山寨廠

出自維基百科,自由嘅百科全書
跳去: 定向搵嘢

山寨廠係指二十世紀五、六十年代喺香港開始興起嘅小型工廠。山寨廠通常規模好細,唔會超過幾十人(超過一百人嘅喺香港已經係大公司),有啲甚至得幾個人;工廠面積由幾千至百零呎不等。香港大多數工廠大廈都係起畀山寨廠。以前房屋委員會都有起呢類工廠大廈,一幢樓有幾百個單位,而家響好多地方重有;有啲再舊啲嘅七層式已經拆晒或改建做其他用途,例如石硤尾賽馬會創意藝術中心[1]。山寨廠好多都係家庭式經營,即係話可能個老豆係老闆,老婆又喺度做嘢,個女係會計,跟住趕工或者仔女放假都會落去幫手之類。山寨廠通常都無自己牌子,而係幫人或者外國牌子做生產(而家叫 OEM),同埋做嘅係啲無咁高科技嘅嘢,初頭係穿膠花李嘉誠都係做膠花廠起家)、假髮、紡織、車衣之類,重有例如木製品、皮革、塑膠、印刷、玩具、簡單電子產品等等,乜都有。1990年代工廠搬晒返大陸之後就開始式微,有啲剩係留番個單位做寫字樓或者貨倉

注釋[編輯]

  1. http://www.hkheadline.com/dailynews/content_hk/2009/07/03/82094.asp