小泉純一郎

出自維基百科,自由嘅百科全書
小泉純一郎
日本 第87至89代 內閣總理大臣
任期
2001年4月26號-2006年9月26號
君主明仁
前任森喜朗
繼任安倍晉三
日本 第38代 農林水產大臣
任期
2005年8月8號-2005年8月11號
總理兼任
前任島村宜伸
繼任岩永峰一
日本 第133代 外務大臣
任期
2002年1月30號-2002年2月1號
總理兼任
前任田中真紀子
繼任川口順子
日本 第69至70、81代 厚生大臣
任期
1996年11月7號-1998年7月30號
總理橋本龍太郎
前任菅直人
繼任宮下創平
任期
1988年12月27號-1989年8月10號
總理竹下登
宇野宗佑
前任藤本孝雄
繼任戶井田三郎
日本 第55代 郵政大臣日文郵政大臣
任期
1992年12月12號-1993年7月20號
總理宮澤喜一
前任渡邊秀央
繼任宮澤喜一
第20代 自由民主黨總裁
任期
2001年4月24號-2006年9月20號
前任森喜朗
繼任安倍晉三
日本 日本眾議院議員
任期
1972年12月11號-2009年7月21號
繼任小泉進次郎
選區神奈川縣第二區 → 神奈川縣第十一區
個人資料
出世 (1942-01-08) 1942年1月8號(82歲)
大日本帝國神奈川縣横須賀市
政黨自由民主黨清和政策研究會→無派系)
配偶宮本佳代子(1978年至1982年結婚)
仔女小泉孝太郎(大仔)
小泉進次郎(二仔)
宮本佳長(細仔)
父母小泉純也(老豆)
小泉芳江(阿媽)
親屬小泉由兵衛(太公)
小泉又次郎(阿公)
豐島格(姐夫)
井料克己(表弟)
瀧川克里斯丁(新抱)
母校慶應義塾大學經濟學部

小泉純一郎(日文:小泉 純一郎/こいずみ じゅんいちろう Koizumi Jun'ichirō1942年1月8號—),係日本自由民主黨籍政治人,做過第87至89任日本首相,任期由2001年4月26號—2006年9月26號,係日本史上在任時間第四長嘅首相。另外佢仲做過厚生大臣、郵政大臣、自由民主黨總裁、外務大臣同埋農林水產大臣。

生平[編輯]

早年[編輯]

細個嘅純一郎同老豆純也

小泉純一郎1942年響神奈川縣横須賀市出世,出生於一個政治世家,老豆係前防衛廳長官小泉純也,而阿媽係前通信大臣小泉又次郎嘅獨生女小泉芳江。雖然話係政治世家,但由於阿爺又次郎同老豆純也先後響日本二戰投降後接受公職追放,所以過嘅生活同普通人差唔到幾遠,如果嗰日有得食,純一郎就會開心到跳起。

響神奈川縣立横須賀高等學校畢業之後,曾經考過東京大學但係失敗;之後改入慶應義塾大學經濟學部,1967年到英國倫敦大學學院留學,但佢最後冇攞到學士學位。1969年老豆病死,純一郎被迫返嚟日本。同年12月,跟住老豆做個政治人,代表自由民主黨參加第32回眾議院議員總選舉但失敗。

之後曾經做過福田赳夫嘅秘書。1972年再次代表自民黨參加第33屆眾議院議員總選舉,成功當選,加入福田赳夫派,後嚟同山崎拓、加藤紘一組成「YKK日文YKK (政治同盟)」。同時,佢又任命親信飯島勳做秘書。1978年同SS製藥創辦人泰道照山嘅孫女佳代子結婚,有三個仔,但係響四年後離婚。之後小泉再冇結婚。

政途[編輯]

政途早期[編輯]

成功當選後一年,出任第二次大平內閣嘅大蔵政務次官。1988年,響竹下改造內閣出任厚生大臣,係佢第一次入閣。1989年,時任首相竹下登因為醜聞太多而宣佈落台,隨後嘅首相宇野宗佑又響參議院選舉輸到底褲都冇,好快宇野就因為咁而唔撈。當時好多政治人出於對政治上嘅唔信任,提出參議院選舉要「引入單議席單票制」,連當時羽田孜都話支持;而小泉就強烈反對,所以小泉自此就同羽田作對。

1991年,自民黨選總裁,時任首相海部俊樹得到當時勢力依舊重係好大嘅竹下派(經世會)支持出選,小泉為咗對抗竹下派,聯同盟友山崎拓(渡邊派)、加藤紘一(宮澤派)打上招牌「海部続投阻止」「打底經世會支配」,所以三塚派(小泉所屬嘅派)、宮澤派、渡邊派組成反主流派,結果搞到海部內閣因為得唔到成個自民黨內部嘅支持,所以海部被迫退出選舉。

最後,呢次總裁選舉由宮澤喜一贏咗,而宮澤響之後都出任首相。小泉就響12月,出任宮澤改造內閣嘅郵政大臣。任內唔理黨內大多數黨員嘅意見,大力推動郵政私有化改革,差啲就因為咁而冇得撈。最後響郵政族議員嘅反對下告吹。

1993年,羽田孜聯同小澤一郎響對宮澤喜一嘅不信任動議入面投下關鍵嘅支持票,判定自民黨響第40回眾議院議員總選舉攞到過半數議席。小泉就響閣僚懇談會上,提出呢次行動嘅責任響宮澤身上,所以提出辭職,同時要求宮澤亦都應該要落馬。宮澤落台之後,由新黨代表細川護熙帶頭嘅聯盟響跟住落嚟嘅選舉贏咗,成功出任首相,係自二戰後第一個唔屬自民黨嘅首相,同時亦係自民黨第一次淪為在野黨。不過冇幾耐,自民黨好快就同社會黨組成執政聯盟,將細川趕落台,由社會黨嘅村山富市接任,而自民黨就派出河野洋平共同執政。小泉就偏咗去社會黨。

挑戰自民黨總裁[編輯]

1995年,社會黨響參議院總選舉大敗。河野洋平希望籍住今次氣勢,出選自民黨總裁,但係平成研究會(竹下派)就支持橋本龍太郎。河野可能意識到形勢唔對路,響冇耐就宣佈退選,令到支持佢嘅小泉大失預算。小泉佢曾經一度提名森喜朗出選,但係森喜朗唔肯,最後小泉做咗一個幾大膽嘅決定---由自己親自出選。黨內聽到之後,好多人都提出反對,因為小泉響郵政私有化改革上唔聽黨話,得罪唔少人。最後有三十幾位後生黨員出嚟支持小泉(其中一個就係小泉之後一任首相嘅安倍晉三)。雖然選舉最後由橋本以壓倒性嘅姿態贏咗,但開始有唔少人留意到有小泉呢個新丁。

1996年,出任緊第二次橋本內閣厚生大臣嘅小泉

1996年,村山富市宣佈唔撈,由橋本龍太郎接任,小泉響第二次橋本內閣出任厚生大臣。但係響1998年嘅參議院議員選舉之中,橋本帶領嘅自民黨輸得好慘,所以佢唔撈。臨走之前,佢提名咗三個接任人選:小泉純一郎、小淵惠三梶山靜六。但係由於小泉未能夠得到盟友山崎拓、加藤紘一兩個人支持,再加上佢又勸唔掂所屬嘅清和政策研究會,搞到最後由小淵接任。小泉事後嘆咗一啖氣:「小丑居然係我自己!」

2000年,時任首相小淵惠三突然病死,邊個接任成為一個大問題。最後,由得到黨內前輩青木幹雄支持嘅森喜朗出任,而原先由森做嘅清和會會長就由小泉接任。而森內閣唔少閣員都係由小泉推薦。

不過,由於森喜朗屬於傳統思想派,已經唔係好受歡迎;響上任之後重要成日講錯嘢,支持率急跌。意識到危機嘅反主流派加藤紘一、山崎拓公然要求森喜朗辭職,又聯同在野黨提出不信任動議。點知,同屬「YKK」嘅小泉呢次居然出嚟支持森喜朗。加藤因為咁而成日響媒體上講自己嘅主張;小泉就大力唱衰佢。之後加藤因為得唔到黨內足夠人嘅支持,放棄不信任動議,重因為呢次事件而得罪前輩,冇得做首相;而小泉佢就支持度大升。(呢次事件係加藤之亂

最後,森因為實在講錯嘢太多,迫住要落台。自民黨總裁因為咁而要重選。小泉第三次出選,對手有橋本龍太郎、麻生太郎龜井靜香。小泉以嶄新嘅形象而好受黨內歡迎,而今次加藤同山崎都出嚟支持佢。另外,佢揀咗探受師奶支持、前首相田中角榮嘅大女田中真紀子做助手。小泉響呢次最大嘅對手係橋本,而橋本亦係咁多位候選人入面最有望贏嘅人。但係佢為咗呢次選舉,已經攞埋自己嘅前途做賭注。佢響一次街頭演講上,用住好熱血嘅講嘢方式,講出「我要催毀自民黨!」、「反對我嘅人就係反對改革!」,得到咗一班希望「變天」嘅日本市民支持,因而畀人戲稱做「小泉旋風」。最後佢響2001年4月24號舉行嘅總裁選舉入面,以壓倒性嘅姿態贏出選舉。同月26號,屬於「無所屬之會」嘅中田宏土屋品子三村申吾三個人提名小泉做下一任內閣總理大臣,同日提名獲得通過。

出任首相[編輯]

2001年,成功當選首相嘅純一郎

2001年4月26號,小泉純一郎就任第87任內閣總理大臣。佢響第一次內閣上用唔少比較新奇嘅人,分別任命人氣高嘅石原伸晃做行政改革大臣、民間經濟學者竹中平藏做經濟財政政策大臣、選舉嗰陣嘅助手田中眞紀子做外務大臣(日本第一位女外相),而自由民主黨幹事長就搵嚟盟友、少數派領袖山崎拓。響第一次內閣入面,佢以「冇改革就冇經濟復蘇」做口號,先後將公營機關民營化,推行小政府政策,又將三種郵政服務私有化。雖然佢咁樣惹嚟唔少議員反對,但同時得到花名「改革派核心」。

響就職嗰陣,小泉內閣嘅支持度係日本二戰後最高嘅,介乎87.1%(讀賣新聞)到78%(朝日新聞)之間。正因為咁樣,小泉帶領自民黨響同年7月嘅參議院選舉之中大勝。

為咗兌現返自己參選時嘅承諾,佢決定響8月15號(終戰之日)嗰日以首相身份參拜靖國神社等國表示強烈反對,但小泉話已經預咗自己會畀人鬧,所以冇理咁多。最後佢提前咗兩日,響8月13號參拜。之後佢每一年都有去靖國神社,直至2006年首相生涯完咗。

9月11號,美國發生911襲擊。小泉發聲明,支持小布殊提出嘅「反恐戰爭」主義。佢又頒佈「恐怖主義對策特別措置法」,派出海上自衛隊美軍嘅後方支援,以支持美軍入駐阿富汗

響國際形勢越嚟越緊張嗰陣,外相田中真紀子同外務政務次官鈴木宗男起咗衝突,爆發「NGO事件」。小泉為咗掩飾呢次醜聞,就將田中炒咗魷魚,響2月1號宣佈由川口順子接任。但由於田中支持度實在太高,小泉內閣就因為呢次事件而搞到支持率趺咗差唔多一半,跌到剩返四五成左右。

2002年9月,佢突擊訪問北韓國防委員會委員長金正日,又進行咗第一次朝日首腦會談,簽埋《朝日平壤宣言》。金正日響會上承認自己綁架咗日本人(部份),仲畀小泉帶咗其中五個人返日本。但係其他響北韓死咗嘅另外八個人嘅家屬就非常不滿,仲響同小泉交涉期間鬧咗佢一餐。同日30號,佢第一次改造內閣,將金融擔當大臣由原先嘅柳澤伯夫換成竹中平藏。至此之後,就由堅持對不良債權處理問題上用強硬手段嘅竹中主導咗成個小泉內閣嘅經濟政策。

2003年3月,美國宣佈對伊拉克開戰,小泉表示支持,惹嚟在野黨嘅批評。唔單止係咁,小泉重宣佈將會派出陸上自衛隊去伊拉克幫手做戰後復興,同年7月成立自衛隊伊拉克復興支援群特別措置法。佢因此同時任美國總統小布殊關係好好,美日關係亦都出現前所未有嘅「蜜月期」。同時,佢籍住今次順勢成立咗有事關連三法制,填補咗日本多年嚟一直唔能夠解決嘅安全保障問題。

9月,響自民黨總裁選舉入面,前運輸大臣藤井孝男試圖將小泉趕落台,並且自立想當選總裁,結果響參議院議員團幹事長青木幹雄反對之下,藤井輸清光,而一直支持藤井嘅野中廣務仲響一個月之後退出政壇。至此,平成研究會(竹下派)連兩個核心人物都冇埋,勢力大減,變相由小泉帶頭嘅清和政策研究會(森派)領導咗成個自民黨。而佢亦都響選舉入面順利當選總裁,所以又改組內閣,其中響黨幹事長一職提名咗安倍晉三出任。10月10號,小泉宣佈提前解散眾議院,喺11月9號搞嘅眾議院選舉入面帶領自民黨贏咗,11月19號就任第88屆內閣總理大臣,並且組成第二次小泉內閣

2004年,小泉(右)同時任美國國防部長拉姆斯菲爾德(左)

2004年1月,佢正式派出陸上自衛隊去伊拉克。但係響同年4月,恐怖分子挾持咗幾個日本人,要求自衛隊由伊拉克撤軍,但係小泉以「堅決唔屈服響恐怖組織之下」嚟拒絕恐怖分子嘅要求。其中三位人質後嚟獲釋,但係剩低嘅一位人質香田證生就響六個月之後被殺。在野黨認為小泉要為香田嘅死負責,不過佢並未有公開道歉,而且仲認為個三位人質獲得釋放係自己嘅功勞。

5月,小泉再次訪問朝鮮,同金正日舉行第二次朝日首腦會談。小泉響會上宣佈會向北韓送二十五萬大米同值一千萬日圓嘅醫療用品,仲話要朝日交流正常化;而金正日就送咗其中五個響北韓被綁架嘅日本人返日本。

7月,響第20回參議院議員通常選舉入面,因為年金制度問題引起好大風波,而小泉響6月成立嘅年金制度改革更係惹嚟爭議,所以自民黨今次選舉淨係攞到四十九席,要加埋公明黨嘅十一席,先至贏到在野黨民主黨(五十席,比自民黨多一席)。

小泉佢最關心嘅野莫過於郵政私有化改革。佢籍住參議院通常選舉入面趁機改造內閣,將心腹竹中平藏任命做郵政民營化擔當大臣。響計劃決定好之後,同年4月又開設郵政民營化準備室,為改革做好準備。2005年,小泉正式將郵政私有化改革關連法案提上參議院,但係黨內出現好大反對聲音,其中最大反對黨係龜井靜香、平沼赳夫同綿貫民輔。佢知道後就擺出強硬姿態,堅決唔讓步,令到黨內嚴重分裂。7月5號,眾議院本會議審呢次法案,最後以233票贊成、228票反對,以些微票數通過。但係響交畀參議院之後,龜井揚言要推翻法案,最後響8月8號正式審當日,自民黨廿二位議員倒戈,令到法案以108票贊成、125票反對之下被否決。小泉嬲到震,即日就要求解散眾議院,又炒咗唔肯簽名嘅時任農林水產大臣島村宜伸。同日,佢以憲法第七條正式解散眾議院。

因為反對今次法案之中有唔少係自民黨成員,佢提名咗俗稱「刺客」嘅新一代候選人參選(而響參議院投下反對票嘅自民黨成員並冇參加呢次選舉)。佢利用劇場形政治,成功令到一向對政治冇乜信心嘅日本市民湧躍投票。最後喺呢次眾議院選舉入面,自民黨贏咗(攞到296席),聯同公明黨嘅31席,得到日本改憲勢力最想要嘅三分之二關鍵多數;呢次選舉亦係日本有史以嚟投票率最高嘅。媒體覺得呢次選舉好戲劇性,就稱之為「小泉劇場」。同年9月21號,小泉得到眾議院議員嘅壓倒性提名下,就任第89屆內閣總理大臣。響10月14號嘅特別國會會議上,佢再次提出郵政私有化改革關連法案,參眾兩院好多議員今次「轉軚」支持,令到法案獲得通過,完成咗小泉十幾廿年嚟嘅「心願」。

10月31號,佢組成第三次內閣(俗稱「後小泉時期」),將原先係總務大臣嘅麻生太郎下調到外務大臣;財務大臣就沿用返谷垣貞一;而內閣官房長官就用安倍晉三。同時小泉宣佈唔再連任黨總裁。

響2005年11月至2006年1月呢段時間,先後發生偽造結構計算書事件、皇位繼承問題、Livedoor總經理堀江貴文畀人拉咗同埋輸入美國牛肉等等問題上備受爭議,後小泉時期內閣一直受到在野黨強烈嘅評撃。除此之外,堀江貴文畀人拉一事越搞越大,甚至引發活力門事件,因為當時Livedoor股票正係升到好勁嘅時候就突然畀政府強制執笠,成個股票市場一度跌到好犀利;仲有黨員因為咁而自殺。活力門事件令到自民黨同小泉內閣支持度下趺。有見及此,通常國會後嚟通過咗「修改健康保險法其中一部份法律」嘅議案(最後響2008年成立後期高齢者醫療制度)。2006年8月15號(終戰之日),小泉最後一次以首相身份參拜靖國神社。

響小泉宣佈唔再參加黨總裁選舉之後,外界好關注佢接班人會係邊個,甚至列出四位人選:麻生太郎、谷垣貞一、福田康夫、安倍晉三(合稱「麻垣康三」)。響2006年9月20號(即自民黨搞總裁選舉當日),佢宣佈支持安倍晉三;9月26號正式辭職,結束五年半嘅首相生涯,正式由安倍接任。

卸任後[編輯]

響唔撈之後,小泉冇乜響公眾面前出現,響接受獨家專訪嗰陣冇乜嘢發表,又唔學其他人咁搞演講會。有唔少人掛住佢大刀闊斧嘅改革作風,提出「小泉再登板待望論」,但佢拒絕。而佢原先嘅清和會會長一職就由町村信孝接任。

2007年9月12號,安倍晉三宣佈因為身體問題而唔再做首相,所以唔單止市民,就連好多政治人都一下子就要求小泉復出,參加自民黨總裁選舉,但係小泉就話「我100%唔會出選!」後嚟,佢出嚟支持福田康夫,但就令到自己個前秘書官飯島勳宣佈唔撈(因為飯島同福田唱對台戲)。

退出政壇[編輯]

2008年,同佢唔同政見嘅麻生太郎以絕對優勢當選首相,小泉宣布唔再角逐跟住落嚟嘅眾議院議員選舉,言下之意即係要「退出政壇」。佢係二戰後第一個響唔再參加乜官職情況下就退出政壇(除咗有病在身嘅小淵惠三同池田勇人)。

不過,佢表示會繼續佢嘅政治活動。佢先後出任「創造夢想講習所」最高顧問、同埋自己創立嘅民間智庫「國際公共政策研究中心」顧問。2009年,佢派出二仔進次郎出選自己原先嘅地盤神奈川縣第十一區,最後成功當選(即所謂嘅世襲候補)。

退出政壇後[編輯]

2010年嘅小泉

小泉響做首相嗰陣係好支持核電,但係響2011年嘅東日本大震災之後就轉軚[1]。由2013年開始,佢成日出嚟開演講會、接受傳媒嘅專訪,發表自己響核電問題上嘅主張。佢呢個舉措得到咗眾人之黨渡邊喜美生活之黨嘅小澤一郎等等嘅在野黨支持。同年8月,佢去咗德國參觀核電廠,至此就更加堅定咗自己反核嘅諗法[2]

佢嘅戲劇性轉軚畀人視為係想建立一個新黨畀二仔進次郎[3]。另外,同樣做過首相嘅菅直人認為,小泉所講嘅嘢係可以畀時任首相安倍晉三壓力,迫安倍做改革;但係當時嘅經濟再生擔當大臣甘利明就話,小泉講嘅嘢「好抽象但簡單」[4]。同年11月,朝日新聞做咗一個民意調查,有54%嘅受訪者話支持小泉[5]

2014年1月,小泉為咗推動反核,就支持同樣反核嘅細川護熙參加東京都知事選舉[6],但係最後細川落選[7]

2018年1月10號,佢成為民間團體「零核電・可再生能源推動聯盟」嘅顧問,並且發表「零核電・可再生能源基本法案」,其中佢要求即時停止核電,得到在野黨嘅支持[8]

另外佢亦係公益財團法人日本尊嚴死協會嘅顧問[9]

政策[編輯]

郵政私有化改革[編輯]

小泉由政途早期開始已經支持同大力推動郵政私有化改革,早就響1979年出任大藏政務次官嗰陣已經提出,重曾經多次因為咁而差啲斷送自己嘅政治生涯。佢要刺激當時日本因為經濟泡沫而一直都好差嘅經濟,而當時郵政公團係全日本咁多公團之中最有錢、勢力最大嘅,所以小泉決定向郵政開刀。2005年,佢提出郵政私有化關連法案。呢個舉動惹嚟自民黨好多黨員反對,有唔少長老都勸佢唔好咁做,但小泉寧願同佢哋反面都要推動。響法案畀參議院否決之後,小泉寧願放棄首相呢個位都要解散參議院(解散咗國會等於要重新選過首相),選過後自民黨聯同公明黨攞到三分之二議席,令到法案獲得通過。

亦有人認為,佢之所以大力推行郵政私有化改革,並唔係想改革,而係佢同特定郵便局嘅私人恩怨[10]

年金改革[編輯]

小泉任內仲改革咗厚生年金制度(類似中國嘅養老金),引入總體經濟滑動,令到公的年金等等引起好大爭議嘅應稅所得減免英文Tax Deduction縮細咗。佢改為以2000年去到2025年,年金比例部份由60歲升至65歲,65歲以後嘅就改由以物價變動調整,厚生年金報酬比例優代做5%。另外佢重創設在職老齢年金,65-69歲嘅在職人士可以攞到。

而對於議員年金(即眾議院議員同埋參議院議員嘅互助年金),佢亦都支持廢除。最後國會議員互助年金同憲政功勞年金都分別響2006年同2003年廢除;而剩底嘅地方議會議員年金亦響2011年畀安倍晉三內閣廢除。

無聖域嘅結構改革[編輯]

內文:無聖域嘅結構改革

無聖域嘅結構改革,話係「冇一個領域會淨係供奉聖牛而唔做改革」[11],意思上就係唔理乜野機構都要改革咁解;而小泉本人更加叫佢做「新世紀維新」[12]

2002年10月,金融擔當大臣竹中平藏提出「金融再生計劃」,希望打擊網絡泡沫化同埋銀行嘅不良帳單。呢個改革係小泉任內嘅政策核心之一[13]

主要目的係將原本由政府負擔嘅年金、醫療保險等,轉由市民自己畀,減少咗政府嘅開支[14]。雖然經濟明顯係好咗,但依然冇帶領日本走出經濟泡沫嘅影響[13]

醫療制度改革[編輯]

由於日本政府每年響國民醫療支出高達三十萬億,為咗減少壓力,小泉決定提出「三方一両損」嘅醫療制度改革,又響議會通過相關法案。

財政整頓[編輯]

非公務員民營化[編輯]

稅務制度[編輯]

立場[編輯]

對二戰[編輯]

小泉純一郎

2005年8月15號,即二戰後六十周年,當時身為首相嘅佢發表《小泉談話》,形式繼承咗1995年嘅《村山談話》,當中佢提出對殖民地管治嘅懺悔:「我哋日本國響二戰期間對亞洲國家嘅侵略,為佢哋帶嚟巨大痛苦同埋損害。我會好謙虛咁接受呢一個事實,同時響呢到再次講聲對唔住同深刻嘅反省。我亦向響二戰入面死咗嘅人表示沉重嘅哀悼。我哋一定唔會唔記得呢次戰爭所帶嚟慘痛嘅教訓,亦唔會隨便出兵,為世界和平出一分力。……我哋正係以實際行動嚟體現我哋對戰爭所反省嘅60年。」呢次談話得到唔少中國人同部份日本學者支持。

小泉內閣電子雜誌[編輯]

女性天皇問題[編輯]

小泉在任期間曾經出現過皇位繼承問題,因為嗰陣冇一個皇室成員有仔。2006年,悠仁出世,皇位繼承問題先至平息咗少少。小泉並冇正面回應呢個議題,但係佢指出:「好難去否認女性天皇,唔好理我信唔信,總之將來嘅皇位繼承問題將會變得好困難。」

外交[編輯]

對亞洲國家[編輯]

2002年,小泉同金正日平壤見面

小泉響亞洲國家嘅外交上成效唔大,甚至響北方四島問題靖國神社問題上同中兩國嘈得好緊要,而至於日本同呢兩個國家關係轉差;而響亞洲國家上唯一處理得算係比較好嘅係對北韓嘅外交。

北韓由1977年至1983年多次綁架去當地交流嘅日本人,並且長期唔肯承認。好多被綁架人嘅家屬要求政府出手,亦困擾咗日本政府長達廿幾年。直至2002年,小泉高調到平壤訪問時任勞動黨主席金正日,展開第一次朝日首腦會談,兩國關係先至「破冰」。會上金正日承認朝鮮係綁架咗呢十三位日本人,而且道歉同埋認承唔會再畀同類事件發生。

2004年,小泉同胡錦濤響雅加達

2004年,小泉曾經響雅加達同時任中共主席胡錦濤會談。

對西方國家[編輯]

小泉沿用返清和會一貫嘅親美作風,任內同美國嘅關係打得好好。

評價[編輯]

小泉響政壇上多次引起改革,係名副其實嘅「改革派」;1998年,田中眞記子分別評價當時角逐自民黨總裁嘅小淵惠三、梶山靜六同小泉,其中佢評價小泉係「變人」[a],又根據佢大力推動郵政私有化改革,話佢係「自民黨嘅異端兒」。呢個詞語好快就做咗潮語,亦做咗佢嘅代名詞(後嚟田中響做小泉副手嗰陣仲話自己係變人個老婆)[15]

正面[編輯]

小泉任內同美國嘅關係非常好。

負面[編輯]

批評佢嘅人認為,小泉響減少公共事業上步伐太大,令到大都市同地方城市、大型公司同中小企嘅差距越嚟越大,形成咗「貧富懸殊」嘅問題;佢每年都參拜靖國神社,成日引起中韓兩國不滿,令到對亞洲國家嘅外交冇乜成效;另外佢響2003年派出日本自衛隊到伊拉克支援美軍,但就冇提出任何理由,所以覺得佢只係純粹討好美國[16]

雖然小泉響經濟嘅改革係成功迫到大企業嘅資金回流日本,創造新景象,但亦令到韓國籍機開拓外國市場,搶走原先屬於日本嘅主導地位。依家日本公司想去返外國搵食,可以話係難咗好多。

有評論人認為佢講野好似前日本首相、二戰甲級戰犯東條英機,用二分法搞民粹[17]

影響[編輯]

內文:小泉旋風
響度做緊嘢嘅小泉

小泉係日本至1972年至2010年期間,在任時間最長嘅首相(亦係日本史上任期第四長)。響佢上任之前,每個首相都淨係做得嗰一兩年,過吓癮就算,亦令到日本政壇混亂[18];唔單止係咁,當時日本政壇同普遍係由橋本派(橋本龍太郎)把持。佢嘅上任打破咗呢兩個現象,令到政界稍為穩定同埋有更加多新面孔[17]

另外,由佢掀起嘅「小泉旋風」,響日本政壇影響巨大。2001年當佢參選自民黨總裁嗰陣,小泉嘅競選口號「我要打低自民黨!」,呢句說話令當時唔少人嚇一跳:「自己人要打低自己人?」,而佢嘅目標「我要打低守舊嘅自民黨體系!重新實施政治同埋經濟改革!」,成功捉住咗當時因為經濟泡沫而經濟差嘅日本市民,再加上佢哋渴望政壇穩定,所以就紛紛支持佢,最後就令到佢成功出任首相[19][20];2005年,當時郵政民營化改革響參議院畀人推翻後,小泉史無前例咁解散國會,最後重以接近七成嘅比例獲得國會三分之二嘅門檻,將同黨好多傳統派拉落台,同埋瓦解咗好多由政治二世祖操控嘅地方(佢提名咗好多「刺客」參選)。到今時今日,依舊有唔少政治人(就好似小池百合子小泉進次郎)都承襲返當年小泉嘅作風,所以就算佢一早已經退出政壇,影響力依然巨大[21][22]

爭議[編輯]

學歷[編輯]

靖國神社問題[編輯]

小泉純一郎在任首相期間六次以首相身份參拜靖國神社,中韓等國都提出抗議,參拜嘅日子包括:

  1. 2001年8月13號
  2. 2002年4月21號
  3. 2003年1月14號
  4. 2004年1月1號
  5. 2005年10月17號
  6. 2006年8月15號(首次以首相身份喺終戰紀念日參拜)

唔接受表揚[編輯]

家族[編輯]

由左數起係純一郎、又次郎、正也、純也

太爺:小泉由兵衛

阿公:小泉又次郎

阿爸:小泉純也(原名鮫島純也)

阿媽:小泉芳江

兄弟姐妹:小泉道子、豐島隆子(嫁畀豐島格)、小泉信子、小泉正也

太爺小泉由兵衛響神奈川縣出世,係一位建築工人,後嚟因為海軍響當地起軍港而轉行做承包商,成立「小泉組」做生意。為咗唔畀手下畀外人蝦,「小泉組」慢慢發展成當地一個極具勢力嘅黑幫。由兵衛有三個仔,分別係又次郎、金三、岩吉(另外一個早死)。

阿公小泉又次郎(1865 - 1951)響大佬早死之後唔肯接手家業,偏要走去當兵、做記者,激死老豆。後嚟佢轉行玩政治,先後出任横須賀市長、眾議院副議長同通信大臣,同埋做立憲政友黨幹事長。出於家族嘅關係,佢成身都係紋身,因此又畀人叫做「刺青大臣」。又次郎嘅正室娜瑤冇仔女,而妾侍石川初生咗個獨生女小泉芳江(1907 - 2001)。

老豆小泉純也(1904 - 1969),原本姓鮫島,鹿兒島縣人。純也嘅老豆做生意失敗,又死得早,所以屋企好窮,自細已經出嚟捱世界。1930年,佢大學畢業之後加入立憲政友黨打工,識咗芳江。但由於純也出身卑微,又次郎因此反對佢同芳江嘅戀情。兩個人曾經一度私奔東京,最後又次郎迫於無奈(話嗮佢都得芳江一個細路),唯有接受呢門婚事。純也成為小泉家嘅入贅女婿之後,亦都入行玩政治,先後出任眾議院議員同防衛廳長官。佢同芳江有五個仔女,分別係道子、隆子、信子、純一郎同正也。

三家姐信子曾經做過純一郎嘅秘書同埋純也嘅秘書官,而細佬正也亦都曾經做過純一郎嘅私人秘書。二姐夫豐島格(1930 - )係通產官僚,曾經出任資源能源廳長官,依家已經退出。純一郎重有個表弟叫井料克己,係前横須賀市議會議長。

前妻宮本佳代子,神奈川縣鐮倉市出世,係SS製藥創辦人兼前會長泰道照山嘅孫女。雖然係千金,但係佳代子學歷唔算低,畢業於日本出名私立學校青山學院。唔少同過佢接觸嘅人都話佳代子係個「才華橫溢嘅女仔,學歷高,有住出眾嘅發言能力同埋意志力強」。1978年,當時仲係青山學院大學經濟學部四年級生嘅佳代子響福田赳夫嘅介紹下,同當時新進議員純一郎結婚。當時呢門婚事受到泰道家嘅反對,認為佳代子嘅性格唔適合嫁入政治家族,但係純一郎嘅誠意打動咗佢地。婚禮響東京王子飯店搞,聽講個結婚蛋糕外形好似國會議事堂

兩個人先後生咗大仔孝太郎同二仔進次郎。後嚟佳代子接受唔到小泉家族嘅諸多規矩,選擇離婚。大仔同二仔歸純一郎,而當時重留響阿媽個肚入面嘅細仔就畀佳代子(有傳言呢個仔叫宮本佳長,但未獲小泉家證實)。兩個人離婚之後完全冇來往,直至2013年佳長嘅婚禮[23]

大仔孝太郎(1978 - ),係一位演員;二仔進次郎(1981 - )就繼承老豆飯碗做政治人,2019年同藝人瀧川克里斯丁結婚,有一個仔。三仔宮本佳長,響老豆阿媽離咗婚之後先至出世。純一郎曾經走去家庭裁判所到要求攞到佳長嘅撫養權,但最後判咗畀佳代子。響初中畢業之後,佳長到美國田納西州一間高中讀書,畢業後到京都一間私立大學修讀中國語系。佢響2013年結婚。

個人生活[編輯]

2006年6月30號,小泉參觀貓王嘅優雅園

響同佳代子離婚之後,小泉就再冇結婚,仲話「離婚所浪費嘅精神係結婚嘅十倍」,但係咁並唔代表佢冇同人傳過緋聞。響當年出任過四次小泉內閣、花名「小泉內閣一枝花」嘅環境大臣小池百合子就係其中之一。小池本身係由小泉提擕下由新聞主播轉行玩政治,所以有傳同佢私底下好熟。2006年,小池響屋企暈低,外界估佢係身體有事,但點知《新潮周刊》就爆話佢係為咗殉情而「割腕自殺未遂」,對象正正就係小泉[24]

小泉係X JAPAN華格納嘅fans,曾經多次參加X JAPAN嘅演唱會,其中一首歌《Forever Love》重響2001年小泉競選自民黨總裁嗰陣做背景音樂;而X JAPAN前結他手hide仲同小泉係同鄉,所以佢一直都致力響鄉下起hide紀念館。貓王皮禮士利係佢最鍾意嘅歌手,曾經響2006年6月30號同埋小布殊一齊拜訪貓王生前住嘅地方優雅園,期間佢仲唱起《Love Me Tender》。

另外佢鍾意睇嘅嘢仲有歌劇、狂言、歌舞伎、電影;幾識玩連珠,段位係二段;最鍾意睇嘅小說係百田尚樹嘅《被叫作海賊的男人》、電影就係2017年嘅美女與野獸

歷任內閣[編輯]

第一次內閣 第一次小泉第一次改造內閣 第一次小泉第二次改造內閣 第二次內閣 第二次改造內閣 第三次內閣 第三次改造內閣
內閣宮房長官 福田康夫 細田博之 安倍晉三
總務大臣 片山虎之助 麻生太郎 竹中平藏
法務大臣 森山真弓 野澤太三 南野知惠子 杉浦正健
外務大臣 田中真紀子
小泉純一郎
川口順子
川口順子 町村信孝 麻生太郎
財務大臣 鹽川正十郎 谷垣貞一
文部科學大臣 遠山敦子 河村建夫 中山成彬 小坂憲次
厚生勞動大臣 坂口力 尾辻秀久 川崎二郎
農林水產大臣 武部勤 大島理森
龜井善之
龜井善之 島村宜伸
小泉純一郎
岩永峰一
岩永峰一 中川昭一
經濟產業大臣 平沼赳夫 中川昭一 二階俊博
國土交通大臣 林寬子 石原伸晃 北側一雄
環境大臣 川口順子
大木浩
鈴木俊一 小池百合子
國家公安委員會委員長 小野清子 村田吉隆 沓掛哲男
男女共同參畫擔當大臣 福田康夫 細田博之 豬口邦子
防災擔當大臣 村井仁 鴻池祥肇 井上喜一 村田吉隆 沓掛哲男
防衛大臣 中谷元 石破茂 大野功統 額賀福志郎
科學技術政策擔當大臣 尾身幸次 細田博之 茂木敏充 棚橋泰文 松田岩夫
金融擔當大臣 柳澤伯夫 竹中平藏 伊藤達也 與謝野馨
經濟財政政策擔當大臣 竹中平藏 與謝野馨
規制改革擔當大臣 石原伸晃 村上誠一郎 中馬弘毅
沖縄及北方對策擔當大臣 尾身幸次 細田博之
構造改革特區擔當大臣 鴻池祥肇
個人情報保護擔當大臣 細田博之 茂木敏充
産業再生機構擔當大臣 谷垣禎一 金子一義 村上誠一郎
食品安全擔當大臣 谷垣貞一 小野清子 棚橋泰文 松田岩夫
青少年育成及少子化對策擔當大臣 小野清子 南野知惠子 豬口邦子

笑料[編輯]

  • 響做第二次橋本內閣嘅厚生大臣嗰陣,曾經響國會發表好有爭議性嘅言論:「如果我唔繼續我嘅郵政私有化改革,我就辭職。」結果,佢所屬嘅自民黨冇人出聲,反而在野黨就全部拍手支持。

[編輯]

  1. 即中文嘅「奇人」

[編輯]

  1. ゼロ 小泉純一郎元首相:時事ドットコム. (日文). 喺2021-07-13搵到.
  2. 日相小泉:零核電要馬上做 | MSN 新聞頻道. web.archive.org. 2013-09-04. 原著喺2013-09-04歸檔. 喺2021-07-13搵到.
  3. Nishiyama, George (2013-10-02). "Fukushima Watch: Popular Ex-PM Koizumi Comes Out Against Nukes". Wall Street Journal (美國英文). ISSN 0099-9660. 喺2021-07-13搵到.
  4. Nishiyama, George (2013-10-16). "Fukushima Watch: Former PM Koizumi Picks Up Anti-Nuclear Torch". Wall Street Journal (美國英文). ISSN 0099-9660. 喺2021-07-13搵到.
  5. "Ex-Japanese Prime Minister Junichiro Koizumi urges zero nuclear power". UPI (英文). 喺2021-07-13搵到.
  6. 川元首相が出馬か? 東京都知事選 見えてきた戦いの構図 DAILY NOBORDER - Yahoo!ニュース. web.archive.org. 2014-01-04. 歸檔時間2014-01-04. 喺2021-07-13搵到.{{cite web}}: CS1 maint: bot: original URL status unknown (link)
  7. 泉談反核夢 細川護熙落淚 - 20140124 - 國際. . 喺2021-07-13搵到.
  8. INC, SANKEI DIGITAL (2018-01-10). . (日文). 喺2021-07-13搵到.
  9. 員一覧 | 公益財団法人 日本尊厳死協会 (日文). 2020-03-11. 喺2021-07-13搵到.
  10. 紺谷典子 (2008). 成経済20年史. 幻冬舎. ISBN 978-4344981027.
  11. . (中文). 喺2021-07-11搵到.
  12. . kokkai.ndl.go.jp. 喺2021-07-16搵到.
  13. 13.0 13.1 たんした小泉造改革 社会と国民に何もたらした/貧困と格差 際限なし. www.jcp.or.jp. 喺2021-07-16搵到.
  14. 胡雅雯 (2019-01-30). . 港01 (香港中文). 喺2021-07-16搵到.
  15. 人・軍人・変人 | 時事用語事典 | 情報・知識&オピニオン imidas - イミダス. 報・知識&オピニオン imidas. 喺2021-04-04搵到.
  16. Company, The Asahi Shimbun. 壊者か救世主か?小泉首相の劇場政治が開幕 - 星浩|論座 - 朝日新聞社の言論サイト. RONZA (日文). 喺2021-04-04搵到.
  17. 17.0 17.1 相多如走馬燈 多災平成的變遷和停滯 | 國際 | 重點新聞 | 中央社 CNA. www.cna.com.tw (中文). 喺2021-08-27搵到.
  18. (香港中文). 喺2021-07-16搵到.
  19. 鄭仲嵐 (2019-09-18). . The News Lens 關鍵評論網 (中文). 喺2021-04-05搵到.
  20. Storm.mg (2019-04-04). 新聞流像極了小泉旋風,失落的民心都想靠吸大菸自我陶醉-風傳媒. www.storm.mg (臺灣中文). 喺2021-04-05搵到.
  21. HK01特約殺東京以後:小泉模式的再度回歸?. Glocal (美國英文). 2017-10-02. 原著喺2021-04-17歸檔. 喺2021-04-05搵到.
  22. 藺思含 (2021-03-15). . 港01 (香港中文). 喺2021-08-28搵到.
  23. INC, SANKEI DIGITAL (2019-09-13). . (日文). 原著喺2021-03-22歸檔. 喺2021-02-24搵到.
  24. 中時新聞網. 歸美女主播又鬧緋聞!小泉進次郎父子人生如戲 - 國際. (中文). 喺2021-02-26搵到.