客家

出自維基百科,自由嘅百科全書
跳去: 定向搵嘢

客家(粵讀:haak³ gaa¹)係漢民族底下嘅民系,大多生活響福建廣東江西香港台灣,響東南亞也很多,響全世界大約4000萬。客家人嘅首要語言客家話同埋各地語言。

語言[編輯]

客家人嘅母語主要係客家話,但喺廣東,由於白話嘅影響力同推普,所以唔少客家人識講白話同普通話,但對內係講客家話,而客家人嘅“寧賣祖宗田,不賣祖宗言”就頗出名。客家話保存咗啲古語嘅發音、語法、辭彙,譽為古漢語活化石,誕生於河南一帶嘅古漢語之所以喺東南一帶保存最好,則同包括客家南遷在內嘅漢人南渡相關。

漢人南渡同民系形成[編輯]

客家之名,係相對於“主人”嘅稱謂,亦即外江人。客家呢個名最初出自本地人對佢哋嘅稱呼,後來客家民系、族群認同形成,呢個他稱就轉爲自稱,保留至今。得噉嘅名,表明相對周邊嘅原住民、先居漢人而言,客家人係比較遲進入當地嘅移民。

就其移民史睇,主要係三次嘅南遷逐漸從中原來到東南。

  • 第一次喺晉朝。公元291年,西晉八位諸侯王爲咗爭皇位,內戰十六年,北方遊牧民族乘機挺進中原農耕區,建政立國,史謂五胡亂華。中原民不聊生,啲人就陸續南遷避難。西晉滅亡之後,司馬睿立東晉並遷都建康(今日南京),更加之帶動一大批遺民隨晉室南渡。呢啲遺民大多官仕僚紳、世家大族,所以叫做衣冠南渡。大部分人遷到江淮,最遠到江西。
  • 第二次喺唐末。公元875年,黃巢之亂,勢力好快捲到中原。傳聞黃巢軍四圍濫殺無辜,喺圍攻陳州(今河南淮陽)時,由於食晒軍糧,士兵就捉人來食,將俘虜掟入幾百個大坑內,直接用大石碓搗碎,和骨而食,號稱“啖食數十萬人”,啲人緊係聞風而逃啦。後尾仗打到南來,晉時避難江淮嘅人被迫繼續南遷到更南嘅福建、江西。
  • 第三次喺兩宋之交。1127年,女真人佔咗北宋京城開封,北宋淪亡,同年趙構立南宋並遷都臨安(今杭州),呢次南渡亦帶動大批宋代顯赫家族南渡,亦有好多中原百姓唔願畀女真人統治,亦都跟住南遷。呢次南遷喺史上最大嘅漢人南渡,之後,客家人入粵,主要住喺閩粵贛交界,而客家嘅概念基本成型,出現呢支民系。

土客武鬥[編輯]

北來嘅客家人唔多受當地人嘅歡迎,因為閩粵贛交界嘅資源本來唔多,作為山區,叫做「八分山,一分田一分水」,剎時間咁大棚人殺來,勢必同當地人爭田爭水啦,喺爭奪生存空間資源之餘,再加上語言、風俗差異,土客爭端激烈。

明清時,人口增多,資源更加唔夠分,「客家佔地主」,就有大小武裝衝突──土客械鬥。1854年,鶴山嘅當地人同客家人各抄家生來大戰,呢場械鬥幾萬人參與、歷時14年,直到政府出面干涉先停低。

建築[編輯]

爲咗保護自己嘅生存空間,客家人就發明咗獨特建築──土樓,又叫客家圍屋。由於舊時住喺中原,客家人受儒家影響好深,注重家族觀念,多數喺南遷時係大家族一齊行,再加上同當地人唔合,爲咗抵擋當地人同兵災匪患,就造出圍樓而居嘅城堡。