山口百惠

出自維基百科,自由嘅百科全書
山口百惠
姓名原文山口 百恵
出生日1959年1月17號 喺Wikidata改呢個 (65歲)
出生地Ebisu 喺Wikidata改呢個
本名山口 百恵
國籍日本 喺Wikidata改呢個
母語日文 喺Wikidata改呢個
識嘅語言日文 喺Wikidata改呢個
母校Shinagawa Women's Academy 喺Wikidata改呢個
職業演員歌手填詞、quiltmaker 喺Wikidata改呢個
風格流行 喺Wikidata改呢個
名作Izu no Odoriko、Yokosuka Story、Yumesaki Annainin、Imitation Gold、Playback Part 2、Iihi Tabidachi、Akai Shogeki 喺Wikidata改呢個
配偶三浦友和 喺Wikidata改呢個
仔女三浦貴大、三浦祐太朗 喺Wikidata改呢個

山口百惠粵拼saan1 hau2 baak3 wai6日文山口 百恵やまぐち ももえ(Yamaguchi Momoe)1959年1月17號—),又叫三浦百惠saam1 pou4 baak3 wai6日文三浦 百恵みうら ももえ(Miura Momoe)),係日本歌手同演員。佢係1970年代,日本藝能界最受注目明星之一[1],出過三十二張單曲唱片,連續六年入選紅白歌唱大賽,主演過十五齣電影。1980年,年僅21歲,正值演藝事業高峰嘅山口百惠,同三浦友和結婚後息影,從此完全退出娛樂圈。

山口百惠係關東地區東京澀谷區惠比壽東京都立廣尾醫院出世。佢老豆另外有頭家,冇同佢老母結婚,亦冇養過三母女;山口百惠同個妹,跟佢哋老母姓,亦係佢老母湊大[2]。1972年,只得十三歲,讀緊初中嘅山口百惠參加第五屆"明星誕生"歌唱比賽攞第二,畀經理人公司睇中,簽入堀製作株式會社(HoriPro)。

1973年,十四歲嘅山口百惠第一次出唱片。最初山口百惠,同埋另外兩個都係「明星誕生」選出,一樣讀緊中三嘅少女歌星,森昌子櫻田諄子,合稱「花的三人組」。山口百惠外型係清純少女,但係初期佢唱啲歌,成日都有啲露骨歌詞。好似「青青果實」、「一個夏天嘅經驗」,都有啲鹹濕嘅性暗示,有「將女仔最寶貴嘅畀你」、「始終都要有一次經過誘惑」、「你點搞我都得,就算畀人話我唔係好女仔都冇所謂」等詞句[3]。不過山口以「一個夏天嘅經驗」成功突圍後,開始改變歌路。1976年嘅「橫須賀故事」開始,唱好多阿木燿子同埋宇崎龍童嘅作品,無論歌、藝都渙然一新,更上一層樓[4]。1980年10月5號年芳廿一,佢喺日本武道館舞臺正式退休。呢段只有八年左右嘅時間入邊,佢喺拍戲同唱歌兩方面都有好大嘅影響。出品三十二張單曲唱片,總銷量超過一千一百萬。1974年起至1980年,幾乎全部單曲都打入銷售榜頭五名,更連續六年入選紅白歌唱大賽。代表作包括有: 橫須賀故事、PlayBack 2, 秋櫻(入選日本二十世紀100首經典)、在晴朗一天出發 (日本國鐵用做廣告歌。至今日本人旅行仍然成日唱)等等。佢有好多首歌後來被香港嘅歌手填咗中文詞翻唱,比如話,梅艷芳翻唱嘅曼珠莎華(原曲曼珠莎華)、赤的疑惑(歌)(原曲ありがとうあなた)、孤身走我路(原曲This is my trial)、冰山大火(原曲ロックンロールキウィドウ),重有張國榮翻唱嘅風繼續吹(原曲さよならの向こう侧),翻唱後都好紅。而山口百惠响舞台上造型、風格,更係香港眾多藝人多年來模彷對象。電影方面,1974年開始擔正做主角,同三浦友和一齊演出文學名著《伊豆舞娘》,八年間做咗十五齣電影嘅女主角,而男主角全部都係三浦友和。電視劇方面,最出名嘅係TBS 「赤的⋯⋯系列」。當中《赤的疑惑》(又叫血疑),响華人圏內好多人睇[5]; 女主角患血癌呢條橋,由個時開始畀其他戲劇抄足幾十年。

老公三浦友和,係山口百惠十六歲拍百力滋廣告時相識。因為佢哋兩個外型相襯,不斷飾演情侶,係公認銀幕上金童玉女。由《伊豆舞娘》開始,幾年間佢哋一共拍咗成十幾套電影,平均係每年兩套,另外重有百幾集電視劇。佢哋兩個最初係地下戀,假戲真做,戲假情真。山口百惠二十歲個年,三浦向佢求婚。山口答應,同時話結婚之後會完全離開藝能界,專心相夫教子。當時山口百惠喺日本以至東亞,已經紅到發紫,Fans 無數,事業正處巔峰[6]。佢嘅急流勇退決定,引起全國一陣騷動。1980年10月5號最後一場東京武道館演唱會,山口百惠著一襲全白歌衫,响現場觀眾歡呼聲中含淚唱完引退之歌さよならの向こう侧 (在另一方再見)。將支白色嘅咪,放喺舞台中央地下,响This is my Trial 音樂之中,慢慢步出舞台。呢幕告別式,成為一代經典。山口百惠喺1980年11月19號同三浦友和登記結婚,證婚人宇津井健(即係佢眾多《赤色系列》電視劇中嘅老豆)。結婚後山口百惠真係做到完全隱退,從此唔再公開露面。但係大家依然對佢嘅生活好有興趣,幾十年來不停有狗仔隊追踪偷拍佢一家。日本嘅八卦雜誌,只要有山口百惠嘅新聞,都會起紙。之後佢生咗兩個仔,大仔三浦祐太朗同二仔三浦貴大。而家兩個仔都已經成人,大仔以ユウ為藝名喺樂隊Peaky SALT入邊擔任結他手主唱嘅職位,二仔係演員。山口百惠同三浦友和,亦經常被選為日本名人模範夫婦。

[編輯]

  1. "Top 100 Japanese pops Artists - No.7".
  2. Yamaguchi, Momoe (1981年4月). Aoi Toki (蒼い時) (日文). ISBN 4-08-751056-5.
  3. あなたが望むなら、私何をされてもいいわ。いけない娘だと噂されてもいい Anata ga nozumu nara, watashi nani o sarete mo ii wa. ikenai musume da to uwasa sarete mo ii.
  4. Aki, Yoko (1993). purēbakku ("Playback") Part 3 - Momoe Memorial. ISBN 978-4-08-749895-0.
  5. Ryūdō Uzaki. "kakenuketa seishun". 原著喺2011年9月3號歸檔.
  6. Billboard Magazine, 1980. 喺2017年2月19號搵到.

出面網頁[編輯]