廣州撐粵語行動

出自維基百科,自由嘅百科全書
跳去: 定向搵嘢
2010年7月25號廣州「齊撐粵語大行動」現場

廣州撐粵語行動粵拼gwong² zau¹ caang³ jyut⁶ jyu⁵ hang⁴ dung⁶)係廣州部分市民(主要係本地廣州人,但亦有少量廣州外地人)喺2010年中發起嘅一系列捍衞粵語嘅行動[1][2]。事件引起粵港澳三地網民嘅討論同當地媒體報道。

歷史背景[編輯]

1956年2月6號中華人民共和國政府實行推廣普通話嘅政策[3]。廣州市嘅各政府,教育機構開始逐步以普通話為主要語言,而廣州市本來嘅主要語言 —— 粵語嘅使用受到唔同程度嘅削弱。

1990年代末開始,廣州部分中小學校禁止學生喺學校期間講粵語,違例可被扣「道德操行分」,有人稱之為「講廿句粵語,三好學生無緣」。同時間亦有啲家長發現其仔女㗽屋企都唔講廣州話,甚至乎連睇粵語配音動畫片嘅興趣也無[4]

另外,隨住越來越多非粵語使用者嘅遷入以及推廣普通話嘅影響。廣東省甚至廣州市內一啲非粵語使用者(尤其係來自北方省份嘅普通話使用者)唔單止拒絕了解同學習粵語,甚至排斥同歧視粵語,稱粵語係「鳥語」、「唔係人話」,並蔑稱粵語使用者係「南蠻」、「猴子」,經常引起粵語使用者同非粵語使用者之間嘅爭執(尤其以網絡為甚)。部分極端者更拉攏其他非粵語使用者企圖同化佢哋生活範圍內嘅粵語使用者。

自1990年代中以來,廣東鄰近嘅廣西壯族自治區,尤其係省城南寧,喺20世紀仍係粵語使用嘅活躍地區之一,後來響市政府推行普通話政策多年後進行嘅非正式統計顯示,粵語人口已跌到唔夠三成,且多數為長者[5]

起因[編輯]

2010年6月廣州市政協喺網上搞咗一個網上問卷調查,建議增加廣州市營電視頻道嘅普通話節目,問卷內容一面倒,類似軟強迫,惹人質疑。隨即引起廣州市民嘅強烈反對。超過八成人反對呢項提議。並且引發廣府話存廢嘅激烈討論[6]

2010年7月,廣州市政協委員紀可光正式向廣州市人民政府提交「關於廣州市營電視頻道全面改用普通話廣播」嘅提議[7],隨即引起廣州市各界嘅強烈反對同批評[8][9]

同月有報道指廣州嘅執信南路小學要求學生喺課外時間都要講普通話,有受訪家長話學生如果被發現講粵語,就會被記名並交畀教師處理,甚至以扣分、「全校點名批評」作懲罰,因此佢個女唔敢講粵語,再係噉落去就連粵語都唔識講[10]

7月中,有市民發現明代名將袁崇煥東莞石碣故鄉紀念園嘅粵語口頭禪銘牌俾人鑿走。原來嘅金色銘牌上刻有佢打仗時嘅口頭禪「掉哪媽!頂硬上!」。香港《蘋果日報》指事件「令廣東話捍衞戰火上加油」[11]

有網民認為政府嘅做法有政治涵義:因為習近平好大機會喺2012年中共十八大上面接替胡錦濤中共中央總書記,但係「習總書記」嘅粵語發音同「雜種書記」係一樣。[12]

捍衞粵語行動[編輯]

有網民模仿香港電影《歲月神偷》嘅海報,整咗《碎粵神偷》諷刺畫[13]

7月11號,一班廣州市民喺人民公園舉行捍衞粵語活動,參加者一齊唱1980年代粵語流行曲,在場有人手持模仿香港政府宣傳政改口號嘅「廣府話起錨」標語[1]

7月16號,廣東省委書記汪洋喺廣東省委十屆七次全會上引用《論語》故事,表示廣東基本上已「富之」,下一步更重要嘅係「教之」,要「以教開智,以文化人」,喺談及點樣「教之」時提及要推廣普通話[14]。香港《蘋果日報》指汪洋嘅講話反映官方對民間呼籲保護粵語嘅立場仍然強硬[15]

事態進展[編輯]

一啲人將今次爭議同學校教材指定課文嘅法國短篇小說《最後一課》所述情境相提並論[16]

  • 7月19日,廣州市委副書記蘇志佳向傳媒表示粵語係嶺南文化嘅重要組成部分,市委、市政府從未諗過「廢除粵語」、「弱化粵語」[17]。同日《人民日報》有文章指出今次爭論已「波及整個粵港澳地區,以及粵語移民較多的加拿大和澳大利亞等地」[18]

自由亞洲電台於7月21日有文章指出「呢次嘅粵語存廢之爭,喺全國引起咗討論,爆發咗上海、北京、新疆等地對方言處境嘅反思,喺粵語覆蓋區域——例如香港,都引起咗香港人保衛粵語嘅共鳴。」[19]

(齊撐粵語大行動」現場有人展示「I❤GZ」(GZ代表「廣州」)字樣嘅衫
警方出動清場
  • 7月25日,一批廣州市民喺廣州地鐵江南西站A出口聚集支持粵語[20],但被警察阻撓,江南西站A出口一度被封閉。

活動主辦者喺事前已經向公安局備案[21],其後由於政府當局施壓,被迫自行取消活動[22]。然而25號仍然有大批市民喺下晝5點準時到達江南西站A出口,自發聚集,為粵語,為廣府文化發出自己內心嘅呼聲。

因廣州地鐵江南西站A出口地處繁華商業區,人流量大,現場好難區別主動參與集會人士同埋行街人士,故此關於參與人數嘅數字有多種講法。香港《蘋果日報》指有接近一萬人參加[23],香港《文匯報》就指有幾百人參加[24],自由亞洲電台粵語部引述在場人士話有二千幾人參加[25]。呢場「粵語保衛戰」更漫延至香港,有人喺Facebook設立群組,並發起8月1號喺灣仔舉行保護粵語大行動[26]

大陸媒體幾乎冇報導甚至提及呢件事,可能已經被大陸封鎖新聞,新浪微博第一時間封咗有關粵語文化、廣州文化嘅微博群,並限制搜索廣州、粵語等關鍵字嘅微博,重未知原因。

7月28日,中共廣州市委副書記蘇志佳再次明確表示廣州市委,廣州市政府無意廢除同弱化粵語,「推普廢粵」純屬子虛烏有[27]

然而,廣州市政府講一套,做一套嘅做法並冇解決問題。喺9月18,19號兩日,香港知名人士蔡淑芳,同名博客寫手鍾雙羽聯手發起全球撐粵行動。因為當局喺大陸已經提早實行打擊,大陸方面嘅集會未能成功,但係香港同美國就如期舉行[28]

風波再起[編輯]

廣東省人民政府喺2011年12月17日公布《廣東省國家通用語言文字規定》[29],指政府機關、教育、媒體等界別嘅人士需要使用普通話而唔係方言,引起民眾不滿[30]。廣東省政府發言人就話,呢個舉動冇限制到方言嘅使用[31]

參考[編輯]

  1. 1.0 1.1 粵唱粵有愛 廣州年輕人快閃撐粵語
  2. 政協擬逼電視台改用普通話播放 民眾抵制 廣州爆廣東話捍衞戰. 2010年7月16號 查過。.
  3. 我嘅年度記憶:1955 大家學說普通話
  4. 《撐粵語防凋零 廣州責無旁貸》,香港《東方日報》,2010年8月3日。
  5. 《推普的“南寧現象”》,《羊城晚報》,2010年7月13日。
  6. 廣州電視台改普通話爭議再起 八成市民不贊同. 2010年7月16日 查過。.
  7. 廣州電視台改用普通話
  8. 九成人不同意?要引導嘛
  9. Southern Chinese oppose ban on Cantonese TV. 2010年7月16號 查過。.
  10. 《廣州一小學“封殺”粵語 祖孫倆竟變“雞同鴨講”》,載於news.xinhuanet.com,2010年7月9號。
  11. 《蘋果日報》:袁崇煥熱血名句 遭官方下令鏟走
  12. 香港人支持「保粵語戰」
  13. 《透視大中華》:廣州電視台粵普之爭,www.rthk.org.hk,2010年7月12號。
  14. 《汪洋:「教化」廣東人》,載於hk.news.yahoo.com,2010年7月16號。
  15. 《捍衞戰升級 高呼「光復廣州」兩萬白衣人將集會撐廣州話》,香港《蘋果日報》,2010年7月17號。
  16. 《廣州人至愛粵語,網上“撐”聲一片》,載於nf.nfdaily.cn,2010年7月17日。
  17. 《穗市委副書記:不存在「推普廢粵」》,香港文匯網,2010年7月20日。
  18. 《推廣普通話必滅粵語?廣州激辯“粵語保衛戰”》,新華網,2010年7月19日。
  19. 《熱點:廣州青年發起 ”撐粵語” 行動》,載於www.rfa.org,2010年7月21日。
  20. 廣州2000人上街集會“撐粵語”,聯合早報網,2010年7月26日。
  21. 《料2萬白衣人搞集會 中廣州話捍衛戰升級》,光華電子新聞,2010年7月18日。
  22. 《當局推普廢粵引起民間“撐粵語”》,載於www.rfa.org,2010年7月23日。
  23. 《廣州萬人上街撐廣州話 防暴警戒備 便衣警偷拍 80後頂硬上》,香港《蘋果日報》,2010年7月26日。
  24. 《穗數百人上街「撐粵語」 場面平和》,香港《文匯報》,2010年7月26日。
  25. 《廣州市民集會保衛粵語》,載於www.rfa.org,2010年7月26日。
  26. Facebook群組《我相信可以召集十萬人阻止中國推普滅粵的惡行》
  27. 廣州市政府重申:“推普廢粵”是根本不存在的偽命題
  28. [http://www.facebook.com/media/set/?set=a.1548948956496.80709.1018248142 香港撐粵語現場圖片 2010年9月18日。
  29. 鳳凰網:《廣東省國家通用語言文字規定》全文
  30. 太陽報:撐粵語港頂硬上
  31. 新華社:廣東官方:"廢粵"不存在 無任何條款限制方言播出

睇埋[編輯]

出面網頁[編輯]