奧克蘭 (加利福尼亞州)
| 奧克蘭 Oakland |
|||
 |
|||
|
|||
| 花名：Oaktown, The O, The Town | |||
 |
|||
| 經緯度 | |||
|---|---|---|---|
| 國家 |  美國 |
||
| 州 | Template:Country data California加利福尼亞州 | ||
| 郡 | 亞拉米達縣 | ||
| 現任市長 | 關麗珍（Jean Quan） | ||
| 面積 | |||
| 總面積 | 202.4 km² | ||
| 陸地面積 | 145.2 km² | ||
| 水域面積 | 57.2 km² | ||
| 人口 | |||
| 總人口（2008[[1]]） | 404,155（估計值） | ||
| 人口密度 | 2783.4/km² | ||
| 時區 | 太平洋標準時區 （UTC-8） |
||
| 夏令時間 | 太平洋夏令時區 （UTC-8） |
||
| 網站： http://www.oaklandnet.com/ | |||
奧克蘭（又譯做屋崙；英文：Oakland，意思係「橡木地」）係座城，係美國西部主要港口之一，位於加利福尼亞州三藩市灣區（San Francisco Bay Area）嘅東灣（East Bay），係阿拉米達縣（Alameda County）嘅首府，建於1852年; 北面係加利福尼亞大學柏克萊分校（UC Berkeley）所在嘅柏克萊巿；西面係通過舊金山-奧克蘭海灣大橋連接嘅三藩市（The City and County of San Francisco，又叫舊金山）；西南面係美國海軍及美國海軍陸戰隊（後備隊）基地兼島嶼城市阿拉米達（Alameda）同俗稱"政府島"嘅美國海岸防衛隊基地。奧克蘭市重完全包圍住一座富裕嘅獨立城市，皮德蒙特（Piedmont）。
目錄 |
[編輯] 史
[編輯] Ohlone
最早喺今日奧克蘭呢個位置定居嘅係一個叫做Huchiun嘅印第安部族，集中住喺今日美麗湖(Lake Merritt)一帶。
[編輯] 西班牙殖民時期
西班牙征服者（Conquistadors）喺1772年以西班牙國王名義佔領咗奧克蘭一帶嘅土地。十九世紀初，西班牙國王賜咗呢塊地畀一個叫做Luís María Peralta嘅軍人，畀佢喺嗰度開農場謀生（後來獨立咗並管理加州嘅墨西哥政府都無反對Peralta嘅業權）。農場就叫做Rancho San Antonio。農場裏面有一排橡樹由今日下城嘅位置生到出去阿拉米達咁滯。Peralta叫呢處做Ecinal，即係橡樹園嘅西班牙文。Peralta將呢塊地分咗畀佢四個仔，當中獲得大部份土地嘅Antonion同Vincent將呢塊地開放畀搬到嚟嘅人同埋啲生意佬。
[編輯] 一八五零年至一九零零年
美西戰爭中嘅敗方墨西哥將包括奧克蘭在內嘅大半江山輸咗畀美國政府。阿拉米達縣成立前，呢度有個徒置區叫做Contra Costa（意思係「彼岸」）。1852年加州議會通過法案，畀奧克蘭正式建市。
自此奧克蘭獲得大力發展。火車喺1860年代尾通車後，奧克蘭就做咗主要嘅火車總站。1868年，中太平洋公司（Central Pacific）喺奧克蘭起咗個「大碼頭」，即係今日嘅奧克蘭海港碼頭（Port of Oakland）。海港碼頭就做咗跨陸鐵路（Transcontinental Railway）同埋其他地區性鐵路嘅總站。而當年重未有海灣大橋，渡輪係東灣居民來往三藩市嘅重要交通工具。
今日嘅人工湖 Lake Merritt（美麗湖）當年只係一片濕地。1870年，當時嘅市長 Samuel Merritt 下令建造美麗湖。建造初期保留周圍嘅濕地作為野生動物保育區，但係持續有人喺嗰處起屋住令濕地消失。約莫喺1915年，美麗湖周邊變成咗今日咁嘅面貌，成為咗一個俾公園圍住嘅湖。
十九世紀後期，奧克蘭有多條來往其他城市嘅公共交通路線。1891年來往奧克蘭同柏克萊嘅電動公車開始營運，另外多條馬車同埋巴士路線組成一個所謂嘅Key System，即係今日AC Transit嘅前身。
[編輯] 1900年代至第二次世界大戰
由於人口日漸增加，奧克蘭市漸漸吞併附近嘅農莊同小鎮，例如佢東面嘅Brooklyn Township就變成而家嘅東奧克蘭。1906年，三藩市因地震受到破壞，大量居民搬咗去奧克蘭。
至1920年，已經有眾多工業家喺奧克蘭起咗工廠。1916年，通用汽車（General Motors）喺奧克蘭開咗條雪佛蘭（Chevrolet）生產線。到1929年，佳士拿（Chrysler）都喺奧克蘭開生產線，奧克蘭被譽為「西岸嘅底特律」。
1909年9月21號，中國飛機工程師馮如喺而家Laney College嘅位置成功試飛自製飛機，成為世上第一個中國飛行員。1920年8月9號，試驗性質嘅航空郵政由奧克蘭首次試飛。1927年9月17號，著名飛行員林白（Charles Lindbergh）主持開幕儀式，奧克蘭國際機場開始運作。1937年5月21號，傳奇女飛行員艾美麗雅·瑪麗·埃爾哈特（Amelia Mary Earhart）從奧克蘭起飛，開始咗佢人生最後一次飛行。
1936年11月12號，海灣大橋通車，當時上層橋面畀汽車行而下層橋面畀鐵路用。
[編輯] 第二次世界大戰
二次大戰期間，成個東灣都投入同打仗有關嘅業務。例如凱撒船塢（Kaiser Shipyards）同埋摩亞旱塢（Moore Dry Dock Company）。另外，罐頭食品需求龐大，所以有唔少食品廠喺度開廠，例如地們（Del Monte）生產商The Oakland Preserving Company。大戰唔只為奧克蘭帶嚟商家，同時亦吸引咗全國各地嘅勞工；不過帶嚟生產力之餘亦帶嚟當時南部州份嘅種族隔離主義。
[編輯] 戰後
戰後，因為造船業同軍事工業停咗，令就業機會大減，唔少人因為咁離開奧克蘭搬去附近嘅城市。人係少咗，但奧克蘭嘅種族問題就變差咗。五十年代奧克蘭警察局（Oakland Police Department，OPD）請咗一批南部嚟嘅差人，佢哋攞家鄉嗰一套嚟呢度執法，引發唔少種族衝突。截至1966年，奧克蘭警察局661個差人當中只有16個係黑人。全國各地一連串差人打黑人事件後，Merritt College 學生 Huey Newton 喺1966年10月喺奧克蘭組織咗「黑豹黨」（Black Panther Party，BPP）宣稱以武力自衛。同一時期，奧克蘭市開始要面對毒品氾濫、黑社會、及暴力罪案等等一大堆以前無嘅問題。
[編輯] 一九八零年代及其後
自八十年代起，越來越多拉丁美裔移民搬入奧克蘭（尤其係Fruitvale區一帶）。呢個區係奧克蘭舊區之一，原屬Peralta家族，所以比較吸引嗰啲講西班牙話嘅拉丁美裔移民。
1989年10月17號，影響成個三藩市灣區嘅六點九級地震（Loma Prieta）震冧咗一段架空嘅行車天橋，四十二人死。地震亦導致間建築物損毀，包括海灣大橋。
1991年10月20號，奧克蘭附近嘅柏克萊山發生大火，燒毀約莫六平方公里土地、差唔多四千間屋，一百五十人受傷，廿五人死；經濟損失約十五億美元。
2009年1月1號凌晨兩點，灣區捷運鐵路（Bay Area Rapid Transit, B.A.R.T）警察部（BART Police）幾個差人喺Fruitvale車站月台上盤問幾個人。期間白人警員Johannes Mehserle 開槍打死已經趴咗喺地下嘅黑人青年Oscar Grant III。有乘客拍攝到當時情形，但開槍警員無被其他同事拉返去調查，重反而玩失蹤。片段被放上分享網站Youtube，公眾對呢件事扯晒火。一月七號，大批有色人種上街示威，示威最後變成暴動。涉案警員喺1月14號被人喺內華達州捉返嚟候審。英文維基相關條目
2009年3月21號，假釋犯Lovelle Mixon喺街上被截查時開槍打死兩個差人，奧克蘭市警察局立即聯同阿拉米達縣警局（Alameda County Sheriff's Office，ACSO）、加州公路巡邏隊（California Highway Patrol，CHP）、同埋捷運鐵路警察部一齊搜捕。當奧克蘭警察局攻擊小隊去到Mixon藏身處時，Mixon 開槍打死兩個行頭嘅三柴，又打傷咗行第三個嘅差人；但最後都係俾後面嚟嘅差人打死咗。 英文維基相關條目
華裔候任市長關麗珍（Jean Quan喺2011年1月3號宣誓上任，成為奧克蘭市首位華裔市長同埋首位女市長。
2011年10月10號，受「佔領華爾街行動」影響，「佔領行動」嚟到奧克蘭，成為「佔領奧克蘭行動」（Occupy Oakland）。示威者聚集喺市政府前面嘅 Frank H. Ogawa 廣場並且紮營露宿。「佔領奧克蘭行動」持續到11月中，期間示威者同執法人員爆發多次衝突，3名示威者重傷，其中1人危殆。由於傷者可能因執法人員使用過度武力而受傷，輿論抨擊市政府處理手法。另外有1名示威者俾人開槍打死咗，兇手未搵到。
[編輯] 地理、氣候
[編輯] 地理
奧克蘭市大約位於北緯37度48分，西經122度15分。總面積係202.4平方公里（78.2平方英里），陸地面積有145.2平方公里（56.1平方英里），水面積係57.2平方公里（22.1平方英里）。沿海灣大部分地方係平地，再入啲就係山。粗略可以將奧克蘭分做北、東、西、同埋中四個區。
由於喺正聖安德烈亞斯斷層（San Andreas Fault）上面，奧克蘭同區內其他城市一樣，周時受地震威脅。
[編輯] 氣候
夏天乾燥炎熱但係冬天潮濕寒冷。日間氣溫可以低至華氏40度（攝氏7度）高至80度（攝氏25度）。降雨量有4.85吋至0.1吋左右。
| 月份 | 一月 | 二月 | 三月 | 四月 | 五月 | 六月 | 七月 | 八月 | 九月 | 十月 | 十一月 | 十二月 | 全年 |
| 紀錄上最高溫度 | 74°F（23.3°C） | 81°F（27.2°C） | 84°F（28.9°C） | 97°F（36.1°C） | 105°F（40.6°C） | 107°F（41.7°C） | 103°F（39.4°C） | 101°F（38.3°C） | 109°F（42.8°C） | 103°F（39.4°C） | 90°F（32.2°C） | 82°F（27.8°C） | 109°F（42.8°C） |
| 紀錄上最低溫度 | 30°F（-1.1°C） | 29°F（-1.7°C） | 34°F（1.1°C） | 37°F（2.8°C） | 43°F（6.1°C） | 48°F（8.9°C） | 51°F（10.6°C） | 50°F（10.0°C） | 48°F（8.9°C） | 44°F（6.7°C） | 36°F（2.2°C） | 26°F（-3.3°C） | 26°F（-3.3°C） |
| 平均最高溫度 | 58.1°F（14.5°C） | 60.2°F（15.7°C） | 64.2°F（17.9°C） | 66.4°F（19.1°C） | 69.9°F（21.1°C） | 73.6°F（23.1°C） | 75.7°F（24.3°C） | 78.5°F（25.8°C） | 80.6°F（27.0°C） | 75.1°F（23.9°C） | 68.9°F（20.5°C） | 59.6°F（15.3°C） | 66.9°F（19.39°C） |
| 平均最低溫度 | 44.7°F（7.1°C） | 47.6°F（8.7°C） | 49.0°F（9.4°C） | 50.6°F（10.3°C） | 53.3°F（11.8°C） | 55.7°F（13.2°C） | 57.0°F（13.9°C） | 58.3°F（14.6°C） | 58.2°F（14.6°C） | 55.2°F（12.9°C） | 49.4°F（9.7°C） | 44.8°F（7.1°C） | 52.0°F（11.1°C） |
| 降雨量 | 4.85吋（123.2毫米） | 4.27吋（108.5毫米） | 3.56吋（90.4毫米） | 1.38吋（35.1毫米） | 0.57吋（14.5毫米） | 0.11吋（2.8毫米） | 0.07吋（1.8毫米） | 0.10吋（2.5毫米） | 0.33吋（8.4毫米） | 1.33吋（33.8毫米） | 3.14吋（79.8毫米） | 3.23吋（82.0毫米） | 22.94吋（582.7毫米） |
| 平均降雨日數（雨量多過百分之一英吋） | 10.5日 | 10.1日 | 10.5日 | 5.9日 | 3.0日 | 1.0日 | 0.3日 | 0.7日 | 1.8日 | 3.8日 | 8.5日 | 8.7日 | 64.8日 |
[編輯] 人口及收入
[編輯] 人口
根據2010年人口普查，奧克蘭市嘅人口有 390,724 人；每平方英里嘅人口密度係 5,009.2 人。當中有 134,925 位白人（佔大概百分之三十四點五）、109,471 位黑人（佔大概百分之廿八）、99,068 位拉丁美裔人（佔大概百分之二十五點四）、65,811 位亞裔人（佔大概百分之八點七）、53,378 位「其他族裔」人士（佔大概百分之十三點七）、21,877 位擁有兩種或以上血統人士（佔大概百分之五點六）、3,040 位土著（佔大概百分之零點八）、以及 2,222 位太平洋諸島族裔人士（佔大概百分之零點六）。
[編輯] 收入
2000年統計顯示：市內男性收入中位數係每年37,433美元，女性收入中位數係每年35,088美元；家庭收入中位數係每年44,384美元。百分之十六點二家庭同埋百分之十九點四嘅人口生活喺貧窮線以下。
喺2008年，男性收入中位數係每年46,383美元，而女性收入中位數係44,690美元；家庭收入中位數係每年55,949美元。百分之十五點三嘅家庭同埋百分之十七嘅人口生活喺貧窮線以下。
至2009年8月為止，失業率係百分之十五點二。
[編輯] 華埠
華人最早喺1850年代掏金潮時期就聚居奧克蘭，不過受到十九世紀排華潮影響，奧克蘭嘅華埠搬過幾次，直到1880年代落腳喺而家嘅委士打街（Webster Street）同埋第八街（8th Street）地區。奧克蘭華埠早期規模遠比三藩市嘅細；1980年代華人移民增加後，目前以位於第九街嘅中華文化學院同埋富興中心為主，大約包含百老匯街東邊嘅區域，由第七街到第十一街以至 Laney College 附近，家下嘅規模同三藩市嘅華埠不相上下。美麗湖東南邊嘅東十四大道（E 14th Avenue）附近另外有東南亞華人同埋越南人聚集嘅小華埠（又叫新華埠）。
[編輯] 政府
奧克蘭市政府係一個「市長 - 議會制」政府。市長同埋議會裏面嘅參事都係由市內選民投票選出。市長任期係四年，參事每一任亦係四年。市長最多可以連任一次；參事可以無限次連任。八名參事一位擔任議長，其餘七位代表七個選區；市長指派部分市政府官員（部分官員係民選）。
雖然地理上奧克蘭市係喺阿拉米達縣裏面，但係市政府同縣政府之間並無從屬關係。
喺加州嘅州議會當中，奧克蘭係加州參議院第九選區，以及加州眾議院第十四、十六同十八選區。奧克蘭亦係聯邦眾議院第九國會選區。到2012年1月為止，以上選席都係由民主黨議員出任。
[編輯] 教育
[編輯] 幼稚園、小學、初中、高中（K-12）
市內公立嘅中、小學同埋幼稚園通常屬於「奧克蘭聯合校區」。喺2007年，奧克蘭聯合校區有五十九間小學、二十三間初中、同埋十九間高中，當中有九間「特別教育」學校同埋四間成人學校。
除咗公立學校外，亦有一啲私立學校。公立同私立學校以外又有二十五間「特許學校」。特許學校唔算係私立學校，但係又唔歸聯合校區管理。
[編輯] 專上
市內合資格嘅學院同大學有以下呢幾間：
- Laney College
- Merritt College
- California College of the Arts
- Holly Names University
- Lincoln University
- Mill College
- Patten University
- Samuel Merritt College
[編輯] 相
-
大概1917年喺奧克蘭成立嘅雪佛蘭生產線
-
1917年奧克蘭市議會
-
奧克蘭市鳥瞰圖
-
奧克蘭市早期地圖（大概1900年）
-
奧克蘭市美麗湖 (Lake Merritt)一帶嘅夜景
-
1989年大地震 Loma Prieta 中冧咗嘅一段天橋
[編輯] 出面網頁
- 奧克蘭市官方網頁 （英文）
- Oaklandhistory.com （英文）
- 奧克蘭市公共圖書館 （英文）
- 奧克蘭市被稱為Oaktown嘅佐證
[編輯] 相關地區
