居禮夫人
居禮夫人（又叫居里夫人，全名瑪莉亞·斯克羅多夫斯卡·居禮，Maria Skłodowska-Curie，1867年11月7號—1934年7月4號）係波蘭物理學家同放射化學家，亦係世界上第一個獲得諾貝爾獎嘅女科學家。
佢攞過兩次諾貝爾獎，一次係化學，一次係物理。1903年同丈夫皮埃爾·居禮同埋亨利·貝克勒爾分享咗諾貝爾物理學獎，1911年又因放射化學方面嘅成就獲得諾貝爾化學獎。而佢之所以得到諾貝爾化學獎，係因為佢發現咗鐳呢一種元素。
佢亦係「居禮學院」嘅始創人。
[編輯] 生平
居禮夫人1867年喺波蘭華沙出世，曾經患咗一年嘅精神病。由於係女性，佢唔可以響任何俄羅斯或者波蘭嘅大學繼續進修，所以做咗幾年嘅家庭教師。最後，佢喺家姐嘅經濟支援下移居法國巴黎，而且響 Sorbonne（巴黎大學嘅舊名）學數學同物理。響嗰度，佢成為咗該校第一名女性講師。
居禮夫人響 Sorbonne 識咗另一名講師，皮埃爾·居禮，即係佢後來嘅丈夫。佢哋兩個成日一齊做放射性物質嘅研究，以瀝青鈾礦石為主，因為呢種礦石嘅總放射性比佢所含嘅鈾嘅放射性重要強。1898年，居禮夫婦對呢種現象提出咗一個邏輯嘅推斷：瀝青鈾礦石中一定有某種未知嘅放射成分，佢放射性遠遠大過鈾。響12月26號，居禮夫人公佈咗呢種新物質存在嘅設想。
之後嘅幾年裏面，居里夫婦不斷噉提煉瀝青鈾礦石中嘅放射成分。努力不懈之後，佢哋終於成功分出咗氯化鐳，重發現咗兩種新嘅化學元素：釙（Po）同鐳（Ra）。因為佢哋喺放射性上嘅發現同研究，居禮夫婦同亨利·貝克勒爾一齊分享1903年嘅諾貝爾物理學獎，居禮夫人亦因此成為歷史上第一個獲得諾貝爾獎嘅女性。八年之後嘅1911年，居禮夫人又因為成功分離鐳元素而獲得諾貝爾化學獎。出乎意外嘅係，喺居禮夫人獲得諾貝爾獎之後，佢冇為提煉純淨鐳嘅方法申請專利，而將佢公佈，呢種做法有效推動放射化學嘅發展。
居禮夫人係歷史上第一個獲得兩項諾貝爾獎嘅人，而且係僅有嘅兩個喺唔同領域獲得諾貝爾獎嘅人之一。喺第一次世界大戰時期，居禮夫人提倡用放射學救護傷者，推動放射學喺醫學領域裏面嘅運用。之後，佢曾經喺1921年去美國旅遊並為放射學嘅研究籌款。居禮夫人由於過度接觸放射性物質而喺1934年7月4號死喺法國上薩瓦省。
後來，佢嘅大女伊倫·里奧-居禮（Irène Joliot-Curie）喺1935年獲得諾貝爾化學獎。佢嘅細女伊·居禮（Eve Curie）喺佢阿媽死咗之後寫咗《居禮夫人傳》。喺1990年代嘅通貨膨脹，居禮夫人嘅頭像曾經出現喺波蘭同法國嘅貨幣同郵票上。化學元素鋦（Cm, 96）就係為紀念居禮夫婦而命名嘅。
