拿騷級戰列艦
拿騷級戰列艦（德文：Linienschiffe der Nassau-Klasse），係德意志帝國海軍整嘅一種無畏艦。拿騷級戰列艦係對當時英國整嘅無畏級戰列艦所作嘅回應[1]，一共整咗四艘：拿騷號、威斯特法侖號、萊茵蘭號同波森號。
設計[編輯]
同大英帝國嘅無畏艦相比，拿騷級戰列艦更加輕。由於英國戰列艦用嘅係大功率渦輪發動機，而拿騷級就保留咗垂直三重擴張引擎，所以喺速度上比英國嘅無畏級戰列艦慢。相比較無畏級戰列艦30.5厘米嘅口徑主炮，拿騷級28厘米口徑嘅都比較細。[1]
總體特徵[編輯]
拿騷級戰列艦長146.1米，闊26.9米。由於裝咗四座帶翼炮塔，船身一定要闊尐，所以同同時代嘅戰列艦相比，拿騷級5.45:1嘅長闊比喺視覺上顯得艦身比較短[2]。
拿騷級戰列艦好難操控，就算響平靜嘅海入面，行動都好僵硬。安裝嘅帶翼炮塔重心太高，令到拿騷級成日遭受震蕩。[3]
動力[編輯]
由於海軍上將阿爾弗雷德·馮·提爾皮茨同海軍建設部門嘅雙重抵制，德意志帝國海軍好遲先用先進嘅帕森斯渦輪發動機。1905年，海軍建設部門認為「重型軍艦唔適合用渦輪機」[4]，所以拿騷級戰列艦保留咗過時嘅垂直三重擴張引擎，額定功率係22000馬力。[5]響測試入面航速喺26224至28117馬力嘅功率之下達到20至20.2節[1]，但係比無畏級戰列艦嘅21節慢[6]。
每艘拿騷級戰列艦都裝有12個舒爾茨-桑尼克羅夫特鍋爐，分裝響6個鍋爐室入面[1]。
最初，每艘拿騷級戰列艦配置2700噸煤；改良之後，改做配置160噸燃油嚟提高燃燒率。8個渦輪發動機以225伏配置電壓提供1280千瓦嘅電力。[5]
武器裝備[編輯]
由於垂直三重擴張引擎佔據咗大量嘅內部空間，安置火力裝備嘅範圍被嚴重限制：例如響設計嗰陣，唔可以唔將六座主炮呈六角分佈設置[7]；分別有兩個座位位於艦艏艉部，其餘嗰兩個座位於船體兩側，令到12門主砲向左右舷淨係可以齊射8門。[8]
裝甲[編輯]
拿騷級戰列艦舷側裝甲最厚嗰度有30厘米，內部就有3厘米厚嘅魚雷艙壁[5]。甲板裝甲就厚5.5至8厘米（2.1至3.1英寸）。前部指揮塔裝甲頂部厚8厘米，側面厚40厘米；後部指揮塔嘅保護比較弱，頂部同側面嘅裝甲厚度分別係5厘米同20厘米。主炮台炮塔頂部厚9厘米，側面厚28厘米；副炮塔裝甲就有16厘米嘅裝甲同8厘米厚嘅擋板。拿騷級戰列艦原本重裝咗防魚雷網，但響1916年撤除。[5]