文華新村

出自維基百科,自由嘅百科全書
跳去: 定向搵嘢
渡船角上嘅文華新村
喺油麻地填地,擎天半島望過去文華新村

文華新村香港一個大屋苑,喺於九龍油麻地渡船角。佢起喺佐敦道渡船街交界。1963年香港年報講,係當時最大嘅私人屋苑。呢條村發展商係嘉年企業

文華新村一共8棟樓,全部用「文」字開頭,因此又叫八文樓。文華新村前身係油蔴地碼頭倉庫,同埋中華煤氣公司舊煤氣廠。嘉年企業喺1955年購入,1961年發展成住宅大廈。而油蔴地小輪就將碼頭搬到渡船角,起咗佐敦道碼頭巴士總站。文華新村有呢個交通之便,吸引唔少中產階級人士居住。開售嗰陣,文華新村三千幾個單位,以接近1.6億賣出,令發展商賺到盤滿砵滿。

文華新村8棟樓之間,全部有街道間隔,大廈好似「田」字形咁,有四排,一排兩棟。文華新村原本三面環海,好多單位有全海景。之不過,1990年代,香港政府搞玫瑰園計劃,喺佢周圍填海,文華新村變成內陸地段。

2000年代,文華新村已經四十年,設計已經過時,內外陳舊。佢多幢大廈相連設計(但唔互通),幫咗罪犯匿埋同走佬,因為咁治安差咗。連賊王季炳雄都匿過喺度。2003年12月24號凌晨3點幾,香港警察飛虎隊破門入文景樓1229室,逮捕季炳雄,重喺屋裏面搵到大批槍械手榴彈,成為當時大新聞。文華新村嘅獨特環境,引到唔少電影取景,好似杜琪峰執導嘅《大事件》,就喺呢度拍。

文華新村未來會喺三條鐵路中樞附近,文華樓南面,過小巴站同佐敦道,有柯士甸站九龍站同埋佐敦站

治安較舊時好,有夜市食肆林立,出夜街唔會靜英英,無有怕。當地新住戶夾雜南亞人,佢哋多數有宗教信仰,頗爲善良。

樓名[編輯]

  • 文昌樓
  • 文耀樓
  • 文輝樓
  • 文景樓
  • 文蔚樓
  • 文苑樓
  • 文英樓
  • 文華樓

出面網頁[編輯]