奧運聖火
奧運聖火係喺奧運會期間喺主場館一路點住嘅火焰，佢象徵光明、團結、友誼、和平、正義。
奧運聖火源自古希臘神話傳說，而現代奧運會喺1912年顧拜旦提出點聖火建議，喺1928年奧運會實施點聖火儀式。由1936年開始，奧運聖火會由奧運會故鄉希臘奧林匹克點著火把，然後接力將火把喺奧運會開幕前一日傳到去主辦國，然後交畀主辦國代表點著火塔，個火一路點到閉幕[1]。
起源[編輯]
奧運聖火起源於古希臘神話傳說，原本係古雅典百姓祭月活動入面一種宗教儀式。每年夏至嗰日，古希臘人都會搵雅典嘅宙斯信徒，用賽跑方式決定邊個負責點祭壇嘅聖火。
聖火歷史[編輯]
奧運聖火曾經係古代奧運會一項傳統。
而現代奧運會開始點聖火，係喺1920年開始，嗰陣為咗紀念第一次世界大戰陣亡嘅協約國官兵，於是喺比利時安特衛普第七屆奧運會上，第一次點聖火。之後喺1928年國際奧委會決議通過，以後每屆奧運會都點聖火，一路點到奧運會結束。1936年柏林第十一屆奧運會，就第一次用接力方式，由奧運發源地希臘將火炬傳去主辦國。為咗弘揚奧運精神，加強現代奧運會同古代雅典奧運會關聯，奧運聖火會先喺希臘奧林匹亞山上嘅希拉（Hera）神廟，用太陽光生個火種，之後點着火把，然後開始接力傳送到去主辦國，之後一路到而家都咁做法[2]。