有三個幪面劫匪持斧頭鳥鎗衝咗入嚟要打劫,點不知個肥劫匪搜畫畫老師個女同學嘅身時摸到把手鎗,先發現原來佢哋係反扒大隊嘅警察,跟住幾個劫匪連同一眾扒手集團全部俾警察拉晒,而原來三個幪面劫匪嘅領導就係一早懷有異心嘅賊二哥胖子。

貴賓車廂裏面,黎叔俾小葉出賣亦都俾警察捉埋,而王麗王薄就去到醫療室陪住因為失血而暈咗嘅傻根;反扒大隊隊長(畫畫老師)入嚟同佢哋表露身份,話已經知道咗佢哋係劫寶馬通緝犯,除咗喺佢哋嘅行李度搜返個銀包出嚟,重話其實傻根包錢係佢喺滅火嘅時候掉包,講完就將舊錢塞返入傻根個袋入面。反扒隊長見佢哋都唔壞得晒,就由得佢哋係車廂裏面傾多陣,等車埋站先帶佢哋走。

王薄為咗唔想個仔係監獄度出世,於是趁車未到站,就帶住王麗喺天窗度出去諗住跳車走佬,點知喺車廂同車頂之間嘅通風槽度遇到想用同樣方法走佬嘅黎叔,只見黎叔手上拎住傻根包錢,原來佢襯王薄佢哋出咗嚟,就乘機用鐵勾勾咗包錢上嚟;王薄叫王麗走先,跟住返轉頭同黎叔決鬥,最終包錢亦物歸原主返返傻根身邊,呢個時候火車亦都到站。黎叔落車時化晒粧諗住趁亂走佬,但係最終都瞞唔過反扒隊長,俾人拉咗,而王薄就被發現死喺車頂嘅通風槽裡面,死因係俾支細鐵勾拮中條頸失血過多。

幾個月之後,喺北京一間餐館裏面,少少見肚嘅王麗正喺度食緊北京片皮鴨,因為有咗身孕,所以食量特別大,係咁食係咁食;呢個時候反扒隊長嚟到,將王薄嘅死訊話畀王麗知,重鼓勵佢唔好對個BB隱瞞老豆係咩人,因為佢好欣賞王薄為傻根而付出性命嘅情操。

主要出場人物同埋演出者[編輯]

  • 王薄:劉德華
  • 王麗:劉若英
  • 胡黎(黎叔):葛優
  • 胖子:尤勇
  • 四眼:林家棟
  • 小葉:李冰冰
  • 傻根:王寶強
  • 繪畫老師(便衣公安):張涵予
  • 劉總裁:傅彪
  • 肥劫車賊:范偉
  • 瘦劫車賊:馮遠征