巴士阿叔

出自維基百科,自由嘅百科全書
巴士阿叔
係一個viral video、video work 喺Wikidata改呢個
巴士阿叔嘅位置

巴士阿叔英文Bus Uncle陳乙東香港一位阿叔。佢係2006年5月香港廣泛流傳嘅短片《X尚義聲線高壓呀叔搭巴士途中問候後生仔》「聲線酷似林尚義的人在乘巴士途中狠狠地責罵一名年輕人」中嘅主角,因為把聲好似無綫電視講波佬林尚義(外號阿叔)而得名,但佢同林尚義並冇任何關係。因為最初唔知道佢乜頭乜路,所以就叫佢巴士阿叔。佢聲稱自己攞綜援,重有多個學位。佢更曾經多次選特首,有為香港服務嘅理想。

Elvis(曾經誤叫做Alvin)又叫「巴士四眼仔」,25歲,做地產代理,係短片中嘅第二主角,畀「巴士阿叔」怒罵嘅人。Jon(曾經誤叫做John),全名方穎恆,22歲,係拍攝者同埋上載者。

68X係指香港九龍巴士旗下一條巴士線,往來佐敦元朗,係短片中嘅巴士線。

巴士阿叔係香港討論區uwants代言人,表示出網站個討論環境就係巴士阿叔風格;有你講(常見版主封人)、冇人講(常見講政治六四、管理員);講粗口、把口賤[未記出處或冇根據]

經過[編輯]

巴士罵戰[編輯]

喺2006年4月27號嘅夜晚,拍片者Jon嘅口述,一個名為Elvis嘅青年喺度搭巴士嘅時候,因為唔滿意坐係前面嘅大叔講電話講得太大聲,於是就細細力咁拍咗一下個阿叔嘅膊頭,意思係叫佢細聲少少。

最初,Elvis對住咄咄逼人嘅大叔,一度想息事寧人,點知大叔連續三次回應「未解決」(後來成為香港人口頭禪),氣勢重一次勁過一次,更加以「我有壓力,你有壓力,你做乜挑釁我呀?」,同埋成口粗口咁鬧佢。

本來事件有解決跡象,但係Elvis一句「警告你」,令大叔再度展開毒罵,Elvis俾大叔蹂躪,毫無還「口」之力。事件最後因大叔突然有來電而平息。

傳媒焦點[編輯]

香港傳媒亦逐漸關注事件,有關報道越來越多。

呢套短片嘅點擊率已突破五十萬,商業電台叱咤903節目《萬世巨星》討論過呢件事[1]。5月27號,原裝短片瀏覽率已超過一千萬[2]

傳媒都好關注呢件事,電台報紙雜誌等爭相報道,甚至連CAPCOM街頭霸王宣傳海報、城市論壇學生發言、2006年5月21號嘅無綫電視體育新聞亦要套用巴士阿叔名句,例如「……有冇壓力?人人都有壓力㗎喇!」、亞洲電視處境劇喜有此理喺5月25號嗰集裏面嘅父子互罵場面亦仿傚呢單嘢等。

5月23號,Elvis致電商業電台雷霆881節目《香港幾咁好 為人民服務》[3],自稱自己係短片中被大叔鬧嘅青年,重大開馬後炮,結果畀主持人同埋高登討論區網友不停恥笑。商業電台節目《光明頂》亦討論呢件事[4],將佢形容為「音姦」(嘈音強姦),主持人陶傑將巴士阿叔以及一眾旁觀者嘅行為牽連至社會同埋民族問題,除咗批評阿叔無法無天,旁觀者麻木不仁,更直指Elvis詞彙貧乏、懦弱無能。重播出其中九成對話(粗口濾過)。

5月25號,自稱拍攝嗰段片嘅Jon喺電台現身說法,Jon話拍攝影片目的為咗一旦打交方便向警方作證,並且話影片有第二段,講述Elvis同朋友傾電話暗罵巴士阿叔,但巴士阿叔並再無理佢,Jon亦話無意上載第二段[5]

5月26號,香港嘅《明報》、《星島日報》、《都市日報》,以至美國美聯社、《水銀日報》、《紐約時報》、英國衛報》、泰國國家報》、阿聯酋海灣時報》、南非獨立報》、加拿大The Gazette英文The Gazette》、《福布斯》網上新聞等傳媒亦有報導呢項事件[6]。諷刺時弊嘅廣播劇《十八樓C座》中嘅單元《壓力 挑釁 未解決》談論呢件事。頭一段故事尾部認為政治人可以引用有關巴士阿叔言論發表意見。中段內容指香港人看過套段片之後,冇分析事件內容去指責錯在巴士阿叔身上。而喺段片末段指類似巴士阿叔事件經常發生,但冇人見義勇為去阻止,藉此批評而家香港人嘅見義勇為性格早就冇晒。

5月27號嘅有線電視新聞台更有專題報導、詹瑞文以及心理學家分析、影片拍攝人Jon嘅訪問[7]。夜晚,香港電台節目《頭條新聞》同埋其後嘅網上直播亦有探討「巴士阿叔」事件。

5月28號,無綫電視六點半新聞報道提及「巴士阿叔」,並分析影片網站。

衝出香港[編輯]

雖然唔少人批評呢件事「無聊」,但美國美聯社水銀日報紐約時報英國衛報泰國國家報阿聯酋海灣時報南非獨立報加拿大蒙特利爾公報福布斯網上新聞等傳媒喺5月底作出報導(部份係轉載一份當地嘅報導),令巴士阿叔事件進入另一層次。

巴士阿叔事件已令世界各地嘅民眾開始認識。

創作浪潮[編輯]

「巴士阿叔」呢段短片開創前所未有嘅集體創作浪潮,佢嘅對白唔單只成為眾人嘅口頭禪,相關產品例如改圖、影片Remix、影片改版等亦大行其道、層出不窮,例如巴士阿叔同真正嘅林尚義、Alan Ho陳水扁鄭秀文譚詠麟等人大玩crossover英文Crossover (fiction)。甚至出現水杯同埋恤衫等產品。笑料可謂一浪接一浪,網上有玩唔完嘅創意。但亦有人擔心巴士阿叔會好似其他潮流一樣,被港人迅速玩厭。而家巴士阿叔嘅熱潮的而且確已經消失得七七八八啦。

事件中有可能觸犯嘅香港法律條例[編輯]

片段中嘅「巴士阿叔」已觸犯咗香港法例,屬於刑事罪行,一經定罪,最高可被判罰款3000同監禁6個月︰

374D章 道路交通(公共服務車輛)規例46條 乘客的一般行為(節錄)

  1. 公共巴士、公共小巴或的士之乘客或有意乘搭該等車輛的人,不得:
(a) 使用不良或冒犯性的語言或作出不守規矩的行為
(g) 在車輛移動時上車或落車
(n) 在車內或車上的時候
(i) 使用或操作任何嘈吵的器具、樂器或任何留聲機、收音機或錄音機,而滋擾到任何其他人
(ii) 自己或聯同其他人唱歌或叫喊,以致發出過量噪音

片段反映嘅社會問題[編輯]

香港人嘅壓力問題[編輯]

巴士阿叔道出普遍香港人心裏面嘅感受,「大家都有壓力」。而且從阿叔面對一件小事都咁暴躁嚟睇,呢種壓力相當容易爆發。喺5月27號有線新聞有關巴士阿叔新聞片段中,有專家話「人人都喺病發邊緣」,反映壓力都市嘅潛在危機。

香港青少年嘅問題[編輯]

Elvis反映咗香港青少年嘅心態同埋應付危機能力。Elvis喺事後致電電台,炫耀自己嘅處理手法同埋先見之明,並綿裏藏針咁詛咒巴士阿叔。正面嚟講可以話係世界仔性格,負面嚟講可以話係奴才心態同埋阿Q精神

香港人袖手旁觀的問題[編輯]

成件事只有旁觀者同埋拍片者,無人敢仗義相助,更有人發出「嘿…」嘅笑聲。魯迅曾經表示一啲中國人喺度睇紀錄片,回顧日俄戰爭期間中國人被日本人斬頭嘅情景,竟然無動於衷。兩者情景有相似之處。

巴士阿叔嘅口頭禪問題[編輯]

巴士阿叔嘅言辭鏗鏘有力但滿口歪理,吸引唔少青少年爭相仿效,連商品海報同無綫電視體育新聞亦爭相仿效。有學校已經唔畀學生講「未解決」同「我有壓力、你有壓力」等說話[8]

網絡公審嘅問題[編輯]

互聯網世界喺呢件事上發揮咗極大影響力,見證網上嘅創意。此外亦有人擔心網民只透過短片就大興問罪之師,流於民粹式嘅行為,對當事人有不良影響[9]

傳媒互動嘅問題[編輯]

事件亦反映社會正向普適計算(Ubiquitous computing)嘅方向進發。由於現代通訊科技嘅進步,用流動錄影設備、互聯網、流動電話及網誌等技術,可以令到一件本來係每日都會發生,喺傳統傳媒眼中本來無關痛癢嘅事件能夠成為大眾關注嘅焦點。各種媒體嘅價值同埋功能調整喺事件中得到一定嘅反映。

事件影響[編輯]

香港唔少中小學唔畀學生用未解決同埋有壓力等語句。

而且網上亦有網友將巴士阿叔同另一段客戶無禮投訴錄音進行混音,名為「林尚義般的聲線受高壓力巴士呀叔 Bus Uncle 大戰投訴國泰的Alan Ho」,引伸出另一種惡搞文化[10]

參考[編輯]

  1. 少爺占,Donald,朱薰,商業電台節目《903 id club 萬世巨星》
  2. 詳見 [1] 互聯網檔案館歸檔,歸檔日期2006年6月25號,.
  3. 何良何亨,《網上男主角現聲直播室!》,商業電台節目《香港幾咁好 為人民服務》,2006年5月23號
  4. 陶傑崔偉恆鮑偉聰,《巴士怒坑》,商業電台節目《光明頂》,2006年5月23號
  5. 拍攝影片者Jon被訪問片刻
  6. 參看英國衛報報導美國哥倫比亞廣播公司報導 互聯網檔案館歸檔,歸檔日期2009年2月22號,.、美聯社報導
  7. 5月27號有線新聞有關巴士阿叔新聞片段
  8. 《巴士阿叔鬧仔學生爭相模仿 學校禁講「未解決」「有壓力」》,原載《蘋果日報》,2006年5月25號
  9. 《手機攝錄短片 掀網絡公審》,原載《星島日報》20,2006年5月9號。
  10. 林尚義般的聲線受高壓力巴士呀叔 Bus Uncle 大戰投訴國泰的Alan Ho、Alan Ho係一位投訴機管局嘅人,佢嘅投訴錄音 互聯網檔案館歸檔,歸檔日期2006年6月29號,.夾雜傲慢無禮同埋粗口。

睇埋[編輯]

出面網頁[編輯]