新世界第一巴士

出自維基百科,自由嘅百科全書
(由新巴跳轉過嚟)
新巴嘅Neoplan Centroliner N4426型巴士。

新世界第一巴士服務有限公司New World First Bus Services Limited,簡稱:新世界第一巴士新世界巴士新巴同埋NWFB)係香港五間專營巴士公司之一,喺1998年9月1號接辦中華巴士嘅88條線之後正式開始運作。主要營運港島區嘅巴士線,亦有營運少量九龍區新界區嘅巴士線。新巴嘅專營權由2023年7月1號起,合併入全新嘅城巴市區同新界巴士網絡專營權。

歷史[編輯]

1998年初,新世界第一巴士服務有限公司正式成立。由新世界發展有限公司以及英國最大嘅陸上運輸機構第一集團合資,新世界發展(其後因集團架構重組而注入佢嘅服務業分支新創建集團有限公司)持有74%股權,而第一集團就持有其餘26%股權。當時經營港島區巴士服務嘅中華汽車有限公司(中巴)不獲延續專營權,政府就將佢其中88條路線攞出去公開競投,最後由冇任何交通營運經驗嘅新巴贏得專營權。據當時政府指出,新巴之所以能夠取得專營權,原因係新巴喺香港冇經營任何公共交通服務,符合政府引入新經營者嘅意向,同時新巴重提出一個最重要承諾:接收全部前中巴員工,解決前中巴員工嘅去留問題同埋買中巴原有車隊。呢次競投之後,中巴退出專利巴士市場,全面進軍地產業。

新巴接管88條巴士線後,只用一年幾時間就走上軌道,包括買新巴士、改善管理制度員工福利、加強巴士線班次等等。喺買新巴士方面,新巴專門買低地台巴士,包括「丹尼士三叉戟」雙層冷氣巴同埋「丹尼士飛鏢」單層冷氣巴。最初呢啲新巴士一時間趕唔切付運,新巴只係暫時買中巴嘅舊巴士服務,但呢啲舊巴士之中得冷氣巴有得留低,並相繼得到翻新。至於冇冷氣嘅巴士就喺其後4年內,全部被淘汰,淨係得一架丹尼士禿鷹(車隊編號:DM6)改為開篷巴,用嚟行山頂纜車接駁路線15C,直到2008年1月底。新巴自1999年3月起安裝八達通收費器,並喺2001年2月搞掂晒。2000年年尾,第一集團將手上嘅26%新巴股權賣畀新世界發展,但公司全名嘅「第一」字眼未有改走繼續沿用。2001年新巴推出八達通轉乘計劃,透過喺唔同路線上實施,令新巴可以借呢個計劃,取消一啲客量唔理想嘅路線,重組巴士網絡節省資源。

新巴嘅服務範圍最初只係喺香港島,直到1999年7月,政府將天水圍北同埋將軍澳南巴士線作公開競投。新巴成功投得將軍澳南嘅一組共7條路線。2001年新巴再投得西九龍新區巴士線專營權,成功將服務範圍擴展至九龍新界

喺營運初期新巴不斷強調形象,成日喺巴士上貼自我宣傳廣告以顯示佢嘅進取精神。不過由於之前新巴未有任何本地交通營運經驗,所以經營能力經常受到質疑。根據香港交通投訴組2003年報(PDF),新巴嘅投訴率係三大專營巴士公司之冠。

2020年10月,城巴同新巴業務由新創建集團賣咗畀由Templewater Bravo Holdings Limited、Ascendal Group Limited同埋漢思能源組成嘅財團[1],成為匯達交通嘅一部分[2],而新巴公司全名嘅「新世界」字眼未有改走繼續沿用。

2022年7月12號行政長官會同行政會議宣布,新巴嘅專營權會喺2023年7月1號併入城巴嘅港島及過海巴士專營權[3],同日匯達交通開記者會確認2023年7月1號起只會用城巴單一品牌營運,標誌新巴25年歷史結束。

[編輯]

  1. 創建32億元出售新巴及城巴業務. . 2020-08-21. 喺2020-10-18搵到.
  2. 巴新巴母企敲定中文名達交通 員工可票選新logo. 果日報 (香港). 2020-10-28. 原著喺2020-11-07歸檔. 喺2020-11-01搵到.
  3. 巴併入城巴 新車費上限取較高者 運輸局稱車費維持不變 政黨憂借重組致市民捱貴線. 2022-07-13. 喺2022-07-14搵到.

出面網頁[編輯]