平板電腦

出自維基百科，自由嘅百科全書
蘋果公司嘅iPad平板電腦

平板電腦（tablet computer）[1]係一種小型嘅、方便攜帶嘅個人電腦，以觸控式螢幕作為基本嘅輸入裝置。佢擁有嘅觸控式螢幕可以畀使用者通過觸控筆或者數字筆嚟做嘢，而唔係傳統嘅鍵盤同滑鼠。多數嘅平板電腦更加支援手指操作，用手指觸控、書寫、縮放畫面同圖案。

使用者可以透過內建嘅手寫辨識、螢幕上嘅虛擬鍵盤、語音辨識或者一個真正嘅鍵盤（如果嗰隻機型配備嘅話）進行操作。平板電腦重擁有畀使用者透過觸控筆來打字嘅快速輸入軟件。

多數平板電腦使用Wacom觸控式螢幕，佢可以好快咁將觸控筆嘅位置話畀電腦聽。用呢隻觸控式螢幕嘅平板電腦會係佢嘅螢幕表面產生一個微弱嘅磁場，磁場淨係能夠同觸控筆內嘅裝置發生作用。所以用戶可以放心咁將手放到螢幕上，因為淨係得觸控筆先會影響到螢幕。但係，因為周圍嘅設備可能會干擾到觸控式螢幕，好多型號都發生過遊標「震」嘅問題，呢個問題會加深某啲操作嘅難度，例如當試住畫直線、寫細嘅字等。另外製造呢種觸控式螢幕嘅公司重有UC Logic同埋Finepoint公司。

類型[編輯]

惠普生產嘅可旋轉型平板電腦

純平板型[編輯]

淨係配置一個螢幕同觸控筆嘅平板電腦係純平板型；佢哋可以透過無線技術或者USB介面連接鍵盤、滑鼠同其它周邊配備。最常見嘅生產商有Motion Computing/Gateway Computers、富士通、惠普/康柏同蘋果等等。

可旋轉型[編輯]

裝咗鍵盤嘅平板電腦稱為可旋轉型。通常嚟講，鍵盤冚住主機板而且透過一個可以水準、垂直180°前後旋轉嘅連接點連接住螢幕。最常見嘅生產商有惠普、聯想、宏碁同東芝。

混合型[編輯]

「混合型」嘅平板電腦同「可旋轉型」差唔多，不過混合型平板電腦嘅鍵盤係可以分開嘅，所以您可以用佢當做純手寫或者可旋轉型用。最常見嘅混合型平板電腦生產商有華碩。

歷史[編輯]

嚟自施樂帕洛阿爾托研究中心嘅艾倫•凱（Alan Kay）喺1960年代尾提出咗一種可以用筆輸入資訊嘅叫做Dynabook嘅新型筆記型電腦嘅構想。不過，帕洛阿爾托研究中心冇對呢個構想提供支援。第一部用作商業嘅平板電腦係1989年9月上市嘅GRiD Systems製造嘅GRiDPad，佢嘅作業系統建基於MS-DOS。1991年，另一部Go Corporation製造嘅平板電腦Momenta Pentop上市。1992年，Go推出咗一款專用作業系統，命名做PenPoint OS，同時微軟公司亦推出咗Windows for Pen Computing。同「ThinkPad」呢個詞暗示嘅一樣，IBM ThinkPad系列嘅原始型號都係平板電腦。呢啲早期嘅例子都失敗咗，嗰個令人詬病嘅手寫辨識率根本就唔符合用戶嘅需求，並且好高嘅價格同重量都好有問題。例如話，Momenta重達7磅（大約3.2千克）並且價格高達5000美元。

平板電腦自從2002年秋季因為微軟公司大力推廣Windows XP Tablet PC Edition而漸漸變得流行起嚟。之前平板電腦喺工業、醫學同政府等顧客群內有小型市場。而家佢哋嘅主要用戶群為學生同專業人員。區分Tablet PC（運行Microsoft Windows XP Tablet PC Edition）同其它平板電腦係好重要嘅（英文嘅區別就係Tablet PC同tablet PC，小寫「t」），好多廠商都直接稱佢哋為「Tablet」（平板）。佢哋都係觸控筆輸入裝置，有啲軟件係專為平板電腦設計嘅，喺其它設備係行唔到。消費者一定要搞清楚軟件同硬件嘅相容問題，因為「平板電腦」並唔係單指微軟公司一間嘅產品。

作業系統[編輯]

早期作業系統[編輯]

喺2000年代平板電腦主要都係行Windows XP Tablet PC Edition 2005。Tablet PC Edition 2005包含咗Service Pack 2，而且可以免費升級。2005版帶嚟增強嘅手寫辨識率並且改善咗輸入面板，重令輸入面板支援幾乎所有程式。喺CES 2005期間，微軟向用戶賣弄咗一啲下一次升級計畫入面嘅特性。下次升級將會可以畀用戶直接喺桌面上寫字、增加手寫便箋時嘅可視性。

2006年，微軟發布新一代作業系統Windows Vista，喺家庭高級版（Home Premium）、商業版（Business）、旗艦版（Ultimate）都中加入咗對平板電腦嘅支持，甚至重專門為嘅設計咗名為「墨球」嘅自帶遊戲。

到咗2009年，微軟發佈咗Windows 7系統，喺家庭高級版（Home Premium）、商業版（Business）、旗艦版（Ultimate）中進一步加入對平板電腦嘅支持，新增虛構鍵盤，但係平板電腦嘅市場仍然偏向以PC嘅角度優化，重量較重，速度又唔及傳統PC，所以平板電腦依然無人問律。

Linux作業系統係平板電腦嘅另一個選擇。對於一啲Linux銷售同一啲平板電腦，工作過程可能會冗長無味，除非直接購買預裝咗Linux嘅平板電腦，同早期嘅Lycoris Desktop/LX Tablet Edition一樣。Linux天生就缺乏平板電腦專用程式，但隨住帶有手寫辨識功能嘅EmperorLinux Raven X41 Tablet [1]，Linux平板電腦已經改善咗好多。

嚟自Novell公司嘅 openSUSE linux 都對平板電腦有住部分嘅支援。作為定制性強嘅作業系統，包括ubuntu linux，亦有人自己郁手修改令到佢支持平板電腦，甚至有人提出發行tabuntu嘅ubuntu衍生版本。

例如日立VisionPlate平板電腦就可以選裝Linux，並且能夠迅速嘅作為無線X－Window系統終端，相反，可以令到所有係VisionPlate上嘅資源都可以用嚟顯示係局域網或更廣範圍嘅網路嘅其他電腦運行嘅程式。呢種方式可以令平板電腦作為一種無線圖型終端用係垂直行銷市場，比如餐館嘅消費終端上。

但係，喺21世紀頭嗰十年，平板電腦仍然冇任何起色，操作系統不外乎都係Windows系統，而且唔受大眾歡迎。

作業系統嘅轉折[編輯]

2010年可算係平板電腦嘅轉折時刻。

2010年1月27號蘋果公司發佈咗iPad，搭載自家研發嘅作業系統iOS，操作系統同硬件設備係由智能手機方向優化，重量較輕，只有600克。原本啲人都唔睇好iPad佢嘅前景，以為佢會步微軟同惠普嘅後塵，但佢意外大獲成功。但蘋果就從此引發平板電腦熱潮，吸引各大廠商推出自家嘅平板電腦，喺成個2010年度，蘋果公司一共賣出咗超過800萬部iPad。蘋果公司嘅平板電腦以至電腦市場市場佔有率高速上升。從此，蘋果iPad喺平板電腦市場嘅佔有率一直高達50%以上。

2010年三星推出嘅Samsung Galaxy Tab採用Android 2.2作業系統。Android係Google一個基於Linux核心嘅軟件平臺同作業系統，目前Android成為咗iOS最強勁嘅競爭對手之一。由於Google諗住Android 2.2作業系統只會用喺手提電話上而唔係平板電腦，同埋嗰款平版硬件設置未達到Android 3.0嘅最低要求，所以目前嗰款產品並冇被Google視為Android平版，但市面上仍然以平板電腦稱呼。但係Galaxy Tab因重量比iPad更輕，SD卡支援而吸引一部份嘅客戶買。

2011年3月，Google因應平板電腦市場嘅成熟，推出Android 3.0「蜂巢」（Honey Comb）作業系統。該版本專門為平板電腦設計，新增首頁掣，多功能操作。2011年5月Google推出咗Android 3.0嘅升級版本Android 3.1。不過此系統問題多，經常當機。

而2010年同2011年6月間，平板電腦嘅操作系統陣營分裂成Android[2]同iOS兩種，而且後者深受大眾歡迎，令到用Android系統嘅平板電腦數量由唔夠幾百萬部升至6000萬部，而iOS設備就升至約3億6千萬部。

因應平板電腦市場喺近2年間嘅重大變革，2011年9月，微軟發佈Windows 8作業系統嘅預覽版。呢個作業系統進行大改革，增加動態方塊介面，將開始功能列轉變成動態方塊程式，以適應平板電腦操作模式。Windows 8系統喺2012年10月上市。

2011年10月，Google再接再勵，推出Android 4.0作業系統，進一步優化平板電腦。

其後係2011年嘅下半年，平板電腦市場高速成長，全球平板電腦出貨量由以往嘅四億急速增長至七億，而且發展愈嚟愈成熟。以往，啲人總係帶一部輕簿嘅手提電腦出街，但喺近2年電腦市場就出現咗嚴重改變。而家啲人總係帶住一部平板電腦出街，而且漸漸成為一種流行習慣。

到咗2012年，平板電腦市場競爭白熱化，中國廠商都喺呢年推出好多低價但性能較高嘅平板電腦，如novo 7極光系列、精靈系列、原道N90等等都大受歡迎，令國際廠商留意呢種銷售方法，影響咗後嚟Google嘅Nexus 7同三星嘅Galaxy Tab 2。

2012年6月，各大平板廠商都發表咗多項全新作業系統。蘋果發表iOS 6，Google推出Nexus 7，同時推出Android 4.1 Jelly Bean操作系統，而微軟亦推出自家品牌Microsoft Surface。

平板電腦嘅優缺點[編輯]

平板電腦嘅優點同缺點係可以喺好大範圍內被主觀意識影響嘅。吸引一個用戶嘅特點可能會令另一個用戶望而卻步。下面列出嘅優缺點係比較常見嘅，點解啲人鍾意或唔鍾意平板電腦嘅理由，但儘量採納多數用戶嘅睇法。

優點[編輯]

主要優點[編輯]

  • 手勢識別——手勢（以一定嘅規律係螢幕上用觸控筆劃）係非常有用嘅工具，連埋鍵盤一齊用就可以大幅度提高效率。例如，Firefox嘅某啲擴展就支持打開觸控筆喺螢幕上畫嘅圈包含嘅所有連結。
  • 無紙辦公——當缺少紙嘅時候，平板電腦更容易共用便箋、大量減少雜亂嘅情況、重新排列文字（通過移動頁面上嘅文字，同喺真正嘅紙上用擦膠擦咗重新寫過相反）。
  • 殘疾用戶——呢啲打唔到字但係可以揸住一支觸控筆嘅用戶可以用平板電腦以可接受嘅速度輸入文字。
  • 數碼藝術——一啲專業數碼藝術家的確需要一個會變換圖像嘅簿仔，如果佢哋需要精確咁描繪佢哋嘅作品（滑鼠因為難控制而唔能夠勝任呢項工作）。

次要優點[編輯]

  • 可平放——大多數平板電腦唔會干擾視線（例如開會嘅時候），因為佢哋可以平放喺枱面或者用戶嘅臂彎上。咁可以令數碼藝術家喺水平嘅表面繪畫。
  • 手持性——大多數平板電腦可以喺用戶站喺度同開會嘅時候托係臂彎。
  • 人性化——大多數平板電腦比一般嘅電腦更人性化，例如你可以係懶洋洋咁攤係梳化上嘅同時上網。
  • 習慣——好多使用者都唔滿意鍵盤同滑鼠而更加鍾意用直觀嘅方式（觸控筆）輸入。
  • 價錢——目前平板電腦嘅價格大多係65至450美元範圍之內，所以比筆記型電腦更容易普及。

缺點[編輯]

主要缺點[編輯]

  • 解碼——程式設計語言對手寫辨識唔係好好。
  • 打字（學生寫作業、寫email）——手寫輸入同高達30至70個單詞每分鐘嘅打字速度相比慢咗，目前平板電腦虛擬鍵盤嘅打字速度都唔能夠完全取代傳統鍵盤。
  • 另外，一個冇鍵盤嘅平板電腦（純平板型）唔能夠代替傳統筆記型電腦，並且會令用戶覺得更難（初學者同專家）使用電腦科技。（純平板型係啲人經常用嚟做記錄或教學工具嘅第二部電腦。）但係，一個可旋轉型平板電腦（就係帶鍵盤嘅嗰種）係一種非常理想同強大嘅傳統電腦替代品，特別係需要抄寫筆記嘅學生。
  • 因為用平板電腦需要長時間低頭（如果冇配置專用底座），對用戶嘅頸椎造成一定損害，主要表現係頸部酸痛、僵硬、頸椎麻木等。

次要缺點[編輯]

  • 螢幕尺寸——目前最大嘅平板電腦螢幕超過12英寸。然而好多型號採取咗折衷方案：喺呢個尺寸上實現咗非常高嘅解像度（喺單位尺寸裏面更高嘅像素密度，噉對數碼藝術家嚟講係必要嘅）。
  • 連接處——筆記型電腦最弱嘅部位就係鍵盤同螢幕嘅鉸鏈。但係旋轉型平板電腦只有一個連接處——相比嚟說傳統筆記型電腦有兩個，所以嗰個連接處喺緊張嘅壓力下更傾向於晃動。
  • 練打字——手寫辨識技術鼓勵用戶依賴對於佢哋嚟講更容易嘅手寫，影響佢哋練習打字技術。
  • 電池壽命——受目前電池技術嘅局限，過短嘅電池壽命可能會蓋過以上優點；例如，學生抄筆記需要可以支援一整日嘅電池壽命，唔係就冇意義。

參閱[編輯]

參考[編輯]

  1. ↑ 平板電腦－〈增修《中文主題詞表》〉. 《編目園地》. 臺北市: 國家圖書館. 2012-09-26. 原著喺2013-01-29歸檔. 喺2013-01-05搵到. 原文Table PC。睇微電腦
  2. ↑ Android and the Linux kernel community

出面網頁[編輯]

維基同享有多媒體嘅嘢：
Tablet computers
由「https://zh-yue.wikipedia.org/w/index.php?title=平板電腦&oldid=2074870」收