日野Rainbow

出自維基百科,自由嘅百科全書
日野Rainbow
日野・レインボー
Hino Rainbow

日野Rainbow RB1WEAA

日野Rainbow RJ1JJHK

日野Rainbow HR1JKEE
又叫五十鈴Erga J(HR系列嘅OEM,2003年—2007年)
製造廠日野(1966年—2004年)
J-BUS(2004年—2010年,五十鈴同日野屬下公司)
邊道出日本
取代咗日野RL301/RL321(中型巴士)
製造年份1966年—1998年(小巴)
1980年—2010年(中型巴士)
後繼產品日野Liésse
日野Liésse II(豐田Coaster嘅OEM)
日野Melpha
日野Rainbow II(五十鈴Erga Mio嘅OEM,後統一車種)
規格
引擎日野

日野Rainbow日本日野車廠出嘅一系列小巴同埋中型巴士

小巴[編輯]

1966年,日野推出Rainbow前置引擎小巴,型號係BM320。1976年,Rainbow前置引擎小巴發展成AM系列,擁有中型巴士嘅闊度(2.3米),1983年再改為AC系列。

1987年,日野推出Rainbow 7M(CH系列)同埋Rainbow 7W(RH系列),兩隻都係2.3米闊同埋有用氣墊懸掛。其中前者係中置引擎設計,後者係後置引擎設計,並喺1988年取代Rainbow AC系列。1991年Rainbow 7W出現短軸距版本,令前門可以擺喺前輪跨。Rainbow 7M同埋Rainbow 7W喺1998年俾日野Melpha 7(7米長嘅初代日野Melpha)取代。

另外喺1985年,日野推出闊2米嘅Rainbow小巴,包括前置引擎嘅AB系列同埋後置引擎嘅RB系列。Rainbow RB系列喺1992年出現短軸距版本,令前門可以擺喺前輪跨。Rainbow RB系列喺1995年俾新嘅日野Liésse取代;而Rainbow AB系列亦喺同年停產,日野喺1996年開始賣豐田Coaster嘅OEM-日野Liésse II-去取代佢嘅位置。

中型巴士[編輯]

澳門澳巴嘅日野Rainbow HR1JKEE

1980年,日野推出Rainbow中型巴士,分開做城市巴士同埋觀光/私家巴士兩種。初時Rainbow中型巴士只有配葉片懸掛嘅RJ系列,1982年加入配氣墊懸掛嘅RR系列。

1999年Rainbow RJ/RR系列觀光/私家巴士俾日野Melpha 9(9米長嘅初代日野Melpha)取代。至於Rainbow RJ/RR系列城市巴士一直冇出低地台版,RR系列喺2001年停產,而RJ系列就喺2004年停產,俾採用五十鈴Erga Mio設計嘅日野Rainbow II非低地台巴士取代。

1999年,日野推出Rainbow HR系列中型低地台巴士,最初引擎係打橫擺,有7米同埋9米長版本,2000年再加入10.5米長版本。後來日野同埋五十鈴嘅完整巴士生產合併,10.5米長嘅Rainbow HR系列自2003年開始亦有以五十鈴Erga J呢個名賣。2004年開始Rainbow HR系列嘅引擎改為打直擺,有9米同埋10.5米長版本。

隨住日野同埋五十鈴嘅中型城市巴士設計逐步統一,日野Rainbow HR系列亦逐步俾採用五十鈴Erga Mio設計嘅日野Rainbow II低地台巴士取代,去到2007年Rainbow HR系列只係得番10.5米長版本,兼且冇再以五十鈴Erga J呢個名賣。2010年底日野同埋J-BUS官方網頁嘅產品一覽冇再登出Rainbow HR系列嘅介紹。

日野Rainbow HR嘅OEM—五十鈴Erga J