施丹

出自維基百科,自由嘅百科全書
跳去: 定向搵嘢
施丹

施丹Zinedine Zidane1972年6月23號—)係一法國前職業足球員

生平[編輯]

施丹祖籍非洲阿爾及利亞,父母都係阿爾及利亞柏柏爾人,佢自己就喺法國南面城市馬賽出世

施丹13歲就加入康城(AS Cannes),開始咗佢嘅球員生涯。1988年(即係佢16歲嗰陣)佢第一次代表康城喺法國甲組足球聯賽聯賽上陣。1992年轉會波爾多,並且喺1996年幫球會打入歐洲足協盃決賽。第二年再轉會意大利甲組足球聯賽勁旅祖雲達斯,當時施丹已經有少少名氣。施丹打緊波爾多嗰陣開始入選法國國家隊,1994年8月17號第一次為國家隊上陣出戰捷克,之後做埋國家隊嘅核心成員。

施丹足球生涯嘅巔峰,係1998年FIFA世界盃。嗰屆佢喺世界盃決賽對巴西嗰陣頂入咗兩球,幫法國第一次贏到FIFA世界盃,賽後成班國家隊成員獲法國總統受勳。施丹之後大受歡迎,重做咗法國人心目中嘅英雄。2000年法國隊贏埋歐洲國家盃,當時施丹再度成為法國隊奪標嘅最大功臣,佢分別喺八強射入一球靚罰球淘汰西班牙,再喺四強加時射入十二碼淘汰葡萄牙;多數人都認為施丹係當屆賽事嘅最佳球員,亦奠定咗佢嘅球王地位。

2001年施丹以破世界轉會費紀錄6600萬歐羅(即係4562萬英鎊)加盟西班牙甲組足球聯賽球會皇家馬德里。呢個亦係佢職業生涯嘅第二個高峰。喺皇馬期間,佢贏過西甲聯賽冠軍,更喺2002年歐聯決賽對利華古遜嗰陣,射入「世界波」幫球隊贏咗冠軍。嗰年啱啱係皇馬創會一百週年誌慶。不過佢同年受傷,所以喺2002年FIFA世界盃決賽週只係打咗一場,最後法國隊喺分組賽以一分、冇入波嘅成績出局。

施丹喺2004年歐洲國家盃法國隊八強出局之後退出國家隊,但之後法國隊喺2006年FIFA世界盃外圍賽踢得好差,佢就再次重返國家隊,最後重幫球隊成功出線2006年世界盃決賽週。喺2006年4月27號,施丹正式宣佈會喺世界盃之後退役。

施丹嘅告別賽係2006年7月9號意大利嘅世界盃決賽。佢喺開賽7分鐘就射入一球12碼,為法國隊先開紀錄。但係喺加時下半場,意大利隊嘅馬特拉斯同施丹起衝突,施丹之後一頭撞向對方心口報復,結果畀球證紅牌趕出場,法國最後喺互射十二碼輸咗。雖然係咁,施丹仍然憑佢出色嘅表現,得到法國人民嘅諒解,最後國際足球協會重頒咗個世界盃金球獎畀佢。施丹係目前唯一一個攞過紅牌,重可以得到呢個獎嘅球員。2006年7月11號,法國總統希拉克親自接見施丹,讚佢係世界足球史上最好嘅球員之一。

由於施丹退咗役,而家佢只會間唔中以個人名義參加一啲慈善賽。

[編輯]

出面網頁[編輯]