賓拉登

出自維基百科,自由嘅百科全書
(由拉登跳轉過嚟)
賓拉登
أسامة بن محمد بن عوض بن لادن
賓拉登,約1997年
阿蓋達第1任首領
任期
1988年-2011年5月2號
前任首任
繼任扎瓦希里
個人資料
出世Usama bin Mohammed bin Awad bin Laden
(1957-03-10)1957年3月10號
 沙地阿拉伯利雅得
2011年5月2號(2011-05-02)(54歲)
巴基斯坦 巴基斯坦開伯爾-普什圖省艾布塔巴德
34°10′09″N 73°14′33″E / 34.16928°N 73.24252°E / 34.16928; 73.24252
死因槍傷
國籍 沙特阿拉伯
(1957–1994年)
冇國籍
(1994–2011年)
身高1.95 m
配偶Najwa Ghanhem
Khadijah Sharif
Khairiah Sabar
Siham Sabar
Amal Ahmed al-Sadah
仔女20至26
宗教信仰伊斯蘭教(華哈比派/薩拉菲)
軍事背景
效忠阿蓋達(1988-2011年5月2號)
服役時間1984年-2011年5月2號
軍銜阿蓋達嘅埃米爾
參戰蘇聯-阿富汗戰爭

反恐戰爭

奧薩馬·賓·拉登[註 1](亞剌伯文: أسامة بن محمد بن عوض بن لادن‎;Osama bin Muhammad bin 'Awad bin Laden'1957年3月10號2011年5月2號[1]),全名奧薩馬·賓·穆罕默德·賓·阿華德·賓·拉登,係阿蓋達組織第一任阿頭,以多單襲擊事件出名,亦畀多個國家通緝

老豆係也門人,阿媽係沙地阿拉伯[2]。佢喺也門建築大亨賓拉登家族嘅57個仔女入面排第17,佢自己就有三個老婆同十三個仔女,不過由佢結過差唔多22次婚,所以實際有幾多仔女其實無人正式計過[3][4]

由於佢老豆支持阿富汗抗戰1980年佩沙華同阿富汗游擊隊領袖見面之後,佢就成為游擊隊最大金主,之後重得到美國中央情報局喺武器、訓練設施、醫療各方面資助,喺霍斯特成立訓練中心,訓練阿拉伯志願軍加入阿富汗抗戰。1989年成立阿蓋達al-Qaeda)基地組織,用嚟管理同服務阿富汗志願軍。佢亦利用佢出錢起嘅志願軍宿舍傳播華哈比派思想,由於阿富汗人都唔鍾意華哈比派,所以佢同阿富汗游擊隊有唔啱啞情況。但係就同普什圖人塔利班理念合拍。1996年8月,佢公開宣佈,由於美國人侵佔沙地阿拉伯嘅土地,所以要向美國發動聖戰1998年8月美國肯雅坦桑尼亞大使館發生炸彈襲擊,美國話係賓拉登做,賓拉登因為噉而開始出名。2001年911事件發生之後,美國一口咬定係賓拉登主使,唔單止令賓拉登成為全世界家傳戶曉嘅人物,重令佢成為全世界十大懸紅最高嘅通緝犯之一。

[編輯]

其實冇普遍譯名係可以準確將阿拉伯人名譯成英文,因為佢冇羅馬拼音轉寫,所以全靠各路師爺自己譯。奈何拉登實在太出名,所以每度地方譯法唔同:美國情報機關直接將佢譯成「烏薩馬·賓·拉登」(Usama bin Laden);法文媒體就將佢譯成Oussama ben Laden;有媒體譯成Ussamah bin Ladin;另外有媒體直接叫佢做「拉登」。

佢嘅全名「奧薩馬·賓·穆罕默德·賓·阿華德·賓·拉登」,意思係「拉登個仔阿華德個仔穋罕默德個仔奧薩馬」(自己個名・老豆個名・阿爺個名・阿太個名),穆罕默德係指緊佢老豆穆罕默德賓拉登;阿華德係指緊佢阿爺阿華德·賓·阿博·賓·拉登(Awad bin Aboud bin Laden);拉登就係指阿太Laden Ali al-Qahtani。所以「奧薩馬」先係佢個名。

跟返阿拉伯人名,閃米人其實係冇姓,拉登係佢父名、唔係佢個姓,所以叫佢「奧薩馬·賓·拉登」或者「奧薩馬」先至符合阿拉伯人名傳統。但由於各路師爺受到歐美人名影響,以為最後一個字就係佢個姓,就稱之為「賓拉登」。

簡歷[編輯]

家族背景[編輯]

奧薩瑪賓拉登係也門建築大亨穆罕默德賓拉登(Mohammed bin Awad bin Laden,1908—1967)個仔,佢係費瑟親王死黨,因為做咗幾個大工程而發跡,之後又承包晒麥加麥地那清真寺重建同擴建工程。

奧薩瑪賓拉登喺吉達阿布都阿濟茲國王大學讀企業各管理,後來轉讀伊斯蘭研究,雖然成績超群,但就一啲唔出風頭,可以話好平凡同低調。

阿富汗[編輯]

由於同費瑟親王關係密切,所以亦算係皇族,巴基斯坦希望可以有啲有皇族身份嘅人加入抗蘇志願軍,顯示皇室對抗戰支持,拉登因為咁派咗去領導沙地分遣隊。亦因為咁而同費瑟親王熟絡咗。

而喺阿富汗阿拉伯抗蘇志願軍中心係喺白夏瓦,呢度亦同時係世界穆斯林聯盟穆斯林兄弟會嘅辦公室。呢個中心最主要做嘅嘢,係畀新加入士兵嘅服務中心,同時接受包括伊斯蘭慈善機構、沙地阿拉伯情報局、沙地紅月會、世界穆斯林聯盟、同埋嚟自唔同沙地阿拉伯親王、私人同清真寺嘅捐款,重有美國CIA武器、訓練設施、醫療各方面資助,都喺晒呢度處理。呢個中心由阿布都拉阿薩穆(Abdullah Azam)渣fit,佢係約旦巴勒斯坦人,喺吉達大學時識到拉登,而拉登喺奉召去到阿富汗之後,1982年開始搬咗去白夏瓦住。

1989年阿布都拉阿薩穆同佢兩個仔一齊喺白夏瓦畀人用炸彈暗算死咗,拉登就接手晒阿布都拉阿薩穆所有嘢,佢接管咗阿薩穆嘅組織之後,成立阿蓋達al-Qaeda)作為新嘅志願軍服務中心,由原本只係服務新加入士兵,變成服務晒所有阿拉伯志願軍同埋家屬嘅中心,令唔同志願軍聯繫埋一齊,之後喺庫納爾、努里斯坦、巴達桑都成立咗阿蓋達組織,阿蓋達喺阿拉伯話解基地,基地就係咁意思。

不過由於拉登同阿蓋達信奉瓦哈比派,而阿富汗人又好憎呢一派,所以阿拉伯志願軍喺阿富汗其實唔太受歡迎,志願軍喺阿富汗嘅主要盟友係普什圖游擊隊,拉登因為咁同普什圖游擊隊領袖歐瑪爾(Mullah Mohammed Omar)做咗死黨,而歐瑪爾後來成立咗塔利班組織。

由於同阿富汗游擊隊唔啱啞,1990年佢返返沙地阿拉伯屋企打理家族生意,同時成立基金,支援阿拉伯志願軍退伍軍人同家屬。

科威特[編輯]

1990年8月伊拉克軍隊入侵科威特,引發海灣戰爭,拉登於是遊說皇室,喺阿富汗抗戰入面嘅阿拉伯志願軍組織民間防衛隊,捍衛科威特主權,抵抗伊拉克。但係同一時間,美國派咗五十四萬大軍去科威特打伊拉克。拉登當堂激到生虾咁跳,重要求皇室發宗教諭令,反對非穆斯林參與科威特戰爭

不過科威特最後仍然喺美軍支援下,成功解放。但之後有兩萬美軍仍然駐咗喺沙地阿拉伯,拉登更加係臖過借火,佢重走去搵內政部長納夫(Naif)投訴,又鬧佢係伊斯蘭叛徒,拉登同皇室因為咁而反面。但皇室入面同樣有好多人唔妥納夫,所以拉登仍然同皇室維持關係,另外佢同沙地情報局巴基斯坦ISI仍然維持良好關係。

蘇丹[編輯]

1992年蘇丹首長哈山圖拉比(Hassan Turabi)發起伊斯蘭革命,拉登走咗去趁熱鬧,去到蘇丹佢又喺度猛鬧沙地皇室,結果激嬲咗沙地皇室,重將佢國籍取消。拉登因為咁而開始喺蘇丹定居,但由於佢大把錢兼識得人多,所以佢喺蘇丹埋班,好多喺阿富汗抗戰時嘅阿拉伯志願軍都走去搵佢,大家都咁憎美國,同時又好唔滿意沙地皇室畀美軍留係波斯灣,不過由於高調反美,喺美國施壓下,蘇丹唯有將拉登趕走,之後拉登就去咗阿富汗

發動聖戰[編輯]

拉登同十幾個前阿拉伯志願軍、3個老婆同13個仔女,加埋保鑣去到阿富汗加拉拉巴,由於沙地阿拉伯將佢國籍撤銷咗,而有份參與海灣戰爭美國德國法國都將佢列入不受歡迎人物,而阿富汗人又對佢無好感,所以開頭佢只係喺伊斯蘭議會保護之下,有限度咁活動,可以話乜都搞唔到。直到1996年塔利班攻陷阿富汗首都喀布爾,成為阿富汗執政政權,加拉拉巴亦受到控制。拉登同塔利班領袖歐瑪爾一早已經係老友,拉登開始受到塔利班保護,同時,佢開始畀錢支助索馬利亞蘇丹埃及也門同阿富汗嘅恐怖份子訓練營。1996年8月,佢發表宣言,話要向美國發動聖戰,認為美國佔領咗沙地阿拉伯,喺宣言入面話:「只有鎗林雨彈先可以清洗呢啲羞辱」。拉登同佢嘅阿蓋達組織以堪達哈為基地,又再度活躍返,重成為全世界好多激進組織嘅網絡中心。

1998年2月23號,拉登同佢嘅阿蓋達組織加埋相關團體發表一份叫《反猶太與十字軍聖戰國際伊斯蘭陣線》嘅聯合宣言,指「美國佔領伊斯蘭土地同神聖嘅阿拉伯半島,掠奪財富兼羞辱民眾,將半島變成打擊穆斯林嘅基地。」之後又發諭令,話要殺晒所有美國人同佢哋嘅盟友,唔理平民定軍人都照殺,唔理你喺邊個國家,只要有機會都要奉行諭令。

結果,喺1998年8月,美國肯雅坦桑尼亞大使館發生炸彈襲擊之後,一連串針對美國嘅恐怖襲擊展開,其中包括舉世震驚嘅2001年911事件

[編輯]

911事件之後,美國喺2001年10月對阿蓋達同埋塔利班發動反恐戰。兩個月後阿富汗塔利班政權倒台,拉登就開始喺阿富汗同埋巴基斯坦周圍匿。

2011年5月2號,美軍攻入拉登喺巴基斯坦嘅大屋並將佢打死,美軍攞走咗佢條屍,隨後將佢海葬。

註解[編輯]

  1. 根據阿拉伯話,奧薩瑪 賓拉登Osama bin Laden入面,bin Laden其實係解「拉登個仔」,"bin"係解「XX個仔」,奧薩瑪(Osama)先係名,不過傳媒習慣咗叫「拉登」或者「賓拉登」,結果「賓拉登」就變成奧薩瑪喺講阿拉伯話嘅地區之外嘅普遍稱呼。

參考[編輯]

  1. "Wanted: Usama Bin Laden". Interpol. 原著喺2004-12-11歸檔. 喺2006-05-15搵到.
  2. Michael Scheuer, Through Our Enemies' Eyes, p. 110
  3. Letter From Jedda, Young Osama, How he learned radicalism, and may have seen America 互聯網檔案館歸檔,歸檔日期2005年12月7號,., by Steve Coll, The New Yorker Fact, Issue of 2005-12-12, Posted 2005-12-05
  4. "Salon.com News - The making of Osama bin Laden". Salon.com. 原著喺2007-03-07歸檔. 喺2006-08-21搵到.