成龍

出自維基百科，自由嘅百科全書

跳去: 定向, 搵嘢
房仕龍嘅劇照
Jackie Chan monument at Musée Grévin

房仕龍（又名陳港生（意思係「香港出世」），1954年4月7號—），藝名成龍，係一位香港出身嘅荷李活武打片明星。

目錄

[編輯] 履歷

成龍早喺六歲嗰陣拜讀于占元嘅「中國戲劇學校」學習京劇，係七小福之一，藝名元樓。成龍係師父于占元嘅契仔，細個嗰陣以學習功夫為主。但由於京劇式微，于占元為咗徒弟嘅前途，鼓勵徒弟入戲行。1971年成龍入電影圈，主要係邵氏擔任特約演員嘅角色。冇幾耐李小龍突然逝世，武打片票房受到嚴重打擊而減產，武師好多都冇得撈，成龍亦一度失業，只靠住做散工為生。直到1976年俾電影人羅維睇中，拍攝《新精武門》，正式攞名「成龍」，但冇一部成功。

[編輯] 巨星嘅崛起

直到1978年吳思遠開拍由袁和平執導嘅《蛇形刁手》﹐向羅維借用成龍出做主角，先至係影圈漸露頭角，但真正奠定成龍喺影壇巨星地位﹐係同年拍攝嘅《醉拳》﹐大破各地票房紀錄﹐得空前成功。隨後重自導自演拍咗多部包括《笑拳怪招》、《師弟出馬》幾部動作電影，票房長紅。呢嗰時候羅維嘅幕後支持者嘉禾電影嘅鄒文懷安排咗成龍到荷里活拍攝《殺手壕》、《炮彈飛車》、《威龍猛探》一系列嘅低成本西片，未有作為。1983年返到香港拍攝《龍少爺》重振聲威，跟著夥拍師兄洪金寶拍攝一系列「福星片」。1985年成龍仲憑《警察故事》得到香港電影金像獎最佳故事片獎。1992年，成龍以《警察故事３》榮獲台灣《金馬獎》最佳男主角，1993年，再度憑《重案組》連莊《金馬獎》影帝。成龍一路以嚟都係以演動作片為主，尤其喺佢每次演出都梗係親身上陣，完全唔用替身，喺電影界係相當少見嘅。但係2007年香港著名替身羅禮賢則踢爆成龍一路都用替身，親自上陣為招牌喺個講大話[1]。羅禮賢話：「從做小弟嗰日起，就一直睇住成龍用替身過嚟。」而唐季禮導演本人回應話：「每一個動作都係成龍完成嘅，所謂嘅替身只係喺設計動作嘅時候做啲難度同埋危險度。」 根據採訪內容，羅禮賢只有比較明確咁指自己做過成龍嘅飛車特技替身，早期柯受良都做過成龍飛車替身，都唔係近年先至披露嘅秘密，都冇其他證據指成龍係高處躍下或爆破等等動作戲全部都係替身代勞，而成龍嘅飛車特技作品佔少數[2]。

[編輯] 走向國際

成龍早喺1982年就開始入荷里活，但佢邁向國際之路並唔順遂；佢首次進軍國際嘅作品係《砲彈飛車》，票房失利，令成龍要相隔多年先至再闖荷里活。而真係令成龍打入國際市場係1994年拍攝嘅《紅番區》，喺美國上嗰陣創下高票房紀錄，跟住第一部荷里活電影《火拼時速》，一樣得高嘅票房，上《時代》雜誌，奠定今日喺國際嘅地位。但係之後嘅荷里活影片好似《The Tuxedo》、《八十日環遊世界》等，喺全球票房普遍唔好。成龍講過，荷里活唔喺佢嘅天下，只有返到香港成龍先至如魚得水[3]。2007年喺北美上映嘅《火拼時速３》都創下將近１億４千萬美元嘅票房紀錄，夾埋《火拼時速》系列三部喺北美累積票房超過５億美元、全球累積８億３千５百萬美元；而家為止，重未有其他亞洲演員主演嘅電影有咁嘅成績。

[編輯] 作品列表

[編輯] 主演電影

[編輯] 唱片

  • 1984年 《愛我》、《謝謝你》
  • 1986年 《理想樂園》、《成龍》
  • 1987年 《没問题》
  • 1988年 《The Best of》
  • 1989年 《再次見你》、《拿球棒的人》
  • 1992年 《第一次》
  • 1995年 《超级精裝大戲主題曲》
  • 1996年 《龍的心》
  • 2002年 《真的，用了心》

[編輯] 參考

  1. ↑ 東森新聞‧〈成龍拍戲用替身　香港武術指導導演羅禮賢爆料〉‧2007年4月4日
  2. ↑ 自由時報‧〈特技演員踢爆成龍拍戲用替身〉‧2007年4月4日
  3. ↑ 新華網‧〈成龍心聲：好萊塢不是我的天下〉‧2004年9月3日

[編輯] 出面網頁

 呢篇成龍係關於香港人物同傳記嘅楔位文章，重未完成嘅。麻煩你幫手補充佢嘅內容。

由 "http://zh-yue.wikipedia.org/wiki/%E6%88%90%E9%BE%8D" 收
個人工具