廣州恆大淘寶足球會

出自維基百科,自由嘅百科全書
(由廣州恆大足球會跳轉過來)
跳去: 定向搵嘢
廣州恆大淘寶
Guangzhou Evergrande 2012 Crest.png
全名 广州恒大足球俱乐部
花名 華南虎
中超曼城
創會 1954年(1993年職業化)
主場 天河體育中心
(容納人數:60,151人 )
老闆 Flag of the People's Republic of China.svg 許家印
董事長 Flag of the People's Republic of China.svg 劉永灼
領隊 Flag of Italy.svg 化比奧簡拿華路
打緊聯賽 中國足球超級聯賽
球會網站
主場波衫
作客波衫

廣州恆大淘寶足球會粵讀gwong2 zau1 hang4 daai6 tou4 bou2 zuk1 kau4 wui2簡化字广州恒大淘宝足球俱乐部英文Guangzhou Evergrande Taobao Football Club英讀:/ˈɡwɑːŋˈˈɛvərˈɡrænd/,簡寫GUA[1]GZE[2]GZFC)係中國廣東省廣州市一間足球會,而家打緊中國足球超級聯賽。呢隊波重可以嗌廣州足球隊gwong2 zau1 zuk1 kau4 deoi2)/FC廣州,喺1954年10月成立。佢既係中國第一間地市級嘅足球隊,又係中國第一間政府同埋企業合股嘅足球職業嘅俱樂部。呢隊波係中超史上第一支升班馬第一年就攞到冠軍嘅球隊,亦試過喺一年之內攞過中國足壇三冠王。喺2013年11月2號,重第一次攞埋亞洲冠軍盃嘅冠軍返嚟。

歷史[編輯]

廣州白雲山時期(1984——1992)[編輯]

1984年,廣州隊喺第一屆足協盃就攞咗第8名嘅成績就升入咗甲級聯賽。嗰時中國啱啱係改革開放無耐,有敢為天下先嘅廣州人就開始試下喺足球入面搞商業化。喺嗰年10月,廣州白雲山製藥廠就同廣州市體委簽咗約,以每年贊助200,000蚊嘅條件嚟辦廣州足球隊。到而家為止,廣州白雲山製藥廠已經係廣藥集團屬下嘅一個企業。

1986年,廣州白雲隊就率先開咗引入中國內地教練嘅嘢,嗰時最早係戚務生嚟執教廣州隊。

1989年,廣州白雲隊整大咗,變成足球會,但喺嗰年有國家二隊參加嘅甲A比賽入面凈係攞咗包尾而降級。

1990年,佢喺甲B聯賽入面,由於陳亦明嘅帶隊就將白雲隊以第2名嘅成績返嚟甲A度,嗰時已經係第三次升入咗頂級聯賽。

1992年,教練周穗安就開始執教廣州隊,經過咗麥超吳群立李勇彭偉國呢啲後生嘅球員努力,最後攞返亞軍,廣州足球喺嗰時嘅中國足球「專業時代」最好嘅成績一次。

廣州太陽神時期(1993——2000)[編輯]

喺1992年,中國足球正式開始改革,到咗1993年10月份就決定咗將1994年嘅甲A聯賽嚟做改革試點。就喺1993年1月8號,廣州太陽神集團同廣州體委簽咗約,呢個重係中國內地第一間股份制嘅職業足球會。

1994年聯賽初期,雖然話波隊喺賽季初搞出咗內訌而導致成績下滑,但喺賽季中就開始發力,攞咗連續6場贏波(包括埋上海申花主場1-6大敗畀廣州太陽神嗰場),重攞埋職業化之後嘅第一屆頂級聯賽亞軍,嗰時嘅彭偉國同胡志軍都變咗比較出名嘅波星。

1995年,廣州隊就先經歷咗換教練,再出現咗內訌嘅負面新聞先至最後攞咗第5,點知第年就將二隊賣咗畀松日。就喺1996年,廣州就出咗3支甲A球隊(廣州太陽神、廣東宏遠廣州松日)喺度,嗰時係到咗中國足球職業化之後嘅最高峰,而太陽神嘅成績就跌到第7。

1996年嘅甲A賽季結束咗之後就先後有成13位球員話轉會,最後得9個人走咗,成個波隊嘅實力出現咗明顯嘅下降,凈係通過換教練之後先至勉強噉保到級。

1998年,由於彭偉國同胡志軍走咗,加上二隊嘅成績好差,甚至有部分壟斷國企嚟搞亂成個足壇,結果球隊最後就包尾降級,而足球會主動嗌差佬嚟查下部分球員係咪有賭波。喺嗰年同廣州松日嘅同城打比入面,球證就發嗮爛渣,向咗兩個隊之間嘅球員出咗5紅10黃,呢個重係嗰時中國職業足球單場比賽出現紅黃牌最多嘅記錄。

1999年,雖然太陽神集團同廣州市體委續簽咗5年合約,但最後凈係得甲B第8。

2000年,足球會就丼咗超過20,000,000蚊嚟搞返個波隊入甲A,但一開咗賽季就輸咗好幾場。一直到甲B最後一輪同北京寬利打嘅保級大戰比賽入面(嗰時廣州隊如估打和就跌落乙級聯賽),打到下半場嘅補時先至入波而艱難保級,搞到北京寬利跌咗落乙級聯賽。比賽打完之後就有成幾千個球迷衝嗮入去球場度,因為佢哋嗰時差啲就降級……最後太陽神就話唔撈喇,退出咗廣州足球行列。

廣州吉利時期(2001)[編輯]

太陽神喺2001年初退出咗廣州足球行列之後,喺浙江吉利集團就開始贊助廣州足球,嗰時佢將跌咗落去乙級聯賽嘅廣州松日合併咗,變咗廣州隊。而吉利集團就好幾次喺主場比賽嘅中場休息入面搞汽車抽獎嚟刺激嗮成個球市。結果最後係攞咗甲B嘅第4位,雖然話第2位(成都五牛)同第3位(杭州綠城)嘅球隊因為搞出咗假波而取消咗升入甲A資格[3],好多人話廣州隊可以替補入去甲A嘅,但係點知就得個銡。就係噉,吉利因為未到預期嘅宣傳效果就走咗佬喇。

廣州香雪時期(2002——2003)[編輯]

2002年,廣州市足協負責託管廣州足球隊,結果香雪製藥就用咗8,000,000蚊嚟贊助。佢就嚟鍛煉新人,結果嗰時搞到甲B嘅賽季後半段都未贏過波,最後就攞咗倒數第二(第11位),但嗰年係取消咗升降級制度,所以2003年重可以喺甲B度踢。

2003年,香雪製藥重繼續攞8,000,000蚊嚟贊助。結果呢次就鹹魚翻生,最後就攞咗甲B嘅第3(嗰時係冇升降級)。

廣州日之泉時期(2004——2005)[編輯]

2004年,日之泉公司就用咗1嚟攞咗廣州足球嘅70%股份,佢係嗰時廣州嘅足球職業聯賽有史以嚟,第三個最大嘅股份。結果廣州中一藥業就用咗6,000,000蚊嚟贊助,本嚟佢想用「廣州日之泉香雪中一藥業隊」嘅名,但係嗰時足協規定話波隊唔畀有超過2個贊助商嘅名,結果佢就用咗「廣州日之泉中一藥業隊」嘅名嚟打嗰年嘅中甲聯賽。

2005年,天河城同廣州市城建集團用咗6,500,000蚊嚟贊助球隊。喺日之泉贊助嗰兩年,球隊重請咗好多位比較勁嘅外援入嚟,雖然球隊喺嗰兩個賽季凈係輸咗4場波,但凈係攞咗第4,冇殺入中超嘅份。

廣州醫藥時期(2006——2009)[編輯]

廣州足球隊攞咗2007年嘅中甲聯賽冠軍

由於日之泉同埋香雪喺2006年初都走嗮佬,嗰陣時廣州足球差啲就解散咁滯,結果就交咗畀廣州體育總局託管咗呢隻隊。後嚟廣州醫藥集團攞咗90%股份贊助,成為廣州足球隊歷史以嚟,第四個最大股東,而俱樂部名就變咗「廣州醫藥足球俱樂部」,而教練就換咗戚務生嚟教球隊。但係喺2006年嘅中甲聯賽入面,最後階段出現6連平先至攞咗第3名,最後沖超肥佬咗。

喺2007年嘅中甲之前,球隊重請咗前中國國家奧林匹克足球隊同北京國安主教練——沈祥福嚟教,跟住買咗徐亮李帥賈文鵬拉米雷斯呢啲有實力嘅球員,而球隊喺2007年嘅中甲聯賽入面,表現得好出色。結果徐亮、李帥、盧琳、徐德恩都先後入嗮國家隊同埋國奧隊。結果佢喺主場非常之火爆到中國內地出嗮名咁滯,甚至重高過除咗山東魯能之外嘅其它冚唪唥嘅中超聯賽球隊嘅主場平均入場人數,喺聯賽最後一輪,重創埋越秀山記錄添。而每場比賽都4個電視台同埋1個電台直播,喺內地好少見。而球隊喺廣州球迷,廣州市政府,廣州媒體同埋廣州企業等各界嘅關注同支持,重有教練員同埋新老球員嘅努力,結果打破咗好多項球隊同埋聯賽記錄。最後喺2007年嘅中甲聯賽入面,提早咗3輪殺入中國足球超級聯賽,重攞埋球隊喺職業聯賽史入面,第一個聯賽冠軍。

開打中超[編輯]

喺2008年,廣州足球隊第一次打中超聯賽。雖然話賽季初擴充咗球隊嘅實力,但球隊喺成個賽季入面表現得麻麻,開季——4勝1和0負排第2,中期——7場凈係攞咗1勝1和5負,奧運間歇期之後嘅4場——3勝1和0負,之後嘅7場——0勝4和3負,其中重包括咗球隊史上最大輸波紀錄——長春亞泰6-0廣州醫藥。最後6輪聯賽——2勝4和0負,而呢個波隊最後係10勝10和10負嘅成績,凈係攞咗第7。

而喺2009年嘅中超聯賽入面,雖然話廣藥高層講咗要攞第8——第6嘅成績,但球隊表現重係麻麻。喺賽季中雖然話連續7場未輸過波,甚至重差唔多去到亞洲冠軍盃入面,但後半段因為球隊猛咁出負面新聞,尤其係徐亮俾人猛咁督背脊。最後9輪入面,廣州隊都冇贏過波而凈係攞咗第9,唯一安慰就係球隊入面,洪都拉斯前鋒拉米雷斯入咗17個波而攞咗聯賽金靴獎。

打假波風波[編輯]

內文: 中國足壇反賭掃黑風暴

喺2009年底,廣州隊喺中國足壇反賭掃黑風暴入面俾人舉報喺2006賽季先後踢咗2次假波,結果廣州隊喺2010年2月23號俾中國足協處罰,同埋另一支假波嘅隊——成都錫菲聯一齊降級[4]。之後第二年元旦(2010年1月1號),廣藥集團話唔撈喇,退出咗足球嗰行。而波隊暫時畀返廣州市足協嚟睺實[5]

廣州恆大時期(2010——2014)[編輯]

2010年7月21號,喺佛山世紀蓮體育場嘅中甲聯賽第12輪比賽入面,廣州恆大10比0橫炒南京有有
2010年10月30號,廣州恆大隊嘅足球員齊齊慶祝攞咗2010年嘅中甲聯賽冠軍。

到咗2010年3月1號,嗰時嘅恆大集團用咗一億蚊嚟買嗮成個廣州足球會嘅股權,而波隊正式改咗名嗌「廣州恆大足球會」。嗰時廣汽集團用咗2500萬蚊嚟攞咗一年(2010年3月1號——2011年3月1號)嘅冠名權[6]

喺俱樂部成立咗之後,廣州隊重請咗南韓嘅鐵帥——李章洙嘅同時重買咗一大堆比較勁抽嘅波手(好似郜林鄭智孫祥等呢啲),尤其喺2010年6月30號嗰日,重出咗350萬美金創咗嗰時中國職業聯賽轉會費嘅新紀錄嘅轉會價錢嚟成功買低咗穆里奇呢位「巴西獵豹」前鋒返嚟。唔單止噉,廣州恆大重注重咗同媒體嘅溝通。嗰時中甲聯賽嘅廣州恆大嘅大多數比賽都係嗌咗廣東電視台體育頻道嚟搞現場直播,而且廣州本地平面媒體都跟住波隊一齊行勻成個中華人民共和國。而嗰年廣州恆大唔單止連第二次嘅中甲冠軍攞咗返嚟嘅同時,甚至提早3輪重新殺入埋中超聯賽

嗰年嘅比賽入面,唔單止創低咗中國職業聯賽轉會費嘅新紀錄同時,講得巴閉啲嘅喺2010年7月21號嗰日嘅中甲聯賽第12輪,廣州恆大主場以10比0嘅戰績橫炒南京有有,創低咗家吓中超聯賽最恐怖嘅比分紀錄。

升班馬第一年就攞咗聯賽冠軍[編輯]

內文: 2011年中國足球超級聯賽
2011年10月5號,廣州恆大第一次攞中超冠軍嘅慶典。

喺廣州隊返咗嚟中超後,恆大集團嘅波士——許家印一開始話丼好多錢入嚟繼續發展成個波隊。喺2011年嘅中超開波之前就先買咗張琳芃馮瀟霆楊君姜寧楊昊呢5位有中國國家隊嘅實力波手返嚟。甚至重以320萬歐羅嘅嗰時轉會紀錄新高嚟買咗喺比爾加遊擊隊踢波嘅克萊奧呢位巴西前鋒返嚟,之後重買咗前南韓國腳——趙源熙,同埋巴西後衛——保隆、巴西中場里拿多返嚟。喺開季無耐,因為恆大猛咁出好多錢嚟買大牌波手,結果俾好多中國內地媒體笑佢係咪搵笨㗎[7]。甚至連2011賽季中葉用咗1000萬美金嚟買咗巴西甲級聯賽嘅MVP——干卡返嚟,而呢次畀中國聯賽出咗國際巨星都有[8]。嗰時恆大集團喺買內外援嘅轉會費用方面,夾埋用咗超過一個億都有。而呢個賽季,廣州恆大隊用咗自己嘅實力嚟反擊,甚至係粉碎咗大多數中國內地嘅媒體質疑。喺2011年9月28號,佢喺陝西省西安市嘅客場入面攞咗佢第一個中超嘅冠軍返嚟[9]。而嗰屆中超甚至打破咗一個賽季連續23場未輸波嘅恐怖紀錄。喺中超倒數第三輪嘅比賽結束咗之後,廣州恆大所在嘅主場(天河體育中心)重搞咗「中超首冠 劍指亞冠」嘅慶典。

第一次攞埋超霸盃同足協盃,甚至第一次打亞冠就入咗8強。[編輯]

睇埋:2012年中國足協盃同埋2012年中國足球超霸盃
2012年2月25號,廣州恆大第一次攞咗中國超級盃冠軍。
2012年11月18號,廣州恆大第一次攞咗中國足協盃冠軍。

廣州恆大喺2012年2月25號甚至主場搞掂天津泰達而第一次攞埋超級盃,而呢次重係廣州足球史入面,第一次攞咗中國足協嘅超級盃。雖然話喺嗰屆亞冠入面分咗落俾好多媒體話嘅「死亡之組」入面,但係始終都可以出線。喺嗰場小組賽入面重出現咗作客5-1大炒全北現代嘅嘢,到咗亞冠16強嗰時甚至搞掂東京FC而殺入咗亞冠嘅8強。2012年5月2號甚至重出咗850萬歐羅嚟買咗世界最佳射手、巴拉圭國腳、多蒙特嘅射手——巴列奧斯返嚟,而呢次重係中國職業聯賽史上,身價最高嘅波手。嗰年5月17號甚至嗌咗世界入面比較出名嘅冠軍教練——馬車路列比嚟做一線隊嘅主帥,變咗第一位真正喺中國教踢波嘅出名教練;甚至喺7月2號——7月7號連韓國國奧隊嘅主力中場——金英權,喺嗰時全北現代踢波嘅中國國腳——黃博文都買咗返嚟。而恆大隊喺2012年10月27號喺中超第29輪主場搞掂遼寧宏運而提早一輪攞咗冠軍[10],變成第一支衛冕中超聯賽冠軍嘅波隊,而呢個冠軍,甚至重搞咗廣州足球甚至到中國足球嘅歷史。到咗2012年11月18號嗰日主場搞掂咗貴州人和(而家係貴州茅台足球會)而攞咗足協盃嘅冠軍返嚟,噉就搞掂咗雙冠王嘅嘢。而呢次足協盃冠軍重係中國足球喺職業化之後,第一隻華南地區嘅足球隊攞咗足協盃返嚟。而恆大隊喺2012賽季嘅中超結束咗之後都未停過買大牌波手,佢先後喺2012年11月20號同埋2012年12月24號買咗中國國腳馮仁亮同埋巴西新星艾傑臣返嚟。

廣州恆大淘寶時期(2014——)[編輯]

用過嘅名[編輯]

  • 中南白隊(1954—1959)
  • 廣州市足球隊(1961—1966)
  • 廣州青年隊(1977—1984)
  • 廣州白雲隊(1984—1992)
  • 廣州太陽神(1993—2001)
  • 廣州吉利(2001)[11]
  • 廣州香雪(2002—2006)[12]
  • 廣州日之泉中一藥業(2004—2006)[13]
  • 廣州醫藥(2006—2009)[14]
  • 廣州恆大(2010—2014)[15]

得獎紀錄[編輯]

廣州恆大攞咗2013年亞洲冠軍盃冠軍
  • 中國足球甲級聯賽冠軍:2007年、2010年
  • 中國足球超級聯賽冠軍:2011年、2012年、2013年、2014年
  • 中國足球超霸杯冠軍:2012年
  • 中國足協杯冠軍:2012年
  • 亞冠盃冠軍:2013年(決賽

喺亞冠盃踢過嘅隊[編輯]

到2015年3月5號為止[16]

東亞區[編輯]

西亞區[編輯]

隊歌[編輯]

廣州足球隊隊歌係粵語歌,由廣州球迷聯盟組織編寫,就喺2007年中甲聯賽開幕前出咗街。黃毅成負責作詞同埋編曲,肥蛇作曲。東山少爺喺唱片《唱好廣州2》唱過呢首隊歌,個名叫《廣州隊》。

但係喺富力藍軍FC廣州成立(2011年)咗之後,呢首隊歌究竟係歸邊隊就出咗問題。作詞人黃毅成喺2012年嘅其中一次採訪講到呢首歌嘅詞曲版權既唔係恆大淘寶FC廣州,又唔係富力FC廣州,佢凈係屬於球迷,球迷聯盟可以喺任何唔係商業用途上用呢首歌,啫係話名呢首歌唔係作為任何一支FC廣州嘅隊歌。但由於呢首歌同埋恆大淘寶華南虎嘅聯繫已經深入到社會民生,所以廣州波迷重係將《廣州隊》呢首歌當係恆大淘寶FC廣州嘅隊歌。

[編輯]

上一任
蔚山現代
亞洲冠軍盃冠軍
2013
下一任
西悉尼流浪者